Credit: រស្មីកម្ពូជា
ភ្នំពេញៈសីតុណ្ហភាពអតិបរមានឹងចាប់ធ្លាក់ចុះជាមធ្យមពី៣ទៅ៤អង្សាសេពីថ្ងៃនេះ(១៨មេសា)រហូតដល់ដំណាច់ខែមេសា បើធៀបទៅនឹងថ្ងៃដើមសប្តាហ៍នេះ។តែភ្លៀងកក់ខែនៅតែបន្តធ្លាក់រាយប៉ាយទូទាំងប្រទេសរហូតដល់ថ្ងៃទី២១ខែមេសាឆ្នាំ២០១៨នេះ។ លោកចាន់ យុត្ថាអ្នកនាំពាក្យនិងជានាយកខុទ្ទកាលយ័ក្រសួងធនធានទឹកនិងឧតុនិយមបានប្រាប់រស្មីកម្ពុជានៅថ្ងៃទី១៨ខែមេសានេះថា ភ្លៀងកក់ខែនៅតែបន្តធ្លាក់រាយប៉ាយស្ទើរទូទាំងប្រទេសរហូតដល់ថ្ងៃទី២១ខែមេសា។ជាមួយគ្នានេះសីតុណ្ហភាពអតិបរមាក៏ចាប់ផ្តើមធ្លាក់ចុះមកនៅក្នុងរង្វង់ពី៣០ទៅ៣១អង្សាសេវិញ។ មន្ត្រីអ្នកនាំពាក្យក្រសួងជំនាញខាងលើនិយាយឲ្យដឹងទៀតថាសីតុណ្ហភាពធ្លាក់ចុះទាបជាងកាលពីថ្ងៃដើមសប្តាហ៍នេះជាមធ្យមពី៣ទៅ៤អង្សាសេ គឺដោយសារប៉ុន្មានថ្ងៃជាប់គ្នាមកនេះមានភ្លៀងធ្លាក់រាយប៉ាយក្នុងក្របខណ្ឌទូទាំងប្រទេសនិងម្យ៉ាងទៀតពេលនេះមានឥទ្ធិពលជ្រលងសម្ពាធខ្ពស់ខ្សោយរុញមកដល់សារជាថ្មីផង៕
0 comments