ភ្នំពេញ ៖ កាលពីព្រឹកថ្ងៃទី ០៨ ខែ តុលា ឆ្នាំ ២០១៧ បានបែកធ្លាយសារលិខិតមួយរបស់ទ្រង់ស៊ីសុវត្ថិ សិរីមតៈ ដែលបានផ្ញើទៅកាន់សហរដ្ឋអាមេរិកដែលជាមហាមិត្តរបស់ទ្រង់កាលពីថ្ងៃទី ១៦ ខែ មេសា ឆ្នាំ ១៩៧៥ ស្ដីពីការបដិសេធមិនទៅរស់នៅសហរដ្ឋអាមេរិក ហើយត្រង់បានបន្ថែមទៀតថា អាមេរិក គឺជាមេក្លោងមួយនៅពីក្រោយការបង្កាត់ភ្លើងសង្គ្រាមឲ្យមានការឆាបឆេះក្ដៅរោលរាលនៅឧបទ្វីបឥណ្ឌូចិន ។
លិខិតដែលបានផ្ញើទៅសហរដ្ឋអាមេរិករបស់ទ្រង់ ស៊ីសុវត្ថិ សិរីមតៈ បានសរសេរជាភាសាអង់គ្លេស តែត្រូវបានគេយកមកបកប្រែជាភាសាខ្មែរបង្ហោះពេញបណ្ដាញសង្គម facebook ព្រោះវាជាសារមួយសម្រាប់ដាស់តឿនកូនខ្មែរគ្រប់រូបឲ្យបានយល់ដឹងពីល្បិចកលពិសពុលរបស់មហាអំណាចមួយនេះ ហើយក៏ជាសារមួយសម្រាប់ឲ្យពលរដ្ឋខ្មែរគ្រប់រូបបានដឹងថា គ្មានបរទេសណាស្រលាញ់ខ្មែរ ជាងខ្មែរខ្លួនឯងនោះទេ ។
ខ្លឹមសារទាំងស្រុងនៅក្នុងលិខិតនោះបានសរសេរយ៉ាងដូច្នេះថា ៖ " សូមគោរពជូន លោកប្រធានាធិបតី និង មិត្តសម្លាញ់ ខ្ញុំសូមសម្ដែងនូវភក្ដីភាពអរគុណចំពោះសារលិខិតរបស់អ្នក និង ការផ្ដល់នូវមធ្យោបាយដល់ខ្ញុំដើម្បីបានរស់នៅក្នុងភាពមានសេរីភាព ។ ខ្ញុំពិតជាមានការសោកស្ដាយជាខ្លាំង ខ្ញុំមិនអាចចាកចេញពីមាតុភូមិរបស់ខ្ញុំក្នុងនាមជាមេដឹកនាំ អ្នកនយោបាយដ៏កំសាកម្នាក់បានឡើយ ។ សម្រាប់អ្នក ក្នុងភាពជាប្រទេសមហាអំណាច ខ្ញុំស្ទើរតែមិនដែលនឹកស្មានដល់ទាល់តែសោះថា៖ អ្នកបានសម្រេចចិត្តចាកចោលពួកយើង ទុកឱ្យពួកយើងរស់រងទុក្ខនៅក្នុងភ្នក់ភ្លើងសង្គ្រាមដែលនឹងជិតមកដល់នេះ ដែលបានសម្រេចយកសេរីភាពតាមស្នាមគំនូសរបស់អ្នក ។
អ្នកបានច្រានចោល មិនគោរពតាមការសន្យារបស់អ្នកដែលថានឹងការពារពួកយើង ហើយខណៈនេះពួកយើងគ្មានលទ្ធភាព និងសមត្ថភាពគ្រប់គ្រាន់ឯណាដើម្បីបន្តដំណើរទៀតឡើយ ។ អ្នកបានចាកចោលពួកយើង ខ្ញុំសូមជូនពរអ្នក និងប្រទេសរបស់អ្នក សង្ឃឹមថាពួកអ្នកនឹងអាចរស់នៅក្នុងសុភមង្គលក្រោមដំបូលមេឃានេះទៅចុះ ។ ប៉ុន្តែខ្ញុំសូមផ្ដាំអ្នកទៅវិញថា បើទោះបីជាខ្ញុំត្រូវស្លាប់នៅទីនេះ ក្នុងមាតុភូមិដែលខ្ញុំស្រឡាញ់ វាពិតជាអកុសលខ្លាំងណាស់ ព្រោះវាជាច្បាប់ធម្មជាតិថា មនុស្សរាល់រូបនរណាៗកើតមកហើយក៏គង់នឹងត្រូវស្លាប់ចាកចោលរូបកាយនេះនៅថ្ងៃណាមួយមិនខាន ។ ជាចុងក្រោយ ខ្ញុំ ទ្រង់សិរី មតៈ ពិតជាមានការសោកស្ដាយខ្លាំងណាស់ ដែលសម្រេចចិត្តទៅជឿជាក់ដើរលើគំនូស មនោគមន៍វិជ្ជាប្លុកសេរី របស់អ្នក អាមេរិក " ។
នេះជាសារលិខិតមួយច្បាប់ដែលសរសេរផ្ទាល់ដោយទ្រង់ស៊ីសុវត្ថិ សិរី មតៈ ដែលកូនខ្មែរជំនាន់ក្រោយគ្រប់ៗរូបត្រូវចងចាំជានិច្ចថា សហរដ្ឋអាមេរិកគឺជាមេក្លោងមួយនៅពីក្រោយការបង្កាត់ភ្លើងសង្គ្រាមឱ្យឆាបក្ដៅរោលរាលនៅឥណ្ឌូចិន រហូតដល់នាំឱ្យមានការធ្វើរដ្ឋប្រហារទម្លាក់សម្ដេច សីហនុ ជម្រុញស្ថានភាពភ្លើងសង្គ្រាមឱ្យកាន់តែអាក្រក់រហូតដល់មានការបង្កើតឱ្យមានកម្លាំងខ្មែរក្រហម ដែលងើបចេញពីប្រជាជនខ្មែរមួយក្រុមតូច ដែលមានទស្សនៈទេរទៅរកលទ្ធិសង្គមនិយម សហរដ្ឋអាមេរិក ពួកគេគឺជាអ្នករុកកួនសុខដុមរមនា និងតម្លៃនៃសន្តិភាពរបស់ប្រជនជនខ្មែរ និងបំផ្លាញឯករាជ្យភាព និងអព្យាក្រឹតភាពរបស់ខ្មែរ... ៕
អត្ថបទ ៖ ចៅព្រហ្ម
0 comments