ឯកសារកិច្ចព្រមព្រៀងចំនួន២ត្រូវបានចុះហត្ថលេខាដើម្បីពង្រឹងនិងពង្រីកកិច្ចសហប្រតិបត្តិការទ្វេភាគី កម្ពុជា-នេប៉ាល់

កម្ពុជា-នេប៉ាល់ បានសម្រេចចុះហត្ថលេខាលើកិច្ចព្រមព្រៀងចំនួន២ ក្រោមអធិបតីភាពលោកនាយករដ្ឋមន្រ្តី ហ៊ុន សែន និងលោក ខេ ភី សាម៉ា អូលី (The Rt. Hon’ble K. P. Sharma Oli) នាយករដ្ឋមន្រ្តីនេប៉ាល់។ ពិធីចុះហត្ថលេខាលើកិច្ចព្រមព្រៀងនេះ បានប្រារព្ធធ្វើនៅឡើងនៅវិមានសន្តិភាព នាល្ងាចថ្ងៃទី១៣ ខែឧសភា ឆ្នាំ២០១៩ បន្ទាប់ពីនាយករដ្ឋមន្រ្តីនៃប្រទេសទាំងពីរ បានបញ្ចប់ជំនួបពិភាក្សាទ្វេភាគី។ កិច្ចព្រមពៀងទាំងពីររបស់កម្ពុជា-នេប៉ាល់ រួមមាន៖ ១៖ ក្របខណ្ឌកិច្ចព្រមព្រៀងស្តីពីពាណិជ្ជកម្ម និង វិនិយោគ ចុះហត្ថលេខាដោយ លោក ហេដា បាហាដូល អាល់ឌីការី រដ្ឋលេខាធិការទទួលបន្ទុកឧស្សាហកម្ម ពាណិជ្ជកម្ម និងការផ្គត់ផ្គង់ និង លោក ប៉ាន់ សូរស័ក្ក រដ្ឋមន្រ្តីក្រសួងពាណិជ្ជកម្ម។ ២៖ អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការទ្វេភាគី រវាងសភាពាណិជ្ជកម្មនេប៉ាល់ និង សភាពាណិជ្ជកម្មកម្ពុជា ចុះហត្ថលេខាដោយ លោក រ៉ាឆីស កាហ្ស៊ី ស្រ្តាលតា ប្រធានសភាពាណិជ្ជកម្មនេប៉ាល់ និង ឧកញ៉ា លឹម ហេង អនុប្រធាននៃសភាពាណិជ្ជកម្មកម្ពុជា៕