ទីបំផុត​តារា​ចម្រៀង និង​សម្តែង​ដ៏​ល្បី Park Yoochun ត្រូវ​តុលាការ​ចេញ​ដីកា​ចាប់ខ្លួន ដោយ​​ខ្លាចការ​បំផ្លាញ​ភស្តុតាង​និង​រត់​គេចខ្លួន

(កូរ៉េ)៖ បន្ទាប់ពីចំណាយពេលអស់ជាច្រើនម៉ោង ក្នុងការសវនាការយ៉ាងយកចិត្តទុកដាក់ តុលាការស្រុក Suwon បានសម្រេចចេញដីកាចាប់ខ្លួន Park Yoochun ដោយសារតែការប្រើសារធាតុញៀន មេតំហ្សេតាមីន (Methamphetamin)។ តុលាការស្រុក Suwon សម្រេចចេញដីកាចាប់ខ្លួន Yoochun ដោយសារតែពួកគេខ្លាចតារាចម្រៀងរូបនេះ បំផ្លាញភស្តុតាង ឬក៏ប៉ុនប៉ងរត់គេចខ្លួនចេញពីប្រទេសកូរ៉េ។ លោកនឹងត្រូវគេសួរចម្លើយរហូតដល់ទៅ ១០ថ្ងៃ នៅស្ថានីយប៉ូលិស បន្ទាប់ពីនេះរឿងក្តីរបស់លោកនឹងត្រូវយកមកកាត់ទោសតាមផ្លូវច្បាប់។ កាលពីព្រលឹមថ្ងៃសុក្រម្សិលមិញនេះ Park Yoochun បង្ហាញវត្តមានស្តាប់សវនាការ មុនពេលតុលាការចេញដីកាចាប់ខ្លួន ហើយលោកត្រូវបានគេឃើញថា ទើបតែប្តូរពណ៌សក់ថ្មី និងទឹកមុខស្រស់ស្រាយ។ ទោះបីជាយ៉ាងណាក៏ដោយ Yoochun ត្រូវបានគេឃើញថា ដៃរបស់លោកត្រូវបានចងដោយខ្សែ និងកដៃទាំងពីរបានជាប់ខ្នោះ នៅពេលដែលការស៊ើបអង្កេតរបស់លោកបានបញ្ចប់ ហើយជាធម្មតាសកម្មភាពនេះគឺត្រូវបានគេធ្វើឡើងចំពោះតែក្រុមឧក្រិដ្ឋជនប៉ុណ្ណោះ។ គួរបញ្ជាក់ថា Park Yoochun ជាប់សង្ស័យថា ប្រើប្រាស់ និងទិញសារធាតុញៀន Methamphetamine ក្រោយពីក្រុមជំនាញបានធ្វើតេស្តខ្លួនលោក រកសារធាតុញៀន ហើយលទ្ធផលចេញមកគឺវិជ្ជមាន ប៉ុន្តែលោកបានការពារខ្លួនថា លោកមិនបានប្រព្រឹត្តខុសច្បាប់ ដោយលោកបានអះអាងថា លោកមិនដែលបានប្រើប្រាស់នូវសារធាតុញៀន។ គួររំលឹកផងដែរថា Park Yoochun ជាអតីតសមាជិកក្រុមតារាចម្រៀង KPOP ដ៏ល្បី របស់កូរ៉េ JYJ ដែលមានសមាជិក ០៣នាក់ ហើយទាំង Yoochun និងសមាជិក JYJ ២នាក់ផ្សេងទៀត បានបំបែកចេញពីក្រុមតារាចម្រៀងដ៏ល្បីដូចគ្នាផងដែរគឺក្រុម TVXQ។ បើនិយាយពីប្រិយមិត្តក្នុងប្រទេសកម្ពុជា ដែលភាគច្រើនជាយុវវ័យពិតជាបានស្គាល់ឈ្មោះ របស់ក្រុមទាំងពីរនេះថា ល្បីល្បាញកម្រិតណា ហើយបើនិយាយអំពីប្រិយមិត្តដែលនិយមទស្សនារឿងភាគកូរ៉េទៅទៀតនោះ លោកអ្នកប្រហែលជាអាចនៅចងចាំរឿង «រាជបុត្រឆ្លងភព» តើប្រិយមិត្តនៅចាំទេ នរណាជាតួឯកប្រុស? ចម្លើយគឺ «Park Yoochun» ដែលលោកកំពុងជាប់ពាក់ព័ន្ធ​រឿងប្រើប្រាស់សារធាតុញៀននេះឯង៕