ប្រធានអង្គការ FAO ប្រចាំកម្ពុជាសន្យាគាំទ្រពេញទំហឹង នូវគម្រោងអនុវត្តអង្កេតកសិកម្ម និងការអង្កេតចន្លោះជំរឿនកសិកម្មឆ្នាំ២០១៩ របស់ក្រសួងផែនការ

នារសៀលថ្ងៃទី១៨ ខែកញ្ញា ឆ្នាំ២០១៨ នាទីស្តីការក្រសួងផែនការ លោកទេសរដ្ឋមន្ត្រី ឆាយ ថន រដ្ឋមន្ត្រីក្រសួងផែនការ បានទទួលជួបលោក Alexandre Huynh ប្រធានអង្គការ FAO ប្រចាំកម្ពុជា ស្តីពីការរៀបចំចុះហត្ថលេខាលើកិច្ចព្រមព្រៀង ស្តីពីគម្រោងអនុវត្តអង្កេតកសិកម្ម និងការអង្កេតចន្លោះជំរឿនកសិកម្ម នៅកម្ពុជាឆ្នាំ២០១៩។ ក្នុងជំនួបនេះ លោក Alexandre Huynh បានមានប្រសាសន៍ថា កិច្ចសហប្រតិបត្តិការរវាងក្រសួងផែនការ និងអង្គការ FAO ក្នុងកិច្ចព្រមព្រៀងស្តីពីគម្រោងអនុវត្តអង្កេតកសិកម្ម និងការអង្កេតចន្លោះជំរឿនកសិកម្មនៅកម្ពុជា ឆ្នាំ២០១៩នេះ លោកនឹងជំរុញអនុវត្តឱ្យសម្រេចបានជោគជ័យ។ បន្ថែមពីការផ្តល់ជំនួយថវិកា និងបច្ចេកទេសនេះ អង្គការ FAO នឹងខិតខំព្យាយាមប្រឹងប្រែងបន្ថែមទៀត ស្វែងរកដៃគូរផ្តល់ជំនួយអភិវឌ្ឍន៍ដទៃទៀត ដើម្បីជួយដល់ក្រសួងផែនការ ក៏ដូចជារាជរដ្ឋាភិបាលកម្ពុជា ក្នុងកិច្ចអភិវឌ្ឍន៍ប្រទេសជាតិរបស់ខ្លួន អោយរីកចម្រើនថែមទៀត។ លោកទេសរដ្ឋមន្ត្រី ឆាយ ថន បានថ្លែងនូវការសាទរ ស្វាគមន៍ ក្នុងនាមក្រសួងផែនការ ចំពោះការផ្តល់ការគាំទ្រពីសំណាក់ អង្គការFAO ក៏ដូចជារាជរដ្ឋាភិបាលកម្ពុជា ដែលបានគាំទ្រដល់គម្រោងអនុវត្តជំរឿនកសិកម្ម និងការអង្កេតចន្លោះជំរឿនកសិកម្មនៅកម្ពុជាឆ្នាំ២០១៩នេះ។ សូមបញ្ជាក់ថា ក្នុងសហប្រតិបត្តិការអនុវត្តគម្រោងអង្កេតខាងលើនេះ វិទ្យាស្ថានជាតិស្ថិតិនៃក្រសួងផែនការ បានទទួលគោលការណ៍អនុញ្ញាត ចុះហត្ថលេខាកិច្ចព្រមព្រៀង ស្តីពីការអនុវត្តអង្កេតចន្លោះជំរឿនកសិកម្មកម្ពុជា សម្រាប់ឆ្នាំ២០១៩ ជាមួយអង្គការ FAO ដោយពន្ធ និងអាករផ្សេងៗ ជារបស់រដ្ឋ និងការធានាចំណាយឥណទានថវិកាបដិភាគចំនួន២៦៦,០០០ដុល្លារអាមេរិក របស់រាជរដ្ឋាភិបាលកម្ពុជា (២០%) សម្រាប់គាំទ្រការអនុវត្តអង្កេតចន្លោះជំរឿនកសិកម្មកម្ពុជាឆ្នាំ២០១៩។ គម្រោងអនុវត្តអង្កេតចន្លោះជំរឿនកសិកម្មកម្ពុជាឆ្នាំ២០១៩ ត្រូវបានគ្រោងចំណាយថវិកាសរុបចំនួន១,៣១៥,៨៦៧ ដុល្លារអាមេរិក ក្នុងនោះអង្គកា រFAO ចូលរួមថវិកាចំនួន១,០៤៩,៨៦៧ ដុល្លាអាមេរិក សម្រាប់ជំហ៊ានដំបូងនេះ។ ការអនុវត្តគម្រោងអង្កេតកសិកម្មខាងលើ គឺចាំបាច់ត្រូវការសហប្រតិបត្តិការបច្ចេកទេស ពីអង្គការFAO ក្រសួងកសិកម្ម រុក្ខាប្រមាញ់ និងនេសាទ និងដៃគូអភិវឌ្ឍន៍ពាក់ព័ន្ធនានា ដើម្បីឱ្យលទ្ធផលទិន្នន័យអង្កេតកសិកម្មមានប្រសិទ្ធភាព ប្រកបដោយគុណភាពខ្ពស់ ដែលអាចជឿជាក់បានសម្រាប់ប្រើប្រាស់ក្នុងការរៀបចំគោលនយោបាយអភិវឌ្ឍន៍ជាតិ គាំទ្រគោលដៅអភិវឌ្ឍន៍ប្រកបដោយចីរភាព ជាដើម៕