គណៈកម្មាធិការជាតិរៀបចំការបោះឆ្នោត គ្រោងនឹងចុះឈ្មោះបោះឆ្នោត ជូនប្រជាពលរដ្ឋដែលគ្រប់អាយុថ្មី ជិតកន្លះលាននាក់

គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប នៅថ្ងៃទី១៨ ខែកញ្ញា ឆ្នាំ២០១៨ បានចេញសេចក្តីប្រកាសព័ត៌មានមួយ ដោយបានបញ្ជាក់ថា ខ្លួនគ្រោងនឹងចុះឈ្មោះបោះឆ្នោតជូនប្រជាពលរដ្ឋកម្ពុជា ជិតកន្លះលាននាក់ ដែលទើបគ្រប់អាយុថ្មីទៀត។ យោងតាមសេចក្តីប្រកាសព័ត៌មាន បានឱ្យដឹងទៀតថា ទន្ទឹមនឹងផែនការចុះឈ្មោះបោះឆ្នោតថ្មីបន្ថែមនេះ ក៏មានអ្នកដែលត្រូវលុបឈ្មោះចេញពីបញ្ជីបោះឆ្នោតមានចំនួន ៩៥,៩២៨នាក់ផងដែរ។ គណៈកម្មាធិការជាតិរៀបចំការបោះឆ្នោត ក៏បានរំលឹកថា អ្នកដែលមានឈ្មោះនៅក្នុងបញ្ជីបោះឆ្នោត ឆ្នាំ២០១៧ មានចំនួន ៨,៣៨០,២១៧នាក់ និងការិយាល័យបោះឆ្នោត ឆ្នាំ២០១៨ មានចំនួន ២៣,៣០១ការិយាល័យ កើនឡើងចំនួន ៣៣៤ការិយាល័យ។ ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៨នេះ មានគោលដៅធានាឱ្យបញ្ជីបោះឆ្នោត មានភាពពេញលេញ ភាពត្រឹមត្រូវ និងមានបច្ចុប្បន្នភាពប្រកបដោយសុវត្ថិភាព។ សូមជម្រាបថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨ ត្រូវចាប់ផ្តើមពីថ្ងៃទី១ ខែតុលា ឆ្នាំ២០១៨ រហូតដល់ថ្ងៃទី១៨ ខែតុលា ឆ្នាំ២០១៨៕ ខាងក្រោមនេះជាសេចក្តីប្រកាសព័ត៌មាន របស់គណៈកម្មាធិការជាតិរៀបចំការបោះឆ្នោត៖