Credit: រស្មីកម្ណុជា
ភ្នំពេញៈ ធនាគារជាតិនៃកម្ពុជា បានប្រកាសថា គិតមកត្រឹមខែមីនា ឆ្នាំ២០១៨ ក្រៅពីគ្រឹះស្ថានធនាគារពាំណិជ្ជ គឺមានតែគ្រឹះស្ថានមីក្រូហិរញ្ញវត្ថុ ចំនួន ៧ ប៉ុណ្ណោះ ដែលត្រូវបានអនុញ្ញាតឲ្យទទួលប្រាក់បញ្ញើពីសាធារណជន។ នេះបើតាមសេចក្តីប្រកាសព័ត៌មានរបស់ធនាគារជាតិនៃកម្ពុជា ចុះថ្ងៃទី២៨ ខែមីនា ឆ្នាំ២០១៨។
គ្រឹះស្ថានមីក្រូហិរញ្ញវត្ថុទាំង ៧នោះ រួមមាន៖ ១-គ្រឹះស្ថានមីក្រូហិរញ្ញវត្ថុ ប្រាសាក់ ២-គ្រឹះស្ថានមីក្រូហិរញ្ញវត្ថុ វីសិនហ្វាន់ ( ខេមបូឌា ) អិលធីឌី ៣-គ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីត ៤-គ្រឹះស្ថានមីក្រូហិរញ្ញវត្ថុ អេ អឹម ខេ ភី អិល ស៊ី ៥-គ្រឹះស្ថានមីក្រូហិរញ្ញវត្ថុ ក្រេឌីត ភី អិល ស៊ី ៦-គ្រឹះស្ថានមីក្រូហិរញ្ញវត្ថុ អម្រឹត ខូ អិល ធី ឌី និង៧-គ្រឹះស្ថានមីក្រូហិរញ្ញវត្ថុ អិល អូល អិល ស៊ី ( ខេមបូឌា ) ភី អិល ស៊ី។
ធនាគារជាតិនៃកម្ពុជាក៏បានលើកឡើងថា ក្រៅពីគ្រឹះស្ថានមីក្រូហិរញ្ញវត្ថុទាំង ៧ ខាងលើនេះ គ្រឹះស្ថានមីក្រូហិរញ្ញវត្ថុ និងគ្រឹះស្ថានឥណទានជនបទ ដែលស្ថិតក្រោមការត្រួតពិនិត្យរបស់ធនាគារជាតិនៃកម្ពុជា មិនត្រូវបានអនុញ្ញាតឲ្យទទួលប្រាក់បញ្ញើពីសាធារណជនឡើយ ទោះក្រោមរូបភាពណាក៏ដោយ។
ជាមួយគ្នានេះ ក្នុងសេចក្តីប្រកាសដដែល ធនាគារជាតិនៃកម្ពុជា បានលើកឡើងថា កន្លងមក ធនាគារជាតិនៃកម្ពុជា បានទទួលព័ត៌មានថា ជនមួយចំនួន និងគ្រឹះស្ថានឥណទានជនបទមួយចំនួនតូច ដែលបានកម្លាយខ្លួនពីអង្គការមិនមែនរដ្ឋាភិបាល បាន និងកំពុងអូសទាញប្រជាពលរដ្ឋតាមរយៈការប្រមូលប្រាក់បញ្ញើពីសាធារណជន ក្រោមរូបភាព “កិច្ចសន្យាខ្ចីប្រាក់” និងការផ្តល់អត្រាការប្រាក់ខ្ពស់ ព្រមទាំងការផ្តល់ប្រាក់កម្ចីល្មើសច្បាប់៕
0 comments