Credit: រស្មីកម្ពុជា
ភ្នំពេញៈ ប្រទេសកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូលគណៈកម្មការទន្លេមេគង្គ លើកទី៣ នៅថ្ងៃទី ០៥ ខែ មេសា ក្នុងខេត្តសៀមរាប ដែលជាខេត្តមានប្រាសាទអង្គរដ៏ល្បីល្បាញ ដើម្បីលើកកម្ពស់កិច្ចសហប្រតិបត្តិការតំបន់ ក្នុងចំណោមប្រទេសតាមដងទន្លេមេគង្គ សំដៅសម្រេចឲ្យនូវការអភិវឌ្ឍ និងការគ្រប់គ្រងទន្លេមេគង្គប្រកបដោយចីរភាព។
កិច្ចប្រជុំកំពូលក្រោមប្រធានបទ “ការលើកកម្ពស់កិច្ចខិតខំប្រឹងប្រែងរួមគ្នា និងភាពជាដៃគូដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពក្នុងអាងទន្លេមេគង្គ” ក្រោមទិសស្លោក “ទន្លេមេគង្គតែមួយ ស្មារតីតែមួយ ” នឹងមានការចូលរួមពីនាយករដ្ឋមន្ដ្រីនៃប្រទេសជាសមាជិកគណៈកម្មការទន្លេមេគង្គ កម្ពុជា ឡាវ ថៃ និងវៀតណាម ព្រមទាំងតំណាងជាន់ខ្ពស់ពីប្រទេសដៃគូសន្ទនា ចិន និងមីយ៉ាន់ម៉ា ដើម្បីពិភាក្សាលើបញ្ហាប្រឈមនានាដែល កំពុងតែកើតមានក្នុងអាងទន្លេមេគង្គ និងដាក់ចេញនូវទិសដៅសម្រាប់ធ្វើការរួមគ្នា ដើម្បីផលប្រយោជន៍ នៃការអភិវឌ្ឍប្រកបដោយចីរភាពក្នុងអាងទន្លេមេគង្គ។
លោក តែ ណាវុធ អគ្គលេខាធិការនៃគណៈកម្មាធិការជាតិទន្លេមេគង្គកម្ពុជា និងជាសមាជិកនៃ គណៈកម្មការអន្តរក្រសួងរៀបចំកិច្ចប្រជុំកំពូលគណៈកម្មការទន្លេមេគង្គលើកទី៣ បានមានប្រសាសន៍ថា “ប្រទេសកម្ពុជាមានកិត្តិយសដែលបានធ្វើជាម្ចាស់ផ្ទះរៀបចំកិច្ចប្រជុំកំពូលនេះ ដែលជាពេលវេលាដ៏សំខាន់ ដែលប្រទេសតាមដងទន្លេមេគង្គចាំបាច់ត្រូវបង្កើនកិច្ចខិតខំប្រឹងប្រែងរួមគ្នា និងភាពជាដៃគូ ដើម្បីធ្វើឲ្យកាន់តែប្រសើរនូវការគ្រប់គ្រងអាងទន្លេមេគង្គ ដែលកំពុងតែមានការអភិវឌ្ឍយ៉ាងឆាប់រហ័ស សម្រាប់កំណើនសេដ្ឋកិច្ច។”
មុនកិច្ចប្រជុំកំពូលនេះ នឹងមានការរៀបចំសន្និសីទអន្តរជាតិមួយនាថ្ងៃទី ០២-០៣ ខែមេសា ឆ្នាំ២០១៨ ដែលមានការចូលរួមពីអ្នកពាក់ព័ន្ធ មកពីបណ្តាស្ថាប័នរដ្ឋាភិបាល អង្គការក្រៅរដ្ឋាភិបាល អង្គការអាងទន្លេ ដៃគូអភិវឌ្ឍន៏ គ្រឹះស្ថានសិក្សាស្រាវជ្រាវ និងវិស័យឯកជន ដើម្បីធ្វើការផ្លាស់ប្ដូរទស្សនៈ និងការអនុវត្តនិងវិធីសាស្ត្រល្អៗលើការគ្រប់គ្រងធនធានទន្លេ និងការលើកកម្ពស់ភាពជាដៃគូជាមួយយន្ដការ និងក្របខណ្ឌតំបន់ផ្សេងទៀត រួមមាន ក្របខណ្ឌសហប្រតិបត្តិការឡានឆាង-មេគង្គ កម្មវិធីមហាអនុតំបន់មេគង្គនៃធនាគារអភិវឌ្ឍន៍អាស៊ី និងអាស៊ានជាដើម។
បើតាមការលើកឡើងរបស់គណៈកម្មការទន្លេមេគង្គ ប្រមុខរដ្ឋាភិបាលនៃប្រទេសទាំងបួននឹងធ្វើការអះអាងសារជាថ្មីនូវកិច្ចសហប្រតិបត្តិការរបស់ខ្លួនក្នុងការអនុវត្តគម្រោង និងសកម្មភាពរួមគ្នា ដើម្បីធានាឲ្យមានការគ្រប់គ្រងប្រកបដោយចីរភាពនូវធនធានទឹក និងធនធានពាក់ព័ន្ធក្នុងអាងទន្លេមេគង្គ ដែលនឹងរួមចំណែកដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ លើផ្នែកការកាត់បន្ថយភាពក្រីក្រ កំណើនសេដ្ឋកិច្ច សន្ដិសុខស្បៀង ការផលិតថាមពលក្នុងតម្លៃសមស្របនិងអាចជឿទុកចិត្តបាន និងបម្រែបម្រួលអាកាសធាតុ។
កិច្ចប្រជុំកំពូលគណៈកម្មការទន្លេមេគង្គ គឺជាព្រឹត្តិការណ៍កម្រិតនយោបាយខ្ពស់បំផុត និងដ៏មានសារៈសំខាន់ ដែលផ្តួចផ្តើមដោយប្រទេសជាសមាជិក និងត្រូវរៀបចំធ្វើឡើងរៀងរាល់បួនឆ្នាំម្ដង សម្រាប់ផ្ដល់ឱកាស ដល់ប្រមុខរដ្ឋាភិបាលនៃប្រទេសទាំងបួនធ្វើការផ្លាស់ប្ដូរទស្សនៈ ពិភាក្សាលើដំណោះស្រាយ ដើម្បីឆ្លើយតបចំពោះបញ្ហាប្រឈមនានាដែលតំបន់នេះកំពុងជួបប្រទះ និងពិនិត្យឡើងវិញលើវឌ្ឍនភាពនិងសមិទ្ធផលដែលគណៈកម្មការទន្លេមេគង្គសម្រេចបាន ក្នុងការលើកកម្ពស់កិច្ចសហប្រតិបត្តិការពហុភាគី ដើម្បីការគ្រប់គ្រង ប្រកបដោយចីរភាពក្នុងអាងទន្លេមេគង្គ ដូចមានចែងក្នុងកិច្ចព្រមព្រៀងមេគង្គ ដែលប្រទេសទាំងបួនបានចុះហត្ថលេខាកាលពីថ្ងៃទី ០៥ ខែមេសា ឆ្នាំ១៩៩៥។
កិច្ចប្រជុំកំពូលលើកទី១ បានរៀបចំធ្វើនៅប្រទេសថៃ ក្នុងឆ្នាំ២០១០ ដោយបានចេញនូវសេចក្ដីថ្លែងការរួម ដែលផ្ដោតលើការពង្រឹងកិច្ចខិតខំប្រឹងប្រែងដើម្បីកាត់បន្ថយហានីភ័យនានា បង្កឡើងដោយគ្រោះទឹកជំនន់ គ្រោះរាំងស្ងួតនិងការកើនឡើងកម្ពស់ទឹកសមុទ្រ ការធានានិរន្តភាពនៃការប្រើប្រាស់ធនធានទឹកនិងធនធានពាក់ព័ន្ធសម្រាប់ពេលអនាគត ការកំណត់ពីបញ្ហាប្រឈមនិងកាលានុវត្ថភាពសម្រាប់អភិវឌ្ឍន៍ហេដ្ឋារចនាសម្ព័ន្ធ និងការសម្របសម្រួលក្របខណ្ឌគតិយុត្ដអន្តរជាតិសម្រាប់ការធ្វើនាវាចរណ៍ និងពាណិជ្ជកម្ម។
កិច្ចប្រជុំកំពូលលើកទី២ បានរៀបចំធ្វើនៅប្រទេសវៀតណាម ក្នុងឆ្នាំ២០១៤ បានធ្វើការអះអាងសារជាថ្មីនូវការប្ដេជ្ញាចិត្តរួមគ្នាខិតខំធ្វើការយ៉ាងណាដើម្បីកាត់បន្ថយហានីភ័យនៃគ្រោះមហន្ដរាយ ក្នុងអាងទន្លេមេគង្គទាំងមូល ពង្រឹងវិធានការថែរក្សាគុណភាពទឹក ពង្រីកកាលានុវត្ថភាពដើម្បីពង្រឹកិច្ចសហប្រតិបត្តិការជាមួយដៃគូសន្ទនា ដៃគូអភិវឌ្ឍន៍ និងយន្តការថ្នាក់តំបន់ និងអន្តរជាតិផ្សេងទៀត។
លោក តែ ណាវុធ បានមានប្រសាសន៍ថា កិច្ចប្រជុំកំពូលទាំងពីរលើកកន្លងមក បាននាំមកនូវការបង្កើនកិច្ចសហប្រតិបត្តិការលើការគ្រប់គ្រងធនធានទឹក និងថាកិច្ចប្រជុំកំពូលនៅឆ្នាំនេះ នឹងផ្ដល់ឱកាសដល់បណ្ដាប្រទេសតាមដងមេគង្គទាំងបួនធ្វើការពិនិត្យឡើងវិញលើការប្ដេជ្ញាចិត្តរបស់ខ្លួន ជម្រុញលើកកម្ពស់កិច្ចខិតខំប្រឹងប្រែងរួមគ្នានិងភាពជាដៃគូឲ្យមានប្រសិទ្ធភាព និងពិភាក្សាលើយុទ្ធសាស្ដ្រសម្រាប់ពេលអនាគតបន្ដទៀត ។
លោកបានមានប្រសាសន៍បន្ថែមថា “យើងចាំបាច់ត្រូវតែបង្កើនកិច្ចខិតខំប្រឹងប្រែងប្រកបដោយកិច្ចសហប្រតិបត្តិការល្អ ដើម្បីបង្កើនផលប្រយោជន៍ផ្នែកសេដ្ឋកិច្ចឲ្យបានជាអតិបរមា និងកាត់បន្ថយផលប៉ះពាល់ជាអវិជ្ជមានពីការអភិវឌ្ឍហេដ្ឋារចនាសម្ព័ន្ធ និងការអភិវឌ្ឍផ្សេងទៀតក្នុងអាងទន្លេមេគង្គ” ។
អគ្គលេខាធិការគណៈកម្មាធិការជាតិទន្លេមេគង្គកម្ពុជាមានប្រសាសន៍ថា នៅក្នុងរយៈពេលជាង ២៣ឆ្នាំកន្លងទៅនេះ ក្រោមក្របខណ្ឌកិច្ចសហប្រតិបត្តិការគណៈកម្មការទន្លេមេគង្គ ប្រទេសកម្ពុជាបានរួមចំណែកបង្កើនប្រសិទ្ធភាពនៃការគ្រប់គ្រង និងការអភិវឌ្ឍទន្លេមេគង្គ ដោយបានសហការជាមួយបណ្ដាប្រទេសតាមដងទន្លេមេគង្គផ្សេងទៀត ដើម្បីគិតគូរដោះស្រាយនូវរាល់បញ្ហាដែលកើតមាន ដោយសារការអភិវឌ្ឍវារីអគ្គិសនី និងធនធានទឹកដទៃទៀត ដែលបង្កជាការគំរាមកំហែងដល់ធនធានក្នុងអាងទន្លេមេគង្គ។
គណៈកម្មាធិការជាតិទន្លេមេគង្គកម្ពុជា គឺជាសេនាធិការផ្ទាល់របស់រាជរដ្ឋាភិបាលកម្ពុជា ដើម្បីសម្របសម្រួលលើការគ្រប់គ្រង ការការពារ ការអភិរក្ស និងការអភិវឌ្ឍធនធានទឹក និងធនធានពាក់ព័ន្ធផ្សេងទៀតក្នុង អាងទន្លេមេគង្គ។ ក្រោមក្របខណ្ឌគណៈកម្មការទន្លេមេគង្គសម្រាប់ការអភិវឌ្ឍប្រកបដោយចីរភាព គណៈកម្មាធិការនេះ សម្របសម្រួលលើការរៀបចំ និងការអនុវត្តគម្រោង និងកម្មវិធីនានា ក្នុងគោលបំណងដើម្បីលើកកម្ពស់ជីវភាពរស់នៅរបស់សហគមន៍តាមដងទន្លេ នៃប្រទេសជាសមាជិកគណៈកម្មការទន្លេមេគង្គទាំងបួន៕
0 comments