សម្តេចតេជោ ហ៊ុន សែន បង្ហាញរូបថតអនុស្សាវរីយ៍ជាមួយភរិយា ថតកាលពីវ័យជាង ៣០ឆ្

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បង្ហាញរូបថតពីរសន្លឹក ថតជាមួយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាឧត្តមភរិយា កាលពីអាយុជាង ៣០ឆ្នាំ។ សម្តេចតេជោ ហ៊ុន សែន បានសរសេរលើ Facebook ជាមួយរូបថតពីរសន្លឹកក្នុងឈុតសម្លៀកបំពាក់អាវធំ នៅល្ងាចថ្ងៃទី២៧ ខែសីហា ដោយបញ្ជាក់យ៉ាងដូច្នេះ «ល្ងាចនេះទទួលបានរូបថតពីរសន្លឹកដែលខ្លួនខ្ញុំ និងភរិយាមិនដែលបានឃើញ»។ សម្តេចតេជោររៀបរាប់ទៀតថា «តាមពិនិត្យរូបថតនេះថតនៅមូស្គូប្រទេសរុស្សុី ដែលពេលមុនជាសហភាពសូវៀត តែខ្ញុំមិនច្បាស់ថា ថតនៅឆ្នាំណា?។ប្រសិនមានបងប្អូនអាចដឹងបានសុំជួយប្រាប់ផង ព្រោះតាមពិនិត្យរូបថតនេះ ខ្ញុំ និងភរិយា ទើបមានអាយុជាង ៣០ឆ្នាំប៉ុណ្ណោះមានកូនតូចៗមិនទាន់មានចៅដូចពេលនេះទេ»។ ក្នុងនាមជាមេដឹកនាំនាវាកម្ពុជាឆ្លងកាត់ច្រើនដំណាក់កាល ជាពិសេសក្នុងដំណាក់កាលប្រទេសជាតិស្ថិតក្នុងស្ថានភាពក្រីក្រនោះ សម្តេចតេជោ ហ៊ុន សែន មានរូបភាពអនុស្សាវរីយ៍ជាច្រើន។ រូបភាពអនុស្សាវរីយ៍ពីអតីតកាលរបស់សម្តេចតេជោ ហ៊ុន សែន ក្នុងពេលប្រទេសជាតិមានស្ថានភាពលំបាកនោះ តែងតែទទួលបានការចាប់អារម្មណ៍ខ្ពស់ពីប្រជាពលរដ្ឋខ្មែរក្នុងពេលបច្ចុប្បន្ននេះ។ រូបភាពអនុស្សាវរីយ៍ចាស់ៗ នៅពេលសម្តេចតេជោនាយករដ្ឋមន្ត្រី បង្ហោះម្តងៗតែងទទួលបានការចាប់ចុច «ពេញចិត្ត (Like), ស្រឡាញ់ (Love)», «ចែករំលែក (Share)» ព្រមទាំងការបញ្ចេញមតិយោបល់ផ្សេងៗ រាប់ពាន់រាប់ម៉ឺននាក់៕