Credit: រស្មីកម្ពុជា
ព្រៃវែង: បុរសម្នាក់បានយកកន្ត្រៃចាក់ខ្លួនឯងឲ្យរបួសធ្ងន់ ដោយតូចចិត្តខឹងនឹងសង្សាររបស់ខ្លួនសូមបែកផ្លូវគ្នា ខណៈនាងជាសង្សារលើកហេតុផលថា បងលែងប្រពន្ធមិនទាន់ដាច់ ចឹងអូនដើរចេញ។ ហេតុការណ៍នេះ បានកើតឡើងនៅចំណុចផ្ទះទាមលក់គ្រឿងសំអាង ស្ថិតក្នុងភូមិឡឥដ្ឋ ឃុំក្រញូង ស្រុកកំចាយមារ ខេត្តព្រៃវែង កាលពីវេលាម៉ោង១៩និង២៤នាទី យប់ថ្ងៃទី២០ខែមេសាឆ្នាំ២០១៨។ សមត្ថកិច្ចនគរបាលបានឲ្យដឹងថា បុរសដែលចាក់ខ្លួនឯងឈ្មោះ ឡាញ់ ថៃ អាយុ៣៨ឆ្នាំ រស់នៅភូមិធ្នង់លិច ឃុំស្មោងជើង ស្រុកកំចាយមារ បានរងរបួសពោះ១កន្លែង ត្រូវគេដឹកយកទៅសង្គ្រោះនៅមន្ទីរពេទ្យ។ ប្រភពនិយាយថា ដើមចមដំបូងជនរងគ្រោះមានទំនាក់ទំនងស្នេហាស្អិតរមួតជាមួយស្ត្រីម្នាក់ឈ្មោះ អៀម លីណា ហៅស្រីផល អាយុ៣៤ឆ្នាំ ដែលជាម្ចាស់លក់គ្រឿងសំអាង រស់នៅភូមិឃុំកើតហេតុខាងលើអស់រយៈពេលយូរហើយដែរ។ ប៉ុន្តែថ្មីៗនេះ ស្ត្រីជាសង្សាឈ្មោះ អៀម លីណា ហៅស្រីផល បានដឹងថា បុរសជាជនរងគ្រោះបានមានប្រពន្ធ ហើយមិនទាន់លែងលះគ្នាដាច់ស្រេចទេ។ នាងក៏បានសុំបែកផ្លូវគ្នា ជាមួយឈ្មោះឡាញ់ ថៃដែលជាសង្សានោះ។ ពេលឮសង្សារនិយាយពាក្យដដែលៗសុំបែកផ្លូវគ្នាមិនដាច់ពីមាត់ លុះដល់ម៉ោងកើតហេតុ ឈ្មោះ ឡាញ់ ថៃ តូចចិត្តក៏ខឹងស្ទុះទៅយកកន្ទ្រៃចាក់ខ្លួនឯងចំពោះតែម្តង។ ក្រោយទទួលបានព័ត៌មាន កម្លាំងសមត្ថកិច្ចប៉ុស្តិ៍រដ្ឋបាល ក៏ចុះទៅដល់កន្លែងកើតហេតុ ធ្វើកំណត់ហេតុតាមនីតិវិធី៕
0 comments