Credit: រស្មីកម្ពុជា
ព្រះសីហនុ: ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន នៅព្រឹកថ្ងៃទី២៣ ខែមេសា ឆ្នាំ២០១៨ស្អែកនេះ នឹងអញ្ជើញជាអធិបតីសម្ពោធបើកឲ្យដំណើរការជាផ្លូវការសណ្ឋាគារលំដាប់ផ្កាយ៥ «ដឹរ៉ូយ៉ាល់ សេន កោះរ៉ុង» ស្ថិតភូមិសុខសាន្ដ សង្កាត់កោះរ៉ុង ក្រុងព្រះសីហនុ ខេត្តព្រះសីហនុ។ សណ្ឋាគារដ៏ទំនើបនេះបានចំណាយទឹកប្រាក់សាងសង់ប្រមាណ ៤០លានដុល្លារសហរដ្ឋអាមេរិក ក្នុងដំណាក់កាលទី១ ហើយសាងសង់ជាលក្ខណៈវីឡាចំនួន ៦៧ខ្នង ស្មើ ១៤៨បន្ទប់ ដែលរាល់វីឡានីមួយៗមានអាងហែលទឹកមួយ។ កោះរុងស្ថិតនៅចម្ងាយ២៥ គីឡូម៉ែត្រពីក្រុងព្រះសីហនុ ខេត្តព្រះសីហនុ ដោយមានផ្ទៃដី ៧៨គីឡូម៉ែត្រក្រឡា, កម្ពស់ ១៣៣ ម៉ែត្រពីនីវ៉ូទឹកសមុទ្រ និងមានប្រវែងជើង ត្បូង១០គីឡូម៉ែត្រ។ កាលពីឆ្នាំ២០១២ ទស្សនាវដ្ដីអន្តរជាតិ Forbes បានចាត់ចំណាត់ថ្នាក់កោះរុង ជាកោះល្អប្រណីតនៅអាស៊ី។ ក្រុមហ៊ុនរ៉ូយ៉ាល់គ្រុបបានទទួលសម្បទានពីរាជរដ្ឋាភិបាលកម្ពុជា រយៈពេល៩៩ឆ្នាំ ដោយចាប់ដៃជាមួយអ្នកវិនិយោគជនជាតិស្វីស ដើម្បីអភិវឌ្ឍន៍កោះរុងឲ្យក្លាយជាឋានសួគ៌នៅអាស៊ី និងសាងសង់សណ្ឋាគារប្រណីតនេះឡើង។ បើតាមជំនួយការជំនិតរបស់អ្នកឧកញ៉ា គិត ម៉េង បង្ហើបឲ្យដឹងថា តម្លៃបន្ទប់ទាបបំផុត គឺ ៧០០ដុល្លារក្នុងមួយបន្ទប់ និងតម្លៃខ្ពស់បំផុតចន្លោះពី ១០០០ ទៅ ២០០០ដុល្លារអាមេរិក ក្នុងមួយបន្ទប់ សម្រាប់ការស្នាក់នៅមួយយប់៕
0 comments