លោកនាយករដ្ឋមន្រ្តី ហ៊ុន សែន បញ្ជាក់ថា «គណបក្សប្រជាជន គឺជាគន្លឹះនៃសន្តិភាព និងការអភិវឌ្ឍន៍»

នៅព្រឹកថ្ងៃអាទិត្យ ទី២៥ ខែមីនា ឆ្នាំ២០១៨នេះ លោកនាយករដ្ឋមន្រ្តី ហ៊ុន សែន បានបញ្ជាក់នៅក្នុងទំព័រហ្វេសប៊ុករបស់លោកថា គណបក្សប្រជាជន គឺបាននាំមកនូវជោគជ័យដ៏ធំធេងបំផុតសម្រាប់កម្ពុជា ដែលមានការចូលរួមពីមន្រ្តីបក្ស និងសមាជិកបក្សគ្រប់ៗរូប។ យើងទាំងអស់គ្នាក៏បានដឹងច្បាស់ណាស់ថា «គណបក្សប្រជាជន គឺជាគន្លឹះនៃសន្តិភាព និងការអភិវឌ្ឍន៍»។

លោកនាយករដ្ឋមន្រ្តី ហ៊ុន សែន បានគូសបញ្ជាក់ថា ទន្ទឹមនឹងការរីកចម្រើន ក៏យើងត្រូវទទួលស្គាល់អំពីស្ថានភាពពិតអំពីការលំបាកទាំងឡាយដែលយើងបានឆ្លងកាត់ឆ្ពោះមករកភាពងាយស្រួល និងល្អប្រសើរដូចសព្វថ្ងៃ។ សន្ទុះនៃវឌ្ឍនភាពកម្ពុជាបច្ចុប្បន្ន គឺមិនគួរឱ្យជឿ។ សន្តិភាព និងគ្រប់អ្វីៗដែលបានមកដោយលំបាកបំផុតនោះ គឺយើងត្រូវខិតខំចូលរួមថែរក្សាការពារឱ្យបានគង់វង្សបំផុត ទោះបីដោយតម្លៃណាក៏ដោយ។ ជាក់ស្តែង គឺយើងអាចមើលប្រទេសម៉ាលីស្រាប់ ដែលនៅឆ្នាំ ១៩៩៣ គឺបានបញ្ជូនកងទ័ព និងអ្នកសង្កេតការណ៍បោះឆ្នោតមកកម្ពុជា ប៉ុន្តែពេលបច្ចុប្បន្ននេះ ប្រទេសម៉ាលីមានស្ថានភាពដូចកម្ពុជានៅឆ្នាំ ១៩៨០។ នេះដោយសារប្រទេសគ្មានសន្តិភាព។

ប្រមុខរាជរដ្ឋាភិបាលកម្ពុជា ក៏បានអរគុណដល់បងប្អូនជនរួមជាតិ និងសមាជិកសមាជិកាគណបក្សទាំងអស់ដែលបានគាំទ្រ និងបោះឆ្នោតឱ្យតែ គណបក្សប្រជាជនកម្ពុជា ដើម្បីដឹកនាំកសាងប្រទេសជាបន្តទៀត ជាពិសេសនៅថ្ងៃបោះឆ្នោត ថ្ងៃទី២៩ ខែកក្កដា ឆ្នាំ២០១៨ ខាងមុខនេះ៕