វត្ថុអវកាសមកពីភពផ្កាយផ្សេង «Oumuamua» គ្រាន់ជាដុំអាចម៍ផ្កាយធម្មតាៗ មិនមែនយានអេលៀននោះទេ…!

(អង់គ្លេស)៖ អាចម៍​ផ្កាយ Oumuamua ដែលអ្នក​វិទ្យាសាស្ត្រមួយចំនួន កំពុងសិក្សាក្រោយ​មានចចាមអារ៉ាមថា វាជាយានអវកាសអេលៀន ជិះមកពីភព​ផ្កាយផ្សេង និងឆ្វែលប្រព័ន្ធ​ព្រះអាទិត្យ​យើង មិនធ្លាប់មាន​ពីមុនមកនោះ ត្រូវបានក្រុមអ្នកវិទ្យាសាស្ត្រ​អង់គ្លេស​អះអាងថា គ្រាន់តែជាអាចម៍​ផ្កាយ រាងដូចបារីមួយដើមប៉ុណ្ណោះ។ នេះបើតាម​ការចេញផ្សាយដោយ Telegraph នាល្ងាចថ្ងៃអង្គារ ទី១៩ ខែធ្នូ ឆ្នាំ២០១៧។

អាចម៍ផ្កាយ​ខាងលើនេះ ត្រូវបានអង្កេតដោយ​តេឡេស្កូប Pan-STARRS1 របស់សាកល​វិទ្យាល័យរដ្ឋ Hawaii តាំងតែពីថ្ងៃទី១៩ ខែតុលា​មកម្ល៉េះ ហើយជាអាចម៍ផ្កាយ​មកពីក្រៅប្រព័ន្ធ​ព្រះអាទិត្យដំបូងគេ ដែលយើងមិន​ដែលបានដឹងពីមុនមកឡើយ។ ដោយឡែក​ក្រុមការងាររបស់​អ្នកវិទ្យាសាស្ត្រដ៏ល្បីល្បាញ គឺលោក Stephen Hawking កាលពីសប្តាហ៍​មុននេះ ក៏បានធ្វើការ​សិក្សាបន្ថែមអំពី Oumuamua នោះផងដែរ។

ទោះបីជាបែបនេះក្តី ក្រុមអ្នកស្រាវជ្រាវ​នៃសាកលវិទ្យាសល័យ Queen ក្នុងតំបន់ Belfast ចក្រភពអង់គ្លេស បានអះអាងថា Oumuamua មានទំហំ និងរូបរាងប្រហាក់​ប្រហែលនឹង អគារ Gherkin ដ៏ស្កឹមស្កៃមួយ​នៅទីក្រុងឡុងដ៍។ មូលហេតុដែល​គេហ៊ានអះអាងថា វាគ្រាន់តែជា​អាចម៍ផ្កាយ​ធម្មតា មិនមែនជាយានអវកាសអ្វីនោះ ក៏ព្រោះតែការ​អង្កេតយ៉ាងដិតដល់​នាំឲ្យគេ​ឃើញ​កម្ទេចធូលី និងថ្មព័ទ្ធជុំវិញវត្ថុ​អវកាសនោះ ដែលវាគឺជាសញ្ញា​ធ​ម្មតានៃអាចម៍​ផ្កាយធំៗ។

គួររំលឹកថា សម្រាប់ការលើកឡើងកាលពីប៉ុន្មានថ្ងៃមុនវិញ ការ​អះអាងដែលថា Oumuamua ជាយានរបស់​អេលៀននោះ គឺជាគំនិតដ៏មាន​តម្លៃមួយ ទោះបីជាមនុស្ស​មួយចំនួនមាន​ការរិះគន់ថា ការគិត​ខាងលើនេះ​ហួសហេតុ​ពេក​ក៏ដោយ​ ប៉ុន្តែការសិក្សាស្រាវជ្រាវ​​ដោយ​សហគមន៍ នៃតារាសាស្ត្រ និង​វិទ្យាសាស្ត្រនានា នៅតែ​ប្រឹងប្រែង​ធ្វើការឲ្យអស់​លទ្ធភាព ដើម្បីស្រង់យកទិន្នន័យ​ដែលអាចទៅរួចណាមួយ​ ចេញពីវត្ថុដ៏ចម្លែក​នោះ ដូចជាវិទ្យាស្ថាន SETI នៅលើភ្នំមួយ នៃរដ្ឋកាលីហ្វរញ៉ា ដែលកំពុងប្រើប្រាស់តេឡេស្កូប Allen ដើម្បីទាញយកទិន្នន័យពី Oumuamua ដូច្នេះឯង។

សមាជិក​ក្រុម SETI បានបង្ហើបថា តាមការរយៈ​ការប្រើប្រាស់ឧបករណ៍​ចានផ្កាយរណប Green Bank មុខកាត់ ១០០ម៉ែត្រ ដោយចំណាយពេល​ជះរលក​សញ្ញាទៅលើ Oumuamua ចំនួន ០៦ម៉ោង ដោយទទួលបាន​ទិន្នន័យ ៩០ terabytes ក្នុងរយៈពេល ០២ម៉ោង ពីអាចម៍ផ្កាយ​ដែលមាន​ប្រវែង ៤០០ម៉ែត្រនោះ។

គួរបញ្ជាក់ថា ទោះបីជាគេទទួល​បានទិន្នន័យមួយ​ចំនួន​ហើយពី Oumuamua ក៏ដោយ ក៏គេត្រូវការពេល​វេលាបន្ថែម​ទៀត ដើម្បីធ្វើការវិភាគ​ទៅលើទិន្នន័យ​ទាំងអស់ ដែលទទួលបាន​ដោយ​ប្រយ័ត្នប្រយែង​បំផុត។ ចុះបងប្អូនវិញ​គិតថា វត្ថុអវកាសមកពីប្រព័ន្ធ​ផ្កាយផ្សេងដែល​មិនធ្លាប់មាន ប្រវែងរហូតដល់ជិត កន្លះគីឡូម៉ែត្រ ខាងលើនេះ គ្រាន់តែជាដុំថ្មអវកាស​​ធម្មតា ឬ? តើវាអាចជា​អ្វីផ្សេង​ក្រៅពីនេះ ឬទេ? ចម្លើយ គឺមានតែចាំការបកស្រាយ​របស់ ក្រុមអ្នក​វិទ្យាសាស្ត្រ ដែល​សង្ឃឹមថា នឹងចេញលទ្ធផល​ក្នុងពេលឆាប់ៗ…៕