រន្ធត់ណាស់! រថភ្លើងមួយខ្សែ «រអិលធ្លាក់ពីលើស្ពាន នៅរដ្ឋវ៉ាស៊ីនតោន» បណ្តាលឲ្យមនុស្ស ០៣នាក់ស្លាប់ និងជាង ២០នាក់របួស!

(អាមេរិក)៖ មនុស្សយ៉ាងតិច០៣នាក់ បានបាត់បង់ជីវិត និងជាង២០នាក់ផ្សេងទៀត បានទទួល​រងរបួស ​នៅពេលដែល​រថភ្លើង​​មួ​យខ្សែ បានក្រឡាច់ធ្លាក់ចេញ​ពីលើដែក-ស្ពាន ​នាយប់ថ្ងៃចន្ទម្សិលមិញ​នេះ ក្នុងការធ្វើដំណើរ​លើកដំបូង​របស់វា នៅលើផ្លូវ​ដែលទើប​ត្រូវដាក់ឲ្យ​ប្រើប្រាស់ថ្មី ក្នុងតំបន់ Pierce នៃរដ្ឋវ៉ាស៊ីន​តោន​ភាគខាងលិច សហរដ្ឋអាមេរិក។ នេះបើតាម​ការចេញ​ផ្សាយ​​ដោយ​ ទីភ្នាក់​ងារ​ព័ត៌​មាន​ចិន ស៊ីនហួរ នៅ​ព្រឹក​ថ្ងៃអង្គារ ទី១៩ ខែធ្នូ ឆ្នាំ២០១៧។
បើតាមប្រព័ន្ធ​ផ្សព្វផ្សាយក្នុងស្រុក​អាមេរិកផ្ទាល់ រថភ្លើង Amtrak 501 មានផ្ទុក​អ្នកដំណើរ​៧៧នាក់ និងក្រុមការងារលើ​រថភ្លើង​​​ចំនួន០៦នាក់ កំពុងធ្វើដំណើរ​ឆ្ពោះទៅកាន់​ភាគខាងត្បូង ដោយចេញពី​ទីក្រុង Seattle នៅពេលដែល​កំណាត់ទូរ​ចំនួន១៣ ក្នុង​ចំណោមទូរទាំង១៤ របស់វា ស្រាប់តែបាន​រអិលធ្លាក់ចេញ​ពីផ្លូវ នៅក្បែរក្រុង Tocoma ក្នុង​តំបន់ Pierce ហើយ​ទូរ​មួយ​ចំនួន​បាន​ធ្លាក់​​ចេញ​​ពី​លើស្ពាន​ផ្លូវដែកតែម្តង ទៅលើផ្លូវ​ហាយវ៉េ​ស្ថិតនៅពីក្រោម ដែលកំពុងមាន​ចរាចរណ៍យ៉ាង​មមាញឹក។

គួរជម្រាបថា បើតាមអាជ្ញាធរ​ក្នុងតំបន់កើតហេតុ វាជាការធ្វើប្រតិបត្តិការ​លើកទី១ របស់រថភ្លើងមួយខ្សែនេះ​ នៅលើ​ផ្លូវធ្វើ​ដំណើរ​ថ្មី ដោយផ្លូវដែកថ្មី​មួយខ្សែនេះ ទីបំផុតត្រូវបាន​សម្រេចដាក់ឲ្យប្រើប្រាស់​ជាសាធារណៈ បន្ទាប់ពីមានការ​ត្រួតពិនិត្យ និង​ធ្វើ​តេស្ត​អស់​រយៈពេល​ជាច្រើន​សប្តាហ៍៕