ទេសចរណ៍​អវកាស! តោះ​មក​ទស្សនា «រូបភាព​ប្លែក​ភ្នែក​ទាំង ៣ ប្រចាំ​សប្តាហ៍» ដែល​នាំ​ឲ្យ​អារម្មណ៍​ស្រស់ស្រាយ

(វា​ស៊ីន​តោន)៖ មកដល់​ទៀតហើយ​នូវ​រូបភាព​អវកាសពិសេសៗ ប្រចាំ​សប្តាហ៍ ដោយ​កម្រង​រូបភាព​ប្រចាំ​សប្តាហ៍​នេះ គឺ​ហាក់ដូចជា​ដំណើរ​ទេសចរណ៍​យ៉ាង​អស្ចារ្យ​មួយ នៅក្នុង​ចក្រ​វា​ឡ​ដ៏​ធំ​ល្វឹងល្វើយ​របស់​យើង​អ៊ីចឹង​ដែរ។ នេះ​បើតាម​ការចេញផ្សាយ​ដោយសារ​ព័ត៌មាន Wired នៅ​រសៀល​ថ្ងៃ​ចន្ទ ទី១៨ ខែធ្នូ ឆ្នាំ២០១៧។

១៖ យើង​នឹង​ចាប់ផ្តើម​ជាមួយ Cassiopeia A ដែលជា​បណ្តុំ​សំណល់ នៃ​ប​ន្ទុះ​ស៊ូ​ភើ​ណូ​វ៉ា (Supervona)។ នៅពេលដែល​ផ្កាយធំៗវា​ស្លាប់ទៅ ពួកវា​ផ្ទុះឡើង​ក្នុង​បាតុភូត​ដ៏​ខ្លាំង​អស្ចារ្យ​មួយ ដែល​គេ​ហៅថា Supernova។ ការបាត់​បង់ជីវិតរ​បស់​តារា​មួយ​ដួង ប្រហែលជា​ចំណាយពេល​ត្រឹម​ប៉ុន្មាន​រយ​វិនាទី​ប៉ុណ្ណោះ ប៉ុន្តែ​រូបធាតុ​ដែល​ពួកវា បញ្ចេញ​ទៅក្នុង​លំហ​អាកាស​វិញ អាច​ប្រាប់​អ្នកវិទ្យាសាស្ត្រ​បាន​យ៉ាងច្រើន អំពី​កំណរ​កំណើត​នៃ​ផ្កាយ។ តាមរយៈ​ការសិក្សា​ស្វែងយល់​ពី​សំណល់ Supernova ដូចជា Cassiopeia A នេះ ពួកយើង​អាច​យល់ដឹង​កាន់តែច្បាស់​ថែមទៀត អំពី​របៀប​ដែល​ធាតុ​នានា ត្រូវបាន​ពង្រាយ ឲ្យ​រាយប៉ាយ​ពាសពេញ​ចក្រ​វា​ឡ។

២៖ បន្ទាប់មកទៀត យើង​នឹងធ្វើ​ដំណើរ​ទៅកាន់​តំបន់​បង្កើត​ផ្កាយ​មួយកន្លែង (Nebula) មាន​ឈ្មោះថា Sharpless 29។ Nebula នេះ មាន​ផ្ទុក​ផ្កាយ​ដ៏​ក្មេងខ្ចី​មួយ​ដួង ពោលគឺ​ត្រឹម ០២លាន​ឆ្នាំ​ប៉ុណ្ណោះ។ កូន​ផ្កាយ​នេះ​គឺមាន​សកម្ម​ជាខ្លាំង និង​កំពុងតែ​បង្កើត​ប្រព័ន្ធ​របស់​វា​នៅក្នុង​បណ្តុំ​នៃ​ពពក​ធូលី​អវកាស Sharpless 29។

៣៖ ចុងក្រោយ យើង​ងាក​ត្រឡប់​មកកាន់​ប្រព័ន្ធ​ព្រះអាទិត្យ​របស់​យើង​វិញ។ នា​សប្តាហ៍​នេះ ទីភ្នាក់ងារ​អវកាស NASA បានផ្តល់​របស់​ដ៏​ពិសេស​មួយ ឲ្យ​ទស្សនិកជន​ដែល​ចូលចិត្ត​ផ្នែក​វិស័យ​អវកាស ស្តីពី​ភព​ឧស្ម័ន​យក្ស​ដ៏​ធំ ដែល​យើងទាំងអស់គ្នា​បាន​ស្គាល់ និង​ស្រឡាញ់​ចូលចិត្ត​នោះ​គឺ ភព​ព្រហស្បតិ៍ (Jupiter)។ តាមរយៈ​ការប្រើប្រាស់​ទិន្នន័យ​បាន​ពី​យានអវកាស Juno ក្រុម​អ្នកវិទ្យាសាស្ត្រ​បាន​បង្កើត​វីដេអូ​មួយ បង្ហាញ​ពី​ចំណុច​ភ្នែក​ក្រហម The Great Red Spot ដ៏​ល្បី​របស់ Jupiter ក្នុង​ចម្ងាយ​យ៉ាង​កៀក៕