ប្រជាជនកម្ពុជា បដិសេធដាច់ខាតចំពោះសកម្ម ភាពក្រុមអ្នកនយោបាយប្រឆាំងជ្រុលនិយមដែលព្យាយាមបំផ្លាញកម្ពុជាតាមរយៈបដិវត្តន៍ពណ៌

លោកនាយករដ្ឋមន្រ្តី ហ៊ុន សែន បានថ្លែងថា តាមរយៈលទ្ធផលនៃការបោះឆ្នោតកាលពីថ្ងៃទី២៩ ខែកក្កដា ឆ្នាំ២០១៨ បានបញ្ជាក់យ៉ាងច្បាស់ហើយថា ប្រជាជនកម្ពុជាកំពុងក្តាប់ក្នុងដៃនូវជោគវាសនាជាតិ មានភាពជឿជាក់ក្នុងការ អនុវត្តភាពជាម្ចាស់ប្រទេសដោយបដិសេធដាច់អហង្ការនូវសកម្មភាពរបស់ក្រុមអ្នក នយោបាយប្រឆាំងជ្រុលនិយម និងមជ្ឈដ្ឋានបរទេសនៅពីក្រោយខ្នងពួកនេះដែលនៅតែបន្តរកវិធីរាំងខ្ទប់ការអភិវឌ្ឍនៅកម្ពុជា និងរុញច្រានកម្ពុជាឱ្យឃ្លាតចេញពីមាគ៌ាប្រជាធិបតេយ្យ និងនីតិរដ្ឋតាមរយៈមធ្យោបាយបដិវត្តន៍ពណ៌។ លោកបានថ្លែងដូចនេះ នៅក្នុងពិធីអបអរសាទរដល់ខួបលើកទី៤០ឆ្នាំ នៃថ្ងៃជ័យជម្នះ ៧មករា (៧ មករា ១៩៧៩-៧ មករា ២០១៩) ដែលរៀបចំនៅពហុកីឡាដ្ឋានជាតិអូឡាំពិក នៅថ្ងៃទី៧ ខែមករា ឆ្នាំ២០១៩នេះ ដែលមានប្រជាជនចូលរួមប្រមាណជាង ៦ម៉ឺននាក់។ លោកនាយករដ្ឋមន្រ្តី ហ៊ុន សែន ក៏បានគូសបញ្ជាក់ថា តាមរយៈលទ្ធផលនៃការបោះឆ្នោត ក៏បានឆ្លុះបញ្ចាំងនូវទឹកចិត្តគាំទ្រយ៉ាងមុតមាំរបស់ប្រជាពលរដ្ឋកម្ពុជាភាគច្រើនលើសលប់លើភាពចាំបាច់ក្នុងការបន្តថែរក្សារាល់សមិទ្ធផលនៃសង្គមជាតិ និងការបន្តភារកិច្ចដឹកនាំកសាងកម្ពុជាលើមាគ៌ាសន្តិភាព ការអភិវឌ្ឍ និងការកែទម្រង់រដ្ឋគ្រប់វិស័យតទៅមុខទៀត៕