លោកនាយករដ្ឋមន្ត្រី ហ៊ុន សែន និងភរិយា នឹងអញ្ជើញសួរសុខទុក្ខនិងរៀបចំអាហារជូនកុមារពិការគ-ថ្លង់ និងកុមារកំព្រាជិត៩០០នាក់នៅសាលាគ្រួសារថ្មី

នៅថ្ងៃទី១៨ ខែវិច្ឆិកា ឆ្នាំ២០១៨ស្អែកនេះ លោក​នាយករដ្ឋមន្ត្រី ហ៊ុន សែន និងលោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នឹងអញ្ជើញសួរ​សុខទុក្ខ ព្រមទាំងរៀបចំអាហារជូនកុមារពិការគ-ថ្លង់ និងកុមារកំព្រាសរុប ៨៧៨នាក់ មកពីសាលាគ្រួសារថ្មី និងមណ្ឌលកុមារកំព្រានានាក្នុងរាជធានីភ្នំពេញ។ ពិធី​សួរ សុខទុក្ខ និងការរៀបចំអាហារជូនកុមារពិការគ-ថ្លង់ និងកុមារកំព្រានេះ នឹងធ្វើនៅអង្គការគ្រួសារថ្មី ស្ថិតក្នុងខណ្ឌសែនសុខ រាជធានីភ្នំពេញ។ សូមបញ្ជាក់ថា ជាទម្លាប់លោកនាយករដ្ឋមន្ត្រី​ ហ៊ុន សែន ​ និងភរិយា តែងចុះជួបកុមារពិការ និងគ-ថ្លង់ នៅអង្គការគ្រួសារថ្មី ក្នុងមួយឆ្នាំចំនួន ២លើក ដើម្បីសំណេះ​សំ ណាលផង និងទទួលទានអាហាររួមគ្នាផង។ លោក​នាយករដ្ឋមន្ត្រី ហ៊ុន សែន បានចូលរួមជួយអង្គការគ្រួសារថ្មីតាំងពីឆ្នាំ១៩៩៥ មកម្ល៉េះ។ ក្រៅពីការជួបជុំ​២លើកក្នុងមួយឆ្នាំ លោក និងក្រុមគ្រួសារតែងបានជួយ ឧបត្ថម្ភប្រចាំខែនូវអង្ករ និងថវិកាដើម្បីរួមចំណែកដល់ដំណើរការមណ្ឌលនេះផងដែរ។ លោកនាយករដ្ឋមន្ត្រី ហ៊ុន សែន ធ្លាប់បានលើកឡើងថា ពេលបានជួបជាមួយកុមារពិការ និងគ ថ្លង់ បានធ្វើឱ្យលោកមានអារម្មណ៍រីករាយផង និងអាណិតអាសូរផង ហើយក៏បានផ្តល់ឱកាសឱ្យលោកបានពិចារណារិះរកវិធីជួយដល់ជនពិការផងដែរ៕