រដ្ឋមន្រ្តី​ក្រសួង​មហាផ្ទៃ​ ប្រកាសតែងតាំង នឹងផ្លាស់ប្ដូរតំណែង អភិបាលខេត្តត្បូងឃ្មុំ

ត្បូង​ឃ្មុំ​៖​ នៅ​ថ្ងៃទី​១៥ ខែវិច្ឆិកា ឆ្នាំ២០១៨នេះ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានអញ្ជើញជាគណ:អធិបតី ក្នុងពិធីប្រកាសតែងតាំង នឹងផ្លាស់ប្ដូរតំណែង អភិបាលខេត្តត្បូងឃ្មុំ។ ក្នុងពិធីនេះដែរ ក៏មានការអញ្ជើញ ចូលរួមពី ថ្នាក់ដឹកនាំក្រសួងមហាផ្ទៃ ក្រុមប្រឹក្សាខេត្ត អភិបាលរងខេត្ត នឹងមន្ត្រីរាជការ កងកម្លាំងប្រដាប់អាវុធ យ៉ាងច្រើនកុះករដែរ។ លោក លី ឡេង អភិបាលខេត្តចាស់ ត្រូវបានតែងតាងទៅជាទីប្រឹក្សា និងជានាយកខុទ្ទកាល័យលោក ស៊ីម កា អនុប្រធានទី១នៃព្រឹទ្ធសភា មានឋានៈស្មើរដ្ឋមន្រ្តី ជំនួសដោយលោក ជាម ច័ន្ទសោភ័ណ អភិបាលរងខេត្ត ទៅជាអភិបាលខេត្តត្បូងឃ្មុំវិញ។ បន្ទាប់ពីលោក អ៊ួន ចន្ធី ប្រធានយកដ្ឋានបុគ្គលិក នៃអគ្គនាយកដ្ឋានរដ្ឋបាលក្រសួងមហាផ្ទៃ បានអានព្រះរាជក្រឹត្យ ស្ដីពីការតែងតាំងមន្ត្រីរាជការរួចមក លោក ជាម ច័ន្ទសោភ័ណ អភិបាលខេត្តថ្មីបាន ឡើងប្តេជ្ញាចិត្តដូចជា ៖ដឹកនាំខេត្តត្បូងឃ្មុំ ឱ្យបានរីកចម្រើនបន្ថែមទៀត អនុវត្តតាមគោលនយោបាយ កែទម្រង់ស៊ីជម្រៅរបស់រាជរដ្ឋាភិបាលកម្ពុជា និងប្តេជ្ញាសាមគ្គឺភាពផ្ទៃក្នុង ឱ្យបានរឹងមាំ និងខិតខំទប់ស្កាត់បាតុភាពអសកម្មនានា ដែលបង្កឱ្យប៉ះពាល់សន្តិសុខ និងបង្កថ្នាំងថ្នាក់ដល់ប្រជាពលរដ្ឋ យកចិត្តដាក់រៀបចំ កសាង និង អភិវឌ្ឍលើវិស័យនានា ក្នុងខេត្តជំរុញការអនុវត្តគោលនយោបាយ ភូមិ ឃុំ សុវត្ថិភាព អោយកាន់តែមានប្រសិទ្ធិភាពខ្ពស់ និងអនុវត្តគោលនយោបាយកំណែទម្រង់ស៊ីជម្រៅ ជាពិសេសគោលនយោបាយវិមជ្ឈការ និង វិសហមជ្ឈការ និងពង្រឹងថែរក្សាស្មារតីសាមគ្គី ឯកភាពផ្ទៃក្នុងគណៈអភិបាល មន្រ្តីរាជការ បង្កើតទំនាក់ទំនងល្អជាមួយ ក្រុមប្រឹក្សា រួមទាំងក្រសួង ស្ថាប័ន អង្គភាពពាក់ព័ន្ធ អង្គកាដៃគូអភិវឌ្ឍ ដើម្បីធានាឲ្យរដ្ឋបាលខេត្ត អនុវត្តការងារមានភាពរលូន។ ក្នុងឱកាសនោះ លោក ស ខេង បាន​កោត​សរសើរដល់ការដឹកនាំរបស់ លោក​ លី ឡេង ដែលបានបន្សល់ស្នាដៃជាច្រើន ដូចនេះ អ្នកមកដឹកនាំបន្តគឺ លោក​ ជាម ច័ន្ទសោភ័ណ្ឌ ត្រូវធ្វើបន្តមិនត្រូវលុបបំបាត់នោះទេ ។ ពិសេស ត្រូវជំរុញការអនុវត្តគោលនយោបាយ ភូមិ ឃុំ មានសុវត្ថិភាព ឱ្យឱ្យកាន់តែមានប្រសិទ្ធភាពខ្ពស់ ដេីម្បីបន្តរក្សាសន្តិសុខ សណ្តាប់ធ្នាប់សង្គម និងភាពសុខដុមនីយកម្មជូនប្រជាពលរដ្ឋឱ្យកាន់តែល្អប្រសើឡើងថែមទៀត ៕