កម្ពុជាប្រកាន់ខ្ជាប់នូវប្រព័ន្ធសេដ្ឋកិច្ចទីផ្សារសេរី និងគាំទ្រយ៉ាងពេញទំហឹងចំពោះប្រព័ន្ធពាណិជ្ជកម្មទ្វេភាគី និងពហុភាគី

នៅទីស្តីការក្រសួងពាណិជ្ជកម្ម​ នៅថ្ងៃទី២៩ ខែវិច្ឆិកា ឆ្នាំ២០១៨ នេះ​ លោក ប៉ាន សូរស័ក្តិ រដ្ឋមន្ត្រីក្រសួងពាណិ​ជ្ជកម្ម បានទទួលជួបពិភាក្សាទ្វេភាគីជាមួយ លោកស្រី Zuo Wenxing ភារៈធារីស្តីទី នៃស្ថានទូតប្រជាមានិតចិន ប្រចាំព្រះរាជាណាចក្រកម្ពុជា។ កិច្ចពិភាក្សាផ្តោតសំខាន់លើការពង្រឹងកិច្ចសហប្រតិបត្តិការពាណិជ្ជកម្មរវាងកម្ពុជា-ចិន និងការផ្លាស់ប្តូរទស្សនៈលើប្រព័ន្ធពាណិជ្ជកម្មសាកល សំដៅលើកកម្ពស់តួនាទីស្នូលរបស់អង្គការពាណិជ្ជកម្មពិភពលោក និងការធានាអត្ថប្រយោជន៍សម្រាប់សមាជិកអង្គការនេះ ជាពិសេសប្រទេសកំពុងអភិវឌ្ឍន៍ និងប្រទេសអភិវឌ្ឍន៍តិចតួច។ នៅក្នុងឱកាសនោះ លោករដ្ឋមន្ត្រីក៏បានសង្កត់ធ្ងន់ផងដែរថា រាជរដ្ឋាភិបាលកម្ពុជាតែងប្រកាន់យ៉ាងខ្ជាប់ខ្ជួននូវប្រព័ន្ធសេដ្ឋកិច្ចទីផ្សារសេរី និងគាំទ្រយ៉ាងពេញទំហឹងចំពោះប្រព័ន្ធពាណិជ្ជកម្មទ្វេភាគី និងពហុភាគី។ លើសពីនេះ កម្ពុជាតែងតែទទួលស្គាល់អំពីតួនាទី និងគុណតម្លៃរបស់អង្គការពាណិជ្ជកម្មពិភពលោកក្នុងការធានានូវបរិយាកាសពាណិជ្ជកម្មសាកល ដោយឈរលើគោល​ការណ៍បើកចំហរ តម្លាភាព និងបរិយាប័ន្ន (ការចូលរួមពីគ្រប់ភាគី)៕