ប្រជាជនតាមដងទន្លេសេកុង ខេត្តស្ទឹងត្រែងអាចប្រឈមនឹងការជម្លៀសចេញ ដោយសារការបាក់ទំនប់នៅប្រទេសឡាវ

យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម បានឲ្យដឹងថា នៅថ្ងៃទី២៤ ខែកក្កដា ឆ្នាំ២០១៨នេះ ថាទំនប់វារីអគ្គិសនី Se-Pian Se Nam Noi នៅក្នុងខេត្ត Attapeu ជិតព្រំដែនកម្ពុជា-ឡាវ បានបាក់ ដោយសារតែមិនអាចទ្រាំទ្រនូវចំនួនទឹកដ៏ច្រើន ហើយបានបណ្តាលឲ្យទឹកហូរចេញពីទំនប់ ហូរចូលទន្លេសេកុងយ៉ាងច្រើនជាគំហុក។ ក្នុងនោះក្រសួងធនធានទឹក និងឧតុនិយម ក៏បានណែនាំឲ្យស្ថាប័នពាក់ព័ន្ធ ត្រៀមលក្ខណៈជម្លៀសប្រជាពលរដ្ឋ ដែលរស់នៅតាមដងទន្លេសេកុង ពិសេសអាជ្ញាធរខេត្តស្ទឹងត្រែង ទៅរកទីទួលសុវត្ថិភាព ជៀសវាងកើតមានហេតុការណ៍ណាមួយកើតឡើង។ សូមបញ្ជាក់ផងដែរថា ទំនប់នេះមានសមត្ថភាពស្តុកទឹកបានរហូតដល់ទៅ ៥ពាន់លានម៉ែត្រគូប និងមានសមត្ថភាព ក្នុងការផលិតថាមពលអគ្គីសនី បានដល់ទៅ៤១០មេហ្គាវ៉ាត់ ហើយនៅពេលដែលមានការបាក់ទំនប់បែបនេះ ទឹកដែលហូរចេញពីទំនប់នោះ នឹងត្រូវហូរចូលមកក្នុងទន្លេសេកុងប្រទេសកម្ពុជាផងដែរ៕