លោកនាយករដ្ឋមន្រ្តី ហ៊ុន សែន៖ បុគ្គលបម្រើផលប្រយោជន៍ឱ្យជនបរទេសគឺជាជនក្បត់ជាតិ ខុសទៅនឹងពាក្យសម្បថនៅចំពោះព្រះភ័ក្រ្តព្រះមហាក្សត្រ

លោកនាយករដ្ឋមន្រ្តី ហ៊ុន សែន បានប្រកាសថា បុគ្គលណាក៏ដោយឱ្យតែបម្រើផលប្រយោជន៍ឱ្យជនបរទេសគឺជាជនក្បត់ជាតិ ខុសទៅនឹងពាក្យសម្បថ ដែលខ្លួនបានស្បថនៅចំពោះមុខព្រះមហាក្សត្រ ដែលមិនត្រូវទទួលយក ការបង្គាប់បញ្ជាពីខាងក្រៅចំពោះនយោបាយក្នុងនិងក្រៅប្រទេស។ លោកបានថ្លែងដូចនេះក្នុងពិធីសម្ពោធដាក់ឱ្យប្រើប្រាស់ស្ពានអាកាស មិត្តភាពកម្ពុជា-ចិនសែនសុខ នៅព្រឹកថ្ងៃទី២ ខែកក្កដា ឆ្នាំ២០១៨។ លោកនាយករដ្ឋមន្រ្តី ហ៊ុន សែន បានគូសបញ្ជាក់ថា លោកពុំមានកំហុសទេក្នុងការចាត់វិធានការណ៍ផ្លូវច្បាប់ចំពោះអ្នកដែលបានប្រព្រឹត្តអំពើក្បត់ជាតិកន្លងមក គឺដើម្បីការពារឯករាជ្យ អធិបតេយ្យភាពជាតិ ជាពិសេសគឺសុខសន្តិភាពសម្រាប់ប្រជាជាតិខ្មែរទាំងមូល៕