លោកនាយករដ្ឋមន្រ្តី ហ៊ុន សែន និង ឯកអគ្គរដ្ឋទូតចិន អញ្ជើញកាត់ខ្សែបូសម្ពោធស្ពានអាកាសកម្ពុជា-ចិន សែនសុខ

លោកនាយករដ្ឋមន្រ្តី ហ៊ុន សែន បានអញ្ជើញរួមគ្នាជាមួយ លោក ស្យង់ ព័រ ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា អញ្ជើញកាត់ខ្សែបូសម្ពោធដាក់ឱ្យប្រើប្រាស់ស្ពានអាកាស មិត្តភាពកម្ពុជា-ចិនសែនសុខ ហៅស្ពានអាកាសផ្សារដីហុយ ចាប់ពីព្រឹកថ្ងៃច័ន្ទទី២ ខែកក្កដា ឆ្នាំ២០១៨នេះតទៅ។ លោកនាយករដ្ឋមន្ត្រី ហ៊ុន សែន បានថ្លែងកោតសរសើរនិងថ្លែងអំណរគុណចំពោះសាធារណៈរដ្ឋប្រជាមានិតចិនដែលកន្លងមកតែងតែបានជួយមកដល់ប្រទេសកម្ពុជាលើវិស័យហេដ្ឋារចនាសម្ព័ន្ធនិងវិស័យផ្សេងៗដ៏ទៃទៀតជាច្រើន។ កម្ពុជា និងចិនមានប្រវត្តិទំនាក់ទំនងល្អជាមួយគ្នាជាយូរលង់ណាស់មកហើយ ហើយឆ្នាំនេះក៏ជាខួបទី៦០ឆ្នាំនៃទំនាក់ទំនងការទូតរវាងកម្ពុជា-ចិន ជាពិសេសនៅក្នុងជំនាន់រាជរដ្ឋាភិបាលដឹកនាំរបស់ សម្តេចព្រះបរមរតនៈកោដ្ឋ សម្តេចព្រះ នរោត្តម សីហនុ ដែលព្រះអង្គបានរក្សាទំនាក់ទំនងមេត្រីភាពនិងសហប្រតិបត្តិការល្អរហូតមកដល់បច្ចុប្បន្ននេះ។ តាមរយៈទំនាក់ទំនងទាំងអស់នេះគឺបានផ្តល់ផលប្រយោជន៍ឱ្យគ្នាទៅវិញទៅមកយ៉ាងច្រើន ជាពិសេស មិត្តចិនបានផ្តល់ជំនួយជាបន្តបន្ទាប់មកដល់កម្ពុជាក្នុងការកសាងសមិទ្ធផលនានា និងបច្ចុប្បន្នកម្ពុជាកំពុងទទួលភ្ញៀវទេសចរណ៍ពីប្រទេសចិនយ៉ាងច្រើនគឺប្រមាណ១លាន២សែននាក់៕