បញ្ជូន​បុរស​ម្នាក់​ដែល​បើកឡាន​បុក​គេ ហើយ​ដក​កាំភ្លើង​ភ្ជង់​សមត្ថកិច្ច មក​តុលាការ​

Credited: រស្មីកម្ពុជា : ភ្នំពេញ​: បុរស​ម្នាក់​មានមុខ​ងា​រ​ជា​អនុប្រធាននាយកដ្ឋាន ដែល​បាន​បង្ក​គ្រោះថ្នាក់​ចរាចរណ៍ និង​ដក​អាវុធខ្លី ភ្ជង់​គំរាម មកលើ​សមត្ថកិច្ច បាន​ត្រូវ​នគរបាល​ខណ្ឌចំការមន​បញ្ជូនមក​តុលាការ នៅ​ព្រឹក​ថ្ងៃទី​២៧ ខែមិថុនា ឆ្នាំ​២០១៨ ដើម្បី​ចាត់ការ​តាមច្បាប់​។​ ​រហូតមកដល់​រសៀល​ថ្ងៃ​ដដែល លោក កុល បុ​ន ព្រះរាជអាជ្ញារង​អម​សាលាដំបូង​រាជធានី​ភ្នំពេញ កំពុងធ្វើការ​សាកសួរ​។​ ​បុរស​រូបនេះ​ឈ្មោះ ម៉ៅ ច័ន្ទ​រស្មី អាយុ ៤១​ឆ្នាំ ស្នាក់​នៅផ្ទះ​លេខ ១៤​អ៊ឺ ផ្លូវ ២១៧ ភូមិ​ម័ល សង្កាត់​ដង្កោ ខណ្ឌដង្កោ រាជធានី​ភ្នំពេញ មុខរបរ​អនុប្រធាននាយកដ្ឋាន​ប​ច្ចេកទេស និង​អភិវឌ្ឍ​លំនៅដ្ឋាន នៃ​ក្រសួង​រៀបចំ​ដែនដី​នគរូបនីយកម្ម​និង​សំណង់​។​ ​សមត្ថកិច្ច​បានបញ្ជាក់​ថា កាលពី​ថ្ងៃទី​២៥ ខែមិថុនា ឆ្នាំ​២០១៨ វេលា​ម៉ោង​៥​និង​១០​ល្ងាច បុរស​ឈ្មោះ ម៉ៅ ច័ន្ទ​រស្មី បាន​បើករថយន្ដ​របស់ខ្លួន​ម៉ាក Toyota Higlander ពណ៌​ស ពាក់​ស្លាក​លេខ ភ្នំពេញ 2AF 9766 បុក​គូថ​រថយន្ត​មួយគ្រឿង​ផ្សេងទៀត​ម៉ាក Toyota Prius ពណ៌​ទឹកប្រាក់ ពាក់​ស្លាក​លេខ ភ្នំពេញ 2AT 1914 ដែល​បើកបរ​ដោយ​ឈ្មោះ ហ៊ុន សំសែ​ន​ឧ​ត្ត​ម ភេទ​ប្រុស អាយុ ៣៥​ឆ្នាំ ស្នាក់​នៅផ្ទះ​គ្មាន​លេខ ផ្លូវ​បេតុង ភូមិ​សន្សំ​កុសល សង្កាត់​បឹងទំពុន ខណ្ឌមានជ័យ រាជធានី​ភ្នំពេញ មុខរបរ បុគ្គលិក​ក្រុមហ៊ុន បណ្ដាលឱ្យ​រង​ការខូចខាត​បន្តិចបន្តួច តែ​ពេលនោះ ជនសង្ស័យ​ពុំបាន​ចុះ​ពីលើ​រថយន្ត​មក​ដោះស្រាយ​ទេ រួច​ដេកលក់​នៅក្នុង​រថយន្ដ​តែម្ដង​។​ ​បន្ទាប់មក​ក្រោយពី​ទទួលបាន​ព័ត៌មាន​នេះ សមត្ថកិច្ច​នគរបាល​ចរាចរណ៍​ខណ្ឌចំការមន បាន​ចុះ​ដល់​កន្លែងកើតហេតុ និង​ដោយមាន​សំណូមពរ​ពី​ខាង​ភាគី​ម្ខាង​ទៀត នគរបាល បាន​គោះ កញ្ចក់ រថយន្ត ជនបង្ក ស្រាប់តែ ជនបង្ក បាន​ដក​អាវុធខ្លី​មួយ​ដើម​ម៉ាក​Beretta ពណ៌​ទឹកប្រាក់ ភ្ជង់​មកលើ​សមត្ថកិច្ច​នគរ​បាល រួច​បើករថយន្ត​គេចខ្លួន​រហូតដល់​ផ្លូវ ១៦៣ ក្នុង​សង្កាត់​ទួល​ទំពូង​ទី ១ ខណ្ឌចំការមន រាជធានី​ភ្នំពេញ តែ​ត្រូវបាន​នគរបាល ដេញតាម​ស្ទាក់​ឃាត់​បាន ជនសង្ស័យ​រួម​នឹង​វត្ថុតាង​អាវុធខ្លី​មួយ​ដើម​ម៉ាក​ខាងលើ បញ្ជូន​មកកាន់​អធិការដ្ឋាន​នគរបាល​ខណ្ឌចំការមន ដើម្បី​ធ្វើការ​សាកសួរ និង​ចាត់ការ​តាម​នីតិវិធី​៕