នាយឧត្តមសេនីយ៍ ជួន សុវណ្ណ ស្នើឲ្យអធិការទាំង១២ខណ្ឌ ជួយណែនាំអ្នកសារព័ត៌មានកុំផ្សាយផ្ទាល់ ពីជនសង្ស័យដែលសមត្ថកិច្ចចាប់បានភ្លាមៗ ដើម្បីរក្សាកិត្តិយសមុនរកឃើញបទល្មើស

Credited: Fresh News (ភ្នំពេញ)៖ នាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានទទូចស្នើសុំឲ្យអធិការទាំង១២ខណ្ឌ ជួយណែនាំអ្នកសារព័ត៌មានកុំផ្សាយផ្ទាល់ (Live) តាមបណ្ដាញសង្គម Facebook ទៅលើជនសង្ស័យដែលកម្លាំងនគរបាលបានបង្ក្រាបបានភ្លាមៗ ព្រោះថាក្នុងគោលបំណងរក្សាកិត្តិយសជនសង្ស័យ មុនរកឃើញបទល្មើសណាមួយ។ បើតាមនាយឧត្តមសេនីយ៍ ជួន សុវណ្ណ ជនសង្ស័យដែលកម្លាំងនគរបាលបង្ក្រាបបាន មិនទាន់ក្លាយជាទណ្ឌិតនោះទេ ដូច្នេះកិត្តិយស និងសេចក្ដីថ្លៃថ្នូររបស់ពួកគេនៅតែមាន ហើយមួយវិញទៀត ករណីខ្លះអាចគ្រាន់តែជាការយល់ច្រឡំតែប៉ុណ្ណោះ។ តាមរយៈសារសំឡេងដែលផ្ញើជូនអធិការទាំង១២ខណ្ឌ នាយឧត្តមសេនីយ៍បានថ្លែងយ៉ាងដូច្នេះថា «ការដែលក្រុមអ្នកសារព័ត៌មាន ចូល Live ជាមួយជនល្មើសដែលយើងឃាត់ខ្លួនបានខ្ញុំគិតថាជាប្រការមិនត្រឹមត្រូវទេ គួរលោកអធិមារខណ្ឌទាំង១២ ពិនិត្យលើការងារជំនាញយើងឡើងវិញ ហើហជនសង្ស័យដែលយើងឃាត់ខ្លួនបានមិនទាន់ក្លាយជាទណ្ឌិតនោះទេ»។ នៅល្ងាចថ្ងៃទី០៥ ខែឧសភា ឆ្នាំ២០១៨នេះ តាមរយៈអង្គភាព Fresh News នាយឧត្តមសេនីយ៍ ជួន សុវណ្ណ បានសំណូមពរដល់សារព័ត៌មានមួយចំនួន ដែលបានដកស្រង់ខ្លឹមសារសម្ដីរបស់លោកខុស រហូតសរសេរថា បញ្ជាឲ្យទប់ស្កាត់អ្នកកាសែត ហើយបើនៅតែបន្ដសកម្មភាព ត្រូវឃាត់ខ្លួនអ្នកកាសែត តែនាយឧត្តមសេនីយ៍មិនបានសំដៅយ៉ាងដូច្នេះទេ គឺគ្រាន់តែចង់រក្សាកិត្តិយសរបស់ជនសង្ស័យតែប៉ុណ្ណោះ។ សូមជម្រាបថា ការទទូចស្នើ ក៏ដូចជាសំណូមពរទៅអធិការទាំង១២ខណ្ឌនេះ ក្រោយពីមានហេតុការណ៍កើតឡើងនៅខណ្ឌច្បារអំពៅ ដោយអ្នកសារព័ត៌មានបានចូលទៅផ្សាយផ្ទាល់។ នាយឧត្តមសេនីយ៍ ជួន សុវណ្ណ បានលើកជាឧទាហរណ៍ថា ជនសង្ស័យជាមេក្លោងជួញដូរគ្រឿងញៀន តែពេលមិត្តភ័ក្រទៅជួបញាំអីជុំគ្នាស្រាប់តែកម្លាំងនគរបាលចុះទៅចាប់ ហើយអ្នកសារព័ត៌មានចូលផ្សាយផ្ទាល់ អាចធ្វើឲ្យប៉ះពាល់កិត្តិយសជនដែលមិនពាក់ព័ន្ធ ក្រោយមិនទាន់រកឃើញបទល្មើស៕