Home ព័ត៍មានជាតិ សម្ដេចក្រឡាហោម: “ក្រសួងមហាផ្ទៃកំពុងពិនិត្យមើលទិដ្ឋភាពច្បាប់ ចំពោះអ្នកដែលអំពាវនាវកុំឲ្យប្រជាពលរដ្ឋទៅបោះឆ្នោត”

Wednesday, May 23, 2018

សម្ដេចក្រឡាហោម: “ក្រសួងមហាផ្ទៃកំពុងពិនិត្យមើលទិដ្ឋភាពច្បាប់ ចំពោះអ្នកដែលអំពាវនាវកុំឲ្យប្រជាពលរដ្ឋទៅបោះឆ្នោត”

Voice Of Countryside ព័ត៍មានជាតិ May 23, 2018

Credited: រស្មីកម្ពុជា ភ្នំពេញ: សម្តេចក្រឡាហោម ស ខេង ឧបនាយករដ្ឋមមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ប្រាប់រស្មីកម្ពុជា កាលពីព្រឹកថ្ងៃទី២២ ខែឧសភា ថា ក្រសួងមហាផ្ទៃកំពុងតែពិនិត្យមើលទិដ្ឋភាពច្បាប់ ចំពោះអ្នកដែលអំពាវនាវឲ្យប្រជាពលរដ្ឋធ្វើពហិកាក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨។ ការថ្លែងបញ្ជាក់របស់សម្តេចក្រឡាហោម ស ខេង បានធ្វើឡើងបន្ទាប់ពីបញ្ចប់ពិធីផ្សព្វផ្សាយរបាយការណ៍បូកសរុបលទ្ធផលការងារប្រយុទ្ធប្រឆាំងអំពើជួញដូរមនុស្សឆ្នាំ២០១៧ និងទិសដៅអនុវត្តឆ្នាំ២០១៨ នៅទីស្តីការក្រសួងមហាផ្ទៃ។ សម្តេចក្រឡាហោម ស ខេង បានមានប្រសាសន៍ថា ទាក់ទងការស្នើរបស់ប្រធានគណៈកម្មាធិការជាតិរៀបបចំការបោះឆ្នោត ស្នើសុំឲ្យមានវិធានការផ្លូវច្បាប់ ចំពោះការអំពាវនាវឲ្យប្រជាពលរដ្ឋធ្វើពហិកាក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ គឺខាងជំនាញមិនទាន់ឲ្យមកសម្តេចនៅឡើយទេ។ មើលនៅក្នុងច្បាប់បោះឆ្នោត មាននិយាយអំពីទោសទណ្ឌ ដែលរារាំងប្រជាពលរដ្ឋមិនឲ្យទៅបោះឆ្នោត។ “ជំនាញមិនទាន់ឲ្យខ្ញុំទេ យើងមើលនៅត្រង់ច្បាប់បោះឆ្នោតគេមាននិយាយអាហ្នឹង គេមាននិយាយពីទោសទណ្ឌអ្នកដែលរារាំងប្រជាពលរដ្ឋមិនឲ្យទៅបោះឆ្នោត”។ ទាក់ទងសំណួរអ្នកកាសែតសួរអំពីអតីតគណបក្សសង្គ្រោះជាតិ អំពាវនាវកុំឲ្យប្រជាពលរដ្ឋទៅបោះឆ្នោត ត្រូវបានសម្តេចក្រឡាហោម ស ខេង បញ្ជាក់ថា គណបក្សសង្គ្រោះជាតិ ជាគណបក្សមួយដែលច្បាប់បានរំលាយហើយ ក្រសួងនឹងពិនិត្យមើលទិដ្ឋភាពយ៉ាងណា ដើម្បីឲ្យសមស្រប ព្រោះមិនអាចថា ទៅប្តឹងគណបក្សសង្គ្រោះជាតិ ប្តឹងយ៉ាងម៉េចបើគណបក្សនឹងរំលាយហើយ។ “ខ្ញុំគិតថា គណបក្សសង្គ្រោះជាតិ ជាគណបក្សមួយដែលច្បាប់បានរំលាយហើយ អីចឹងហើយយើងនឹងពិនិត្យមើលទិដ្ឋភាពយ៉ាងណាដើម្បីឲ្យសមស្រប មិនអាចថា ទៅប្តឹងគណបក្សសង្គ្រោះជាតិ ប្តឹងម៉េចបើគណបក្សនឹងររំលាយហើយ”។ យោងតាមច្បាប់បោះឆ្នោតត្រង់មាត្រា១៤២ បានចែងថា ត្រូវផាកពិន័យជាប្រាក់៥លានរៀល ទៅ២០លានរៀល ដោយគណៈកម្មាធិការជាតិរៀបចំការបោះឆ្នោត ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណាដែលតាមគ្រប់មធ្យោបាយទុច្ចរិត៖ រារាំងប្រជាពលរដ្ឋដែលមានសិទ្ធិទៅបោះឆ្នោតទៅចុះឈ្មោះបោះឆ្នោត ឬរារាំងមិនឲ្យចុះឈ្មោះប្រជាពលលរដ្ឋ ដែលមានសិទ្ធិបោះឆ្នោតក្នុងបញ្ជីបោះឆ្នោត និងសៀវភៅបញ្ជីបោះឆ្នោត។ រារាំងប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត…។ លោកស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី៨ ខែឧសភា ឆ្នាំ២០១៨ បានដាក់លិខិតស្នើសុំឲ្យសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានវិធានការផ្លូវច្បាប់ចំពោះការអំពាវនាវឲ្យប្រជាពលរដ្ឋធ្វើពហិការក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨។ នៅក្នុងលិខិត លោកស៊ិក ប៊ុនហុក ប្រធានគ.ជ.ប បានជម្រាបជូនរដ្ឋមន្ត្រីក្រសួងមហាផ្ទៃថា នាពេលថ្មីៗនេះ មានការអំពាវនាវក៏ដូចជាជម្រុញឲ្យមានការចែកខិតប័ណ្ណ ដើម្បីឲ្យប្រជាពលរដ្ឋធ្វើពហិកាក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ដោយចាត់ទុកថា ការបោះឆ្នោតនេះ ជាការបោះឆ្នោតក្លែងក្លាយ។ គ.ជ.ប ចាត់ទុកថា ការអំពាវនាវឲ្យប្រជាពលរដ្ឋធ្វើពហិកាក្នុងការបោះឆ្នោត គឺជាសកម្មភាពរារងាំប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត និងធ្វើឲ្យមានការភ័ន្តច្រឡំននាំឲ្យបាត់ទំនុកចិត្តលើការបោះឆ្នោត ដែលធ្វើឲ្យប៉ះពាល់ដល់សណ្តាប់ធ្នាប់សាធារណៈ និងដល់សន្តិសុខជាតិ ដូចមានចែងក្នុងមាត្រា៤១ នៃរដ្ឋធម្មនុញ្ញ នៃព្រះរាជាណាចក្រកម្ពុជា។ ទាក់ទងការអំពាវនាវរបស់លោកសម រង្ស៊ី មិនឲ្យប្រជាពលរដ្ឋទៅបោះឆ្នោត ត្រូវបានលោក ហង្ស ពុទ្ធា អ្នកនាំពាក្យ គ.ជ.ប បានថ្លែងបញ្ជាក់នៅក្នុងសន្និសីទកាសែតកាលពីព្រឹកថ្ងៃទី១៧ ខែឧសភា ថា ការឃោសនាមិនឲ្យប្រជាពលរដ្ឋទៅបោះឆ្នោត គឺជាការឃោសនាតាមរបៀបបំបែកបំបាក់ជាតិ ឬក៏ការឃោសនាផ្សព្វផ្សាយណាមួយដែលបង្ហាញអំពីភាពផ្តាច់មុខខាងនយោបាយថា ទាល់តែមានគណបក្សនេះ បានអាចបោះឆ្នោតបាន ទាល់តែមានគណបក្សនោះបានអាចបោះឆ្នោតបាន នេះគឺជាទង្វើផ្ទុយច្បាប់ ដើរច្រាស់ជាមួយនឹងច្បាប់ ដើរច្រាស់ជាមួយចរន្តសង្គម ដែលគណបក្សនយោបាយចំនួន២០ ជឿជាក់លើការបោះឆ្នោតបានចុះឈ្មោះ ហើយប្រជាពលរដ្ឋជាង៨០ភាគរយ បានត្រៀមលក្ខណៈនៅក្នុងការបោះឆ្នោត នេះគឺជាភាពផ្តាច់មុខមួយដែលមិនមែនជាធាតុពិតនៃលទ្ធិប្រជាធិបតេយ្យ ដែលសកលលោកចង់បាននោះទេ។ លទ្ធិប្រជាធិបតេយ្យ គឺមិនមានភាពផ្តាច់មុខខាងគណបក្សនយោបាយណាមួយទេ។ អ្នកនាំពាក្យគ.ជ.ប បានបញ្ជាក់ថា “ចាត់វិធានការបែបណា ក្រសួងមហាផ្ទៃ និងគ.ជ.ប កំពុងតែសិក្សាផ្លូវច្បាប់។ យើងក៏ចង់ទប់ស្កាត់ឲ្យមានប្រសិទ្ធភាពដែរ។ ប៉ុន្តែសម្រាប់គ.ជ.ប ធាតុពិតទៅមិនចង់មានថា ឲ្យតែមានការបោះឆ្នោត មានការដាក់ទោសទណ្ឌដល់អ្នកនេះ ដល់អ្នកនោះ ពីព្រោះតែរឿងបោះឆ្នោតទេ។ គ.ជ.ប មានបេះដូងទូលាយ ប៉ុន្តែអ្វីដែលធ្វើឡើងដោយមធ្យោបាយទុច្ចរិតផ្សេងៗ គ.ជ.ប ក៏ត្រូវតែមានការចាត់ចែងរៀបចំ ហើយអនុវត្តឲ្យបានត្រឹមត្រូវផងដែរ។ ក្នុងនោះការសហការជាមួយក្រសួងមហាផ្ទៃ គឺជាសកម្មភាពសំខាន់ររបស់យើង”។ ចំណែកលោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថា ក្រសួងមហាផ្ទៃរីករាយនឹងផ្តល់កិច្ចសហប្រតិបត្តិការយ៉ាងពេញលេញ ជាមួយនឹងគណៈកម្មាធិការជាតិរៀបចំការបោះឆ្នោត និងជាកិច្ចសហប្រតិបត្តិការមួយប្រកបដោយប្រសិទ្ធភាព ទាន់ពេលវេលា។ ប៉ុន្តែក្រសួងមហាផ្ទៃមានវិធានការអប់រំ គឺកុំឲ្យធ្វើសកម្មភាពណា ឬទប់ស្កាត់សិទ្ធិបោះឆ្នោតរបស់ប្រជាពលរដ្ឋ។ ហើយក្នុងករណីធ្វើសកម្មភាពអ្វីផ្សេងទើប យើងធ្វើវិធានការផ្លូវច្បាប់។ សូមជម្រាបថា ការស្នើឲ្យមានវិធានការច្បាប់នេះ គឺបន្ទាប់ពលោកសម រង្ស៊ី មេដឹកនាំចលនាសង្គ្រោះជាតិ និងជាអតីតប្រធានអតីតគណបក្សសង្គ្រោះជាតិ បានធ្វើការអំពាវនាវឲ្យប្រជាពលរដ្ឋកុំទៅបោះឆ្នោត និងគ្រោងបោះខិតប័ណ្ណចែកប្រជាពលរដ្ឋកុំឲ្យទៅចូលរួមបោះឆ្នោតនៅថ្ងៃទី ២៩ ខែកក្កដា ឆ្នាំ២០១៨ ខាងមុខនេះដែមទៀតផង៕

សម្ដេចក្រឡាហោម: “ក្រសួងមហាផ្ទៃកំពុងពិនិត្យមើលទិដ្ឋភាពច្បាប់ ចំពោះអ្នកដែលអំពាវនាវកុំឲ្យប្រជាពលរដ្ឋទៅបោះឆ្នោត” Voice Of Countryside 2018-05-23T06:18:00+07:00 5.0 stars based on 35 reviews Credited: រស្មីកម្ពុជា ភ្នំពេញ: សម្តេចក្រឡាហោម ស ខេង ឧបនាយករដ្ឋមមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ប្រាប់រស្មីកម្ពុជា កាលព...