ជាង​ជួសជុល​រថយន្ត ក្រឡុក​ស៊ីម៉ង់​ត៍ម្នាក់ ស្លាប់​ដោយ​កាប៊ីន​ឡាន សង្កត់​លើ

Credited: រស្មីកម្ពុជា ​បាត់ដំបងៈ​បុរស​ម្នាក់ ជាជាង​ជួសជុល​រថយន្ត​ក្រឡុក​ស៊ីម៉ង់ត៍ បាន​ស្លាប់​ភ្លាមៗ ដោយ​កាប៊ីន​ឡាន​សង្កត់​លើ​។ ហេតុការណ៍​នេះ កើតឡើង កាលពី​ថ្ងៃទី​២២​ខែឧសភា​ឆ្នាំ​២០១៨ ចន្លោះ​ពី​ម៉ោង​១១:៣០ ទៅ​ម៉ោង ១:៣០ នាទី រសៀល នៅ​ភូមិ​ចំការ​ឫស្សី សង្កាត់​ព្រែក​ព្រះស្ដេច ក្រុង​បាត់ដំបង ខេត្តបាត់ដំបង​។​ ​លោក​អាត់ រី មន្ត្រីប៉ូលិស​ផ្នែក​បច្ចេកទេស​ក្រុង​បាត់ដំបង បាន​ឳ្យ​ដឹងថា ជនរងគ្រោះ ឈ្មោះ ពឿ​ន មុន្នី ភេទ​ប្រុស អាយុ ៣៩ ឆ្នាំ នៅ​ភូមិ​ជ្រៃ​កោង សង្កាត់​ស្លា​កែ​ត ក្រុង​.​ខេត្តបាត់ដំបង​។​ ​លោក ដាំ មករា នាយរង​ការិយាល័យ​ព្រហ្មទណ្ឌ កម្រិតធ្ងន់​ខេត្ត បាន​បញ្ជាក់ថា មូលហេតុ ដោយសារ​ការធ្វេសប្រហែស ព្រោះ​ជនរងគ្រោះ បាន​ឡើងទៅ​ជួសជុល​ម៉ាស៊ីន រថយន្ត​ក្រឡុក​ស៊ីម៉ង់ត៍ ហើយ​កាប៊ីន​ឡាន ធ្លាក់​សង្កត់​លើ បណ្តាល​ឳ្យ​ស្លាប់​។​ ​ ​តាម​ការបញ្ជាក់​របស់​ឈ្មោះ ព្រេ​ម ច​ន្ធី ភេទ​ប្រុស អាយុ​៣៦​ឆ្នាំ ដែល​ត្រូវជា ជាង​ជួសជុល​រថយន្ត​ដែរ បាន​បញ្ជាក់ថា នៅ​ថ្ងៃទី​២២ ខែឧសភា ឆ្នាំ​២០១៨ ម៉ោង ១១:១០ នាទី​ព្រឹក ខ្លួន​បាន​ចេញទៅ​ហូបបាយ​។ រហូតដល់​ម៉ោង ១:១០ នាទី រសៀល ខ្លួន​ត្រឡប់មក​រោង​ជាង​ធ្វើការ​វិញ ហើយ​បាន​ដើរទៅ​មើល​រថយន្ត ដែល​ជួសជុល ស្រាប់តែ​ឃើញ​ក្រណាត់​អាវ នៅលើ​ម៉ាស៊ីន​ពីក្រោម​កាប៊ីន​ឡាន ខ្លួន​ក៏​ឈ្ងោក​មើល ឃើញ​ឈ្មោះ​មុន្នី ត្រូវ​កាប៊ីន​ឡាន​សង្កត់ពីលើ ស្លាប់ ហើយ​ខ្លួន ក៏បាន​ស្រែកប្រាប់​គ្នា ឳ្យ​មកជួយ​តែម្ដងទៅ​។​ ​ក្រោយ​ធ្វើ​កោសល្យវិច័យ​រួច សមត្ថកិច្ច​ជំនាញ បាន​អះអាងថា ករណីនេះ ជនរងគ្រោះ បាន​ស្លាប់​ដោយសារ​កាប៊ីន​ក្បាល​រថយន្ត​សង្កត់​លោះ បណ្ដាល​ឱ្យស្លាប់​ពិតប្រាកដ​មែន ហើយ​បន្ទាប់ សមត្ថកិច្ច ក៏បាន​ប្រគល់​សព ឱ្យទៅ​ឈ្មោះ ជិន ផល ភេទ​ស្រី អាយុ​២៨​ឆ្នាំ ដែល​ត្រូវជា​ប្រពន្ធ យកទៅ​ធ្វើបុណ្យ នៅ​លំនៅដ្ឋាន​៕