លោក សុខ ឥសាន៖ មេដឹកនាំនិងអតីតៈបក្សប្រឆាំងមិនមែនតំណាងឲ្យលទ្ធិប្រជាធិបតេយ្យទេ

នៅថ្ងៃទី១៩ ខែឧសភា ឆ្នាំ២០១៨នេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងថា ការមានមតិបង្គាប់បញ្ជាររបស់ជនបរទេសមួយចំនួនតូច ចង់ឲ្យដោះលែងមេបក្សប្រឆាំងក្បត់ជាតិ និងឲ្យអតីតៈបក្សប្រឆាំងដែលត្រូវរំលាយ ចូលរួមបោះឆ្នោត ទើបកម្ពុជាមានលទ្ធិប្រជាធិបតេយ្យនោះ ជាការមិនត្រឹមត្រូវទាល់តែសោះ។ លោកក៏បានចោទសួរថា អតីតៈបក្សប្រឆាំងនិងមេបក្សប្រឆាំង ដែលតែងតែបង្ករបញ្ហាស្មុគ្រស្មាញគ្រោះថ្នាក់ដល់ប្រទេសជាតិ មិនចេះ ចប់ បែរជាឲ្យពិន្ទុថាជាតំណាងលទ្ធិប្រជាធិបតេយ្យឲ្យប្រទេសទាំងមូល? ឯរាជរដ្ឋាភិបាលកម្ពុជាស្របច្បាប់ដែលអនុវត្តគោលការណ៏លទ្ធិប្រជាធិបតេយ្យ និងនីតិរដ្ឋ បែរជាត្រូវពួកគេទម្លាក់ពិន្ទុមកនៅឋានៈជាអ្នកបំផ្លាញលទ្ធិប្រជាធិបតេយ្យទៅវិញ។ តើដែលមានទេ នៅលើលោកយើងនេះ? អ្នកនាំពាក្យរូបនេះ បានបន្តថា វាមិនជាការចម្លែកទេ នៅលើលោកនេះ ដែលតែងតែមាននិន្នាកាបដិបក្ខ២ ផ្ទុយគ្នា ក្នុងការប្រកួតប្រជែងមនោគមន៏វិជ្ជាពិភពលោក តែងតែមានការសន្និដ្ឋានខុសគ្នាដូចេ្នះហើយ? លោក សុខ ឥសាន បានគូសបញ្ជាក់ថា តែទោះជាយ៉ាងណា មេបក្ស និងអតីតៈបក្សប្រឆាំង មិនមែនជាតំណាងលទ្ធិប្រជាធិបតេយ្យ ជំនួសមុខប្រជាជនកម្ពុជា ដែលជាម្ចាស់លទ្ធិប្រជាធិបតេយ្យនៅកម្ពុជា ឡើយ។ ដូច្នេះ ទោះជាមានការទាមទារយ៉ាងណា ក៏មិនបានផលអ្វីដែរ៕