លោកនាយករដ្ឋមន្រ្តី ហ៊ុន សែន អញ្ជើញជួបសំណេះសំណាល និងប្រារព្ឋខួបអនុស្សាវរីយ៍លើកទី ១៣២ ទិវាពលកម្មអន្តរជាតិ ១ ឧសភា ជាមួយបងប្អូនកូនក្មួយកម្មករ៤,៣៥០នាក់

នៅថ្ងៃ អាទិត្យ៨កើត ខែពិសាខ ឆ្នាំច សំរឹទ្ធិស័ក ព.ស ២៥៦១ ត្រូវនឹងថ្ងៃទី២២ ខែមេសា ឆ្នាំ២០១៨នេះ លោកនាយករដ្ឋមន្រ្តី ហ៊ុន សែន បានអញ្ជើញជួបសំណេះសំណាលជាមួយ សហជីពកម្មករ ចំនួន ៤,៣៥០នាក់ នៅសាលមហោស្រព កោះពេជ្រ រាជធានីភ្នំពេញ។ ការជួបជុំសំណេះសំណាលនាព្រឹកនេះ គឺជាការស្វែងយល់ពីសុខទុក្ខ សកម្មជនសហជីព សាខាគណបក្សតាមរោងចក្រ សមាគមបុគ្គលិកសិក្សា និងបងប្អូនតំណាងកម្មករទូទាំងប្រទេសផងនិងប្រារព្ធខួបអនុស្សាវរីយ៍លើកទី១៣២ ទិវាពលកម្ម អន្តរជាតិ ១ឧសភា ផងដែរ។ លោកនាយករដ្ឋមន្រ្តី ហ៊ុន សែន សប្បាយរីករាយក្រៃលែងដែលបានអញ្ជើញមកជួបសំណេះសំណាលជាមួយសហជីពកម្មករ ក៏ដូចជាការអបអរសាទរ ទិវាពលកម្មអន្តរជាតិ ១ឧសភា ដែលកម្ពុជាប្រារព្ធ ធ្វើឡើងជារៀងរាល់ឆ្នាំដើម្បីលើកទឹកចិត្ត និងគាំទ្រចំពោះការខិតខំប្រឹងប្រែងរបស់កម្មករកម្មការនីយើង។ លោកនាយករដ្ឋមន្រ្តី ហ៊ុន សែន បានវាយតំលៃខ្ពស់ចំពោះការរីកចម្រើន និងអភវិឌ្ឍន៍របស់ប្រទេសកម្ពុជា ក្នុងរយៈពេលជាង២ទសវត្សចុងក្រោយនេះ។ អ្វីដែលយើងសម្រេចបានទាំងអស់នេះ គឺដោយសារតែកម្ពុជារក្សាបាននូវសន្តិភាព ស្ថិរភាពនយោបាយ និងសណ្តាប់ធ្នាប់សង្គម ក្រោមការដឹកនាំរបស់គណបក្សប្រជាជនកម្ពុជា។ លោកនាយករដ្ឋមន្រ្តី ហ៊ុន សែន បានមានប្រសាសន៍បញ្ជាក់ផងដែរថា សព្វថ្ងៃនេះវិស័យឧស្សាហកម្ម និងវិស័យកសិកម្មគឺបានចូលរួមយ៉ាងសំខាន់ក្នុងការជំរុញកំណើនសេដ្ឋកិច្ចជាតិឲ្យមានការរីកចម្រើន។ បរិយាកាសការងារល្អនៅតាមបណ្តារោងចក្រនានាគឺបានជួយជំរុញដល់លើកកម្ពស់គុណភាពវិស័យឧស្សាហកម្មផងដែរ។ នៅថ្ងៃនេះ លោកនាយករដ្ឋមន្រ្តី ហ៊ុន សែន បានកោតសរសើរ និងថ្លែងអំណរគុណចំពោះសេវាឡានក្រុង របស់សាលារាជធានីភ្នំពេញដែលបានដឹកជញ្ជូនបងប្អូនប្រជាពលរដ្ឋ កម្មករកម្មការនី ទៅស្រុកកំណើត ក្នុងកំឡុងពេលបុណ្យចូលឆ្នាំថ្មីប្រពៃណីជាតិខ្មែរក្នុងពេលថ្មីៗនេះដែលមានបងប្អូនកូនក្មួយធ្វើដំណើរប្រមាណជាង ៨,៨៣៥នាក់ និងពេលត្រលប់វិញមកវិញមានអ្នកដំណើរប្រមាណ ៥,២៤២នាក់ ដោយមានអ្នកខ្លះមិនទាន់ត្រឡប់មកវិញនៅឡើយ។ ជាមួយគ្នានោះផងដែរ លោកនាយករដ្ឋមន្រ្តី ហ៊ុន សែន បានថ្លែងអំណរគុណចំពោះ ក្រុមហ៊ុនឡាដឹកជញ្ជូនរបស់ក្រុមហ៊ុនស្រាបៀរ Ganzberg ដែលបានផ្តល់ឡានក្រុងដឹកជញ្ជូនបងប្អូន ប្រជាពលរដ្ឋទៅស្រុកកំណើតក្នុងឱកាសបុណ្យចូលឆ្នាំថ្មី។ ជាថ្មីម្តងទៀត លោកនាយករដ្ឋមន្រ្តី ហ៊ុន សែន ក៏បានប្រកាសផងដែរថា សម្រាប់បុណ្យភ្ជុំបិណ្ឌខាងមុខនេះ គឺសាលារាជធានីភ្នំពេញនឹងត្រៀមឡានក្រុងប្រមាណ ២០០ ឡានដើម្បីផ្តល់ការដឹកជញ្ជូនដល់បងប្អូនកូនក្មួយកម្ម ដោយមិនយកលុយ ដើម្បីជួយកាត់បន្ថយការចំណាយនានារបស់កូនក្មួយកម្មករ។ លោកនាយករដ្ឋមន្រ្តី ហ៊ុន សែន នៅតែបន្តអំពាវនាវឲ្យបងប្អូនប្រជាពលរដ្ឋ ជាពិសេសបងប្អូនកូនក្មួយកម្មករកម្មការនី សូមចូលរួមរក្សាសន្តិភាពឲ្យខានតែបានដើម្បីរក្សាការពារមុខរបរ អាជីព និងការងារ ដែលកំពុងមានសព្វថ្ងៃ។ ទន្ទឹមនឹងនេះ សូមបងប្អូនប្រជាពលរដ្ឋទូទាំងប្រទេសបន្តបោះឆ្នោត ជូនគណបក្សប្រជាជនកម្ពុជាបន្តទៀតដើម្បីឲ្យរាជរដ្ឋាភិបាលមានឱកាសអភិវឌ្ឍន៍ប្រទេសជាតិឲ្យកាន់តែរីកចម្រើនថែមទៀត។ លោកនាយករដ្ឋមន្រ្តី ហ៊ុន សែន នឹងបន្តធ្វើជានាយករដ្ឋមន្រ្តីយ៉ាងហោចណាស់មានរយៈពេល២អាណត្តិទៀត។ នៅក្នុងពិធីជួបជុំសំណេះសំណាលព្រឹកនេះ លោកនាយករដ្ឋមន្រ្តី ហ៊ុន សែន បានឧបត្ថម្ភប្រាក់លើកទឹកចិត្តមួយចំនួនដល់ សហជីពកម្មករ ចលនាសហជីព បុគ្គលិកសិក្សា ចំនួន៤,៣៥០ នាក់ផងដែរ។ មុននឹងបញ្ចប់ លោកនាយករដ្ឋមន្រ្តី ហ៊ុន សែន បានជូនពរបងប្អូនកូនក្មួយសហជីពកម្មករ ទាំងអស់ ដែលបានចូលរួមក្នុងពិធីជួបជុំថ្ងៃនេះ និងជួបតែសេចក្តីសុខចម្រើន ព្រមទាំងពុទ្ធពរទាំង ៥ប្រការ គឺអាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ៕