លោកនាយករដ្ឋមន្រ្តី ហ៊ុន សែន អញ្ជើញវិលត្រឡប់មកដល់ទីក្រុងភ្នំពេញវិញដោយសុវត្ថិភាព

នៅម៉ោងប្រមាណ ២:០០ រសៀលថ្ងៃទី៥ ខែមេសា ឆ្នាំ២០១៨នេះ លោកនាយករដ្ឋមន្រ្តី ហ៊ុន សែន បានអញ្ជើញដឹកនាំគណៈប្រតិភូវិលត្រឡប់មកកាន់ទីក្រុងភ្នំពេញហើយដោយសុវត្ថិភាព បន្ទាប់ពីបានអញ្ជើញដឹកនាំកិច្ចប្រជុំកំពូលគណៈកម្មការទន្លេមេគង្គ លើកទី៣ នៅខេត្តសៀមរាប កាលពីថ្ងៃទី៤-៥ មេសា ២០១៨។

នៅព្រឹកមិញនេះដែរ លោកនាយករដ្ឋមន្រ្តី ហ៊ុន សែន ក៏បានធ្វើសេចក្តីប្រកាសព័ត៌មានក្នុងសន្និសីទសាព័ត៌មានដោយបានបញ្ជាក់ថា ប្រមុខរដ្ឋាភិបាលនៃប្រទេសជាសមាជិកទាំង០៤បានពិភាក្សាផ្លាស់ប្តូរទស្សនៈស្តីពីបញ្ហាប្រឈមនៅក្នុងអាងទន្លេមេគង្គហើយបានប្តេជ្ញារួមគ្នាបង្កើនប្រសិទ្ធភាពនៃការអនុវត្តកិច្ចព្រមព្រៀងមេគង្គឆ្នាំ១៩៩៥ និងលើកកម្ពស់តួនាទីរបស់គណៈកម្មការទន្លេមេគង្គឱ្យកាន់តែមានប្រសិទ្ធភាពក្នុងតំបន់ កិច្ចសហប្រតិបត្ដិការដើម្បីសម្រេចបាននូវការគ្រប់គ្រងធនធានទឹក និងធនធានពាក់ព័ន្ធដ៏ទៃទៀតក្នុងអាងទន្លេមេគង្គ។

នៅក្នុងសន្និសីទសាព័ត៌មានក៏បានប្រកាសថា កិច្ចប្រជុំគណៈកម្មការទន្លេមេគង្គលើកទី៤នឹងប្រព្រឹត្តទៅនៅខែមេសា ឆ្នាំ២០២២ នៅក្នុងប្រទេសឡាវ។ ដូច្នេះ សេចក្តីប្រកាសខេត្តសៀមរាបនេះ បានកំណត់ទិសដៅជាយុទ្ធសាស្ត្រនាពេលអនាគតសម្រាប់ជំរុញ និងលើកកម្ពស់កិច្ចខិតខំប្រឹងប្រែងការសហការ និងភាពជាដៃគូរួមគ្នាដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពនៅអាងទន្លេមេគង្គ៕