Credit: រស្មីកម្ពុជា
ភ្នំពេញៈ លោកនាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ បានបញ្ជាក់ថា កម្លាំងអាជ្ញាធរមានសមត្ថកិច្ចចម្រុះចំនួនប្រាំបីម៉ឺននាក់ ត្រូវប្រើប្រាស់សម្រាប់ចូលរួមការពារការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ខាងមុខ។ ក្នុងនោះ ក៏ប្រើកម្លាំងប្រជាការពារត្រៀមជួយនៅតាមឃុំ សង្កាត់ និងក្រុង ស្រុក ខណ្ឌ ប្រមាណជាងពីរម៉ឺននាក់ផងដែរ។ ការបញ្ជាក់នេះ បានធ្វើឡើងនៅក្នុងពិធីបើកវគ្គបណ្តុះបណ្តាលគ្រូបង្គោលស្តីពីច្បាប់ បទបញ្ជា និងនីតិវិធីសម្រាប់ការបោះឆ្នោត និងក្រមសីលធម៌សម្រាប់ភ្នាក់ងារសន្តិសុខបោះឆ្នោត របស់គណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត កាលពីព្រឹកថ្ងៃទី១៨ ខែមេសា នៅអគ្គស្នងការនគរបាលជាតិ។ វគ្គបណ្តុះបណ្តាលនេះមានរយៈពេលបីថ្ងៃ ចាប់ពីថ្ងៃទី១៨-២០ ខែមេសា ដោយមានមន្ត្រីនគរបាល និងកងរាជអាវុធហត្ថមកពីបណ្តារាជធានី ខេត្ត។ លោកនាយឧត្តមសេនីយ៍ គៀត ច័ន្ទថារិទ្ធ បានថ្លែងថា វគ្គបណ្តុះបណ្តាលនេះ មានរយៈពេល៣ថ្ងៃ ប៉ុន្តែប្រធានបទ៩ គឺសុទ្ធតែពាក់ព័ន្ធទៅនឹងសកម្មភាពសន្តិសុខនៃការបោះឆ្នោតទាំងអស់ ។លោកក៏បានថ្លែងអំណរគុណចំពោះស្ថាប័ន (គ.ជ.ប) ដែលបានគាំទ្រនិងផ្តល់ គ្រូឧទ្ទេសនាមបណ្តុះបណ្តាលសម្រាប់វគ្គសិក្សាការបោះឆ្នោត។ សិក្ខាកាមដែលបានបញ្ចប់វគ្គនេះមានភារកិច្ច ត្រូវយកចំណេះជំនាញទៅបង្ហាត់បង្រៀនបន្ត។លោកបញ្ជាក់ថា “កម្លាំងដែលត្រូវចូលរួមការពារការបោះឆ្នោតរហូតដល់ទៅ ៨ម៉ឺននាក់ ក្នុងនោះមកពីកងយោធពលខេមរភូមិន្ទ និងកងរាជអាវុធហត្ថ និងមានកម្លាំងប្រជាការពារត្រៀមជួយនៅតាមឃុំសង្កាត់ និងក្រុង ស្រុក ខណ្ឌ ប្រមាណជាង២ម៉ឺននាក់ផងដែរ” ។ ជាមួយគ្នានេះ លោកក៏បានបានផ្តាំផ្ញើដល់សិក្ខាកាមទាំងអស់ ត្រូវយកចិត្តទុកដាក់ត្រង់ត្រាប់ស្តាប់គ្រូឲ្យមែនទែន ដើម្បីក្តាប់ជាប់គ្រប់ខ្លឹមសារ និងយកទៅបើកវគ្គបណ្តុះបណ្តាលតាមអង្គភាព និងរាជធានី ខេត្ត ឲ្យបានទាន់ពេលវេលា ដោយហេតុថា នៅសល់តែ១០១ថ្ងៃ ប៉ុណ្ណោះ ដល់ថ្ងៃបោះឆ្នោតហើយ សំណូមពររបស់យើងគឺ ត្រូវធ្វើឲ្យ មន្ត្រីដែលចូលរួមការពារបោះឆ្នោតទាំងអស់ មានការយល់ដឹងបាន គ្រប់ៗគ្នា ដើម្បីធ្វើឲ្យបរិយាកាសនៃការបោះឆ្នោតប្រព្រឹត្តទៅដោយ សេរី ត្រឹមត្រូវ យុត្តិធម៌ និងគ្មានការគំរាមកំហែង។ គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា ការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ មានរយៈពេល២១ថ្ងៃ ចាប់ពីថ្ងៃទី៧ ដល់ថ្ងៃទី២៧ ខែកក្កដា ។ ចំណែកការបោះឆ្នោតជ្រើសតាំងតំណាងរាស្ត្រ នឹងប្រព្រឹត្តទៅនៅថ្ងៃទី២៩ ខែកក្កដា ខាងមុខនេះ ដោយមានគណបក្សនយោបាយជាច្រើនចូលរួមប្រកួតប្រជែង៕
0 comments