ក្រុមគ្រូពេទ្យភ្នែកមកពីទីក្រុងហូជីមិញ នឹងមកពិនិត្យព្យាបាលដោយឥតគិតថ្លៃចំនួន២ថ្ងៃនៅមន្ទីរពេទ្យព្រះនរោត្តមសីហនុត្បូងឃ្មុំ

ត្បូងឃ្មុំ៖ មន្ទីរសុខាភិបាលខេត្តត្បូងឃ្មុំ បានចេញសេចក្តីជូនដំណឹង ដល់ប្រជាពលរដ្ឋដែលមានបញ្ហាភ្នែកទាំងអស់ថា ក្រុមគ្រូពេទ្យភ្នែកមកពីទីក្រុងហូជីមិញ ប្រទេសវៀតណាម សហការជាមួយរដ្ឋបាលខេត្តត្បូងឃ្មុំ និងមន្ទីរសុខាភិបាលខេត្តត្បូងឃ្មុំ នឹងធ្វើការពិនិត្យព្យាបាល និងវះកាត់ជំងឺភ្នែក ជូនប្រជាពលរដ្ឋ ដែលមានបញ្ហាភ្នែកឡើងបាយ ដុះសាច់ភ្នែក ឬជំងឺភ្នែកផ្សេងៗ ដោយឥតគិតថ្លៃ នៅមន្ទីរពេទ្យព្រះនរោត្តមសីហនុត្បូងឃ្មុំ ស្ថិតនៅក្រុងសួង ខេត្តត្បូងឃ្មុំ នៅថ្ងៃសៅរ៍ ទី១៤កើត និងអាទិត្យ ទី១៥កើត ខែពិសាខ ឆ្នាំច សំរិទ្ធស័ក ព.ស២៥៦១ ត្រូវនឹងថ្ងៃទី២៨ និង២៩ ខែមេសា ឆ្នាំ២០១៨ខាងមុខនេះ ។ តាមរយៈសេចក្តីជូនដំណឹងខាងលើនេះ លោកវេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ ក៏បានអំពាវនាវឱ្យប្រជាពលរដ្ឋទាំងអស់ ដែលមានជំងឺពាក់ព័ន្ធនឹងបញ្ហាភ្នែក សូមអញ្ជើញមកទទួលការពិនិត្យ ព្យាលបាល ជាមួយនឹងពេទ្យជំនាញ ដោយឥតគិតថ្លៃ តាមការបរិច្ឆេទ និងទីតាំងនៅក្នុងសេចក្តីជូនដំណឹង ដោយមិនប្រកាន់ពូជសាសន៍ រឺនិន្នាការនយោបាយនោះឡើយ។ លោកវេជ្ជបណ្ឌិត កែវ វណ្ណៈ បានបន្តថា ដោយសារប្រទេសកម្ពុជា កំពុងតែអភិវឌ្ឍ និងមានសុខសន្តិភាពពេញផ្ទៃប្រទេស ធ្វើឱ្យសកម្មភាពមនុស្សធម៌ទាំងឡាយ អាចកើតមានឡើងជាបន្តបន្ទាប់។ ដោយឡែកវិស័យសុខាភិបាល ជាពិសេសខេត្តត្បូងឃ្មុំតែម្តង គឺតែងតែមានសកម្មភាពពិនិត្យព្យាបាលដោយឥតគិតថ្លៃ ជូនប្រជាពលរដ្ឋ ដោយសហការជាមួយក្រុមគ្រូពេទ្យស្ម័គ្រចិត្ត ក្នុងនិងក្រៅប្រទេស ក្រោមការជំរុញពីសំណាក់ រាជរដ្ឋាភិបាលកម្ពុជា ដែលធ្វើឱ្យសកម្មភាពមនុស្សធម៌ ដ៏ល្អបែបនេះ ចេះតែបន្តកើតមានជាបន្តបន្ទាប់៕