ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី៥ ខែមេសានេះ បានអញ្ជើញដឹកនាំ កិច្ចប្រជុំចង្អៀតនៃគណៈកម្មការទន្លេមេគង្គលើកទី៣ នៅសណ្ឋាគារសុខាសៀមរាប ដោយមានការចូលរួមពីសំណាក់ មេដឹកនាំនៃបណ្តាប្រទេស នៅតាមដងទន្លេមេគង្គ ដូចជា ឡាវ ថៃ វៀតណាម មីយ៉ាន់ម៉ា និងមេដឹកនាំប្រទេសចិន មុនពេលកិច្ចប្រជុំកំពូល គណៈកម្មការទន្លេមេគង្គលើកទី៣ ចាប់ផ្តើម។
កិច្ចប្រជុំចង្អៀតនេះ បានពិភាក្សាលើបញ្ហាមួយចំនួន រួមទាំងការពិនិត្យ និងឯកភាពគ្នា លើសេចក្តីថ្លែងការណ៍ក្រុងសៀមរាប នៃកិច្ចប្រជុំកំពូល គណៈកម្មការទន្លេមេគង្គ។
កិច្ចប្រជុំកំពូល គណៈកម្មការទន្លេមេគង្គ លើកទី៣នេះ ធ្វើឡើងក្រោមប្រធានបទ ការលើកកម្ពស់កិច្ចខិតខំប្រឹងប្រែងរួមគ្នា និងភាពជាដៃគូ ដើម្បីសម្រេចបាននូវ គោលដៅអភិវឌ្ឍន៍ប្រកបដោយចីរភាព នៅក្នុងអាងទន្លេមេគង្គ-ទន្លេមេគង្គតែមួយ ស្មារតីតែមួយ។
កិច្ចប្រជុំកំពូលនេះ មានសម្តេចតេជោ នាយករដ្ឋមន្ត្រី ធ្វើជាប្រធាន ដោយផ្ដោតការយកចិត្តដាក់ លើចំណុចសំខាន់ៗ ចំនួន៤ រួមមាន ១.កិច្ចខិតខំប្រឹងប្រែងរួមគ្នា និងភាពជាដៃគូ ទី២សកម្មភាពរួមគ្នា ដើម្បីគោលដៅអភិវឌ្ឍប្រកបដោយចិរភាព ទី៣.ការប្រើប្រាស់លទ្ធផល ដែលបានមកពីការសិក្សារបស់ក្រុមប្រឹក្សា និងចំណុចទី៤.គឺការពង្រឹងតួនាទី និងសមត្ថភាពរបស់គណៈកម្មការមេគង្គ៕
0 comments