(ភ្នំពេញ) ៖ នៅព្រឹកថ្ងៃទី២០ ខែធ្នូ ឆ្នាំ២០១៧ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានអញ្ជើញជួបសួរសុខទុក្ខ កូនក្មួយកម្មករកម្មការនី ចំនួន១៦.១១៨នាក់មកពីរោងចក្រចំនួន១៤ នៅតំបន់ទួលពង្រ ខណ្ឌពោធិ៍សែនជ័យ រាជធានីភ្នំពេញ។
ក្នុងចំណោមប្រសាសន៍សំខាន់ៗជាច្រើនៗ សម្ដេចតេជោ ក៏បានផ្ដោតលើចំណុចសំខាន់មួយ ដើម្បីរំលឹកស្មារតីប្រជាពលរដ្ឋកម្ពុជាថា “យើងមិនអាចក្លាយខ្លួនជាអ្នករង់ចាំអុកស៊ីសែនពីអ្នកណាដកទេ នេះជាចំណុចភាពធន់របស់យើង”។
សម្ដេចតេជោ បានលើកឡើងថា “នយោបាយឈ្នះឈ្នះ បានធ្វើឲ្យយើងបង្រួបបង្រួម ប្រទេសពីតំបន់ត្រួតត្រាច្រើនមកជាតំបន់ត្រួតត្រាតែមួយ…គ្មានជោគជ័យណាមួយ ដែលយើងទទួលបានដោយគ្មានការចូលរួមនោះទេ។ជោគជ័យពីមុនបានមកពីការចូលរួមរបស់ជីដូនជីតានិងឪពុកម្ដាយ របស់ក្មួយៗ…ក្មួយៗត្រូវចងចាំថា ដើម្បីមានការងារធ្វើនៅថ្ងៃនេះ យើងបានលះបង់ច្រើនណាស់ ដើម្បីឲ្យក្មួយៗបានការងារធ្វើ និងប្រាក់ចំណូលសមរម្យ តាមរយៈនោះយើងបានរួមគ្នា កសាងជាតិអភិវឌ្ឍន៍សេដ្ឋកិច្ចសង្គម កាត់បន្ថយភាពក្រីក្រ…”។
ជាមួយគ្នានេះ សម្ដេចបានបង្ហាញការភ្ញាក់ផ្អើលយ៉ាងខ្លាំង នៅពេលដែលសម្ដេចបានដឹងថា ប្រធានរដ្ឋបាលមានប្រាក់ខែពី១៦០០-២៥០០ដុល្លារអាមេរិក។សម្តេចមានប្រសាសន៍ដូច្នេះថា ៖ “…ខ្ញុំមានការភ្ញាក់ផ្អើលខ្លាំងណាស់ កាលពីថ្ងៃមុនប្រធានរដ្ឋបាលមានប្រាក់ខែ១៦០០ដុល្លារអាមេរិក រឹតតែភ្ញាក់ផ្អើលទៀត ថ្ងៃមុនប្រធានរដ្ឋបាល មានប្រាក់ខែ២៥០០ដុល្លារ…ប៉ុន្តែយ៉ាងណាក៏ដោយក្មួយៗ ត្រូវចងចាំការចាប់ផ្ដើម របស់យើងគឺលំបាកណាស់…ពីមុនឃើញពូនៅខ្សែត្រៀមខាងមុខ ដោះស្រាយការលំបាកនានារបស់កងទ័ពនិងប្រជាជន ក្នុងពេលជាមួយគ្នាគេឃើញពូ នៅលើតុចរចាដើម្បីបញ្ចប់សង្គ្រាមបន្តទៀត គេឃើញពូនៅតាមវាលស្រែប៉ុន្តែឥឡូវនេះយើងបានឆ្លងកាត់ ដំណាក់ប្រកបដោយជោគជ័យ ពីប្រទេសមួយដែលមានប្រជាជន៥លាននាក់ ខ្វះស្បៀងតែឥឡូវយើងមានប្រជាជន ជាង១៦លាននាក់ តែជាប្រទេសនាំចេញស្រូវអង្ករ…ពូមិនបោះបង់ចោលវិស័យកសិកម្មនោះទេ តែយើងត្រូវតែជំរុញវិស័យនេះឲ្យក្លាយជាវិស័យកសិឧស្សាហកម្ម…យើងត្រូវតែបន្តពង្រឹងវិស័យសេវា…ក្នុងនោះមានវិស័យទេសចរណ៍ នៅខាងមុខយើងមានពិធីបុណ្យសមុទ្រព្រះអាទិត្យរះ នៅទិសនិរតី… យើងបន្តខិតខំធ្វើឲ្យមានភាពរឹងមាំ នៃសេដ្ឋកិច្ចរបស់យើង…ក្នុងចិត្តរបស់ខ្ញុំបានសម្រេចរួចហើយថា នឹងបង្កើតធនាគារមួយទៀត គឺធនាគារធុនតូចនិងមធ្យមតែម្ដង…វានឹងដោះស្រាយបញ្ហាតម្រូវការក្នុងស្រុកនិងការប្រកួតប្រជែងនាំចេញ ទៅក្រៅប្រទេស។ត្រូវចងចាំឲ្យបានថាមានតែប្រទេស ក្រីក្រតែប៉ុណ្ណោះដែលទទួលបាន ភាពអនុគ្រោះពន្ធដារពីប្រទេសនានា…”។
សម្ដេចបានសង្កត់ធ្ងន់ថា “…យើងមិនអាចក្លាយខ្លួនជាអ្នករង់ចាំអុកស៊ីសែនពីអ្នកណាដកទេ នេះជាចំណុចភាពធន់របស់យើង…លើពិភពលោកបច្ចុប្បន្ន ការប្រែប្រួលអាកាសធាតុ វាលឿនណាស់អាចបង្កបញ្ហា និងការលំបាកដល់ប្រជាជាតិរបស់យើង…ដូចជាឥឡូវនេះពូជស្រូវ ដែលដូនតាយើងធ្លាប់ដាំដុះ លែងត្រូវជាមួយអាកាសធាតុ…”។
ក្នុងឱកាសនេះដែរ សម្ដេចបានក៏បានថ្លែងអំណរគុណដល់ម្ចាស់ផ្ទះជួលទាំងអស់ ដែលមិនប្រកាសមិនតម្លើងថ្លៃផ្ទះជួលខណៈដែលរាជរដ្ឋាភិបាលបានសម្រេចតម្លើងប្រាក់ខែ ជូនកម្មករ កម្មការិនី៕
0 comments