កម្ពុជានឹងមានរោងចក្រធ្វើអាជីវកម្មរ៉ែមាសខ្នាតមធ្យម ចាប់ផ្តើមផលិតមាសជាលើកដំបូង ក្នុងឆ្នាំ២០១៨

(ភ្នំពេញ)៖ មន្ត្រីជាន់ខ្ពស់ក្រសួងរ៉ែ និងថាមពល បានបង្ហើបឲ្យដឹងនៅថ្ងៃទី១៨ ខែធ្នូ ឆ្នាំ២០១៧នេះថា ប្រទេសកម្ពុជា នឹងមានរោងចក្រធ្វើអាជីវកម្មផលិតមាសខ្នាតមធ្យម លើកដំបូង នៅឆ្នាំ២០១៨។
លោក ប៉េង ណាវុធ អនុរដ្ឋលេខាធិការបានបង្ហើបឲ្យដឹង នៅក្នុងសិក្ខាសាលាពិគ្រោះយោបល់ លើសេចក្តីព្រាងគោលនយោបាយជាតិស្តីពី «ធនធានរ៉ែ» នាព្រឹកថ្ងៃទី ១៨ ខែធ្នូ ឆ្នាំ២០១៧នេះថា បច្ចុប្បន្ននេះ អាជ្ញាបណ្ណស្វែងរុករកធនធានរ៉ែចំនួន១០២ ត្រូវបានផ្តល់ដល់វិនិយោគិនទាំងក្នុង និងក្រៅស្រុក ដើម្បីធ្វើការសិក្សាស្រាវជ្រាវរ៉ែលោហៈដែលរួមមាន រ៉ែដែក មាស ទង់ដែង និងបុកស៊ីត។

លោកបន្តថា ចំពោះអាជ្ញាបណ្ណអាជីវកម្មធនធានរ៉ែចំនួន១៧ ក៏បានផ្តល់ដល់វិនិយោគិន សម្រាប់ធ្វើអាជីវកម្មរ៉ែដែក មាស ធ្យូងថ្ម និងខ្សាច់ស៊ីលីកា ទុនវិនិយោគ សរុបសម្រាប់វិស័យរ៉ែលោហៈទាំងមូលមានចំនួនប្រមាណ ៧៣៣ លានដុល្លាសហរដ្ឋអាមេរិក ប្រើប្រាស់កម្លាំងពលកម្មជាង១៥០០នាក់ ហើយក្នុងឆ្នាំ២០១៨ ដែលនឹងឈានមកដល់នាពេលដ៏ឆាប់ខាងមុខនេះ រោងចក្រឧស្សាហកម្មអាជីវកម្មរ៉ែមាសខ្នាតមធ្យម ចំនួន១គ្រោង នឹងចាប់ផ្តើមដំណើរការផលិតមាស ជាលើកដំបូងនៅក្នុងប្រទេសកម្ពុជា។
តែយ៉ាងណាមន្ត្រីជាន់ខ្ពស់រូបនេះ មិនបានបញ្ជាក់ពីឈ្មោះក្រុមហ៊ុន និងទីតាំងដែលវិនិយោគបើករោងចក្រឧស្សាហកម្ម ផលិតមាសជាលើកដំបូងរបស់កម្ពុជានេះនោះទេ។
ថ្លែងក្នុងសិក្ខាសាលាពិគ្រោះយោបល់ លើសេចក្តីព្រាងគោលនយោបាយជាតិស្តីពី «ធនធានរ៉ែ»នេះដែរ លោក ឌិត ទីណា រដ្ឋលេខាធិការក្រសួងរ៉ែ និងថាមពល បានឲ្យដឹងថា គោលបំណងនៃសិក្ខាសាលានេះ គឺដើម្បីធ្វើការពិគ្រោះយោបល់ និងប្រមូលធាតុចូលបន្ថែមទៀត​ពាក់ព័ន្ធនឹង «សេចក្ដីព្រាងគោលនយោបាយជាតិ ស្ដីពីធនធានរ៉ែ»​ ពីសំណាក់ស្ថាប័នឯកជន អង្គការ សង្គមស៊ីវិល និងសាធារណជនទូទៅ មុននឹងដាក់ឆ្លងកិច្ចប្រជុំអន្តរក្រសួង និងគណៈរដ្ឋមន្ត្រី។
លោកបន្តថា គោលនយោបាយជាតិនេះ ក៏ជាសក្ខីភាពអះអាងនូវតួនាទីគាំទ្រ និងបង្ហាញនូវការប្តេជ្ញាចិត្ត របស់រាជរដ្ឋាភិបាល ​ក្នុង​ការ​ជំរុ​ញ​​​ឧស្សាហកម្មរ៉ែ ឧស្សាហកម្មដែលប្រើប្រាស់វត្ថុធាតុដើមពីធនធានរ៉ែ និងការធ្វើ​ពាណិជ្ជកម្ម​ផលិត​ផល​​រ៉ែ ការអភិវឌ្ឍធនធានមនុស្ស ការអភិវឌ្ឍសហគមន៍មូលដ្ឋាន​ ការលើកទឹកចិត្ត​ឱ្យ​ប្រើ​ប្រា​ស់​​កម្លាំង​ពលកម្ម​ក្នុង​តំប​ន់ ​និងបញ្ហាយេនឌ័រ ក្នុងវិស័យធនធានរ៉ែ ក៏​ត្រូវ​​បានផ្តល់​ការ​យក​ចិត្ត​ទុ​ក​ដាក់ផងដែរ​។
បើតាមលោករដ្ឋលេខាធិការ គោលនយោបាយធនធានរ៉ែនេះ តំណាងឱ្យរបត់ជំហានដ៏សំខាន់ ក្នុងការរៀបចំវិស័យធនធានរ៉ែ​ឱ្យក្លាយ​ទៅជា ​ផ្នែ​ក​​មួយ​​នៃខឿនសេដ្ឋកិច្ចជាតិ ដែលនឹងដើរតួនាទីរួមចំណែក ក្នុងការអភិវឌ្ឍសេដ្ឋកិ​ច្ច​កម្ពុជា​ ផ្តល់នូវវិបុលភាព​ដ​​ល់​ប្រជាពលរដ្ឋ និង​សម្រេច​​បាននូវ​ការ​​កាត់​បន្ថយ​ភាពក្រីក្រ ស្របតាមទិសដៅជាយុទ្ធសាស្រ្ត​ របស់​រាជរដ្ឋា​ភិ​បា​​​ល​​កម្ពុជា​។
សេចក្ដីព្រាងគោលនយោបាយនេះ ត្រូវបានរៀបចំឡើងដោយផ្ដោតសំខាន់លើ៖
១៖ ការ​គ្រប់គ្រងនិងអភិវឌ្ឍធនធានរ៉ែប្រកបដោយចីរភាព
២៖ ការផ្តល់ផលប្រយោជន៍ ដល់ប្រជាពលរដ្ឋ និងសហគមន៍រ៉ែ
៣៖ ការផ្គត់ផ្គង់វត្ថុធាតុដើម ដល់ការអភិវឌ្ឍហេដ្ឋារចនាសម្ព័ន្ធ និងសំណង់
៤៖ ការបង្កើតប្រភពចំណូលថ្មីសម្រាប់ជាតិ៕