រដ្ឋបាលរាជធានីភ្នំពេញ ប្រកាសឱ្យផ្អាកការរៀបចំអាពាហ៍ពិពាហ៍ និងកម្មវិធីជួបជុំនានា ដើម្បីកាត់បន្ថយការរីករាលដាលជំងឺកូវីដ-១៩ ក្នុងព្រឹត្តិការណ៍សហគមន៍

(ភ្នំពេញ)៖ រដ្ឋបាលរាជធានីភ្នំពេញ នៅថ្ងៃទី១៥ ខែមីនា ឆ្នាំ២០២១នេះ បានចេញសេចក្តីជូនដំណឹងមួយដោយប្រកាសឱ្យផ្អាកជាបណ្ដោះអាសន្ននូវរាល់ការរៀបចំ ពិធីអាពាហ៍ពិពាហ៍ ពិធីជប់លៀង ពិធីសាសនា កម្មវិធីជួបជុំសិក្ខាសាលា និងវគ្គបណ្ដុះបណ្ដាលផ្សេងៗ ដើម្បីបញ្ចៀស និងកាត់បន្ថយជាអតិបរមានូវការផ្ទួន រីករាលដាលជំងឺកូវីដ១៩ ក្នុងព្រឹត្តិការណ៍សហគមន៍ ២០-កុម្ភៈ នៅរាជធានីភ្នំពេញ។ ការចេញសេចក្តីជូនដំណឹងនេះ បានធ្វើឡើង បន្ទាប់ពីមាន អនុសាសន៍របស់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងច្បាប់ ក៏ដូចជាអនុក្រឹត្យ ស្ដីពីវិធានការទប់ស្កាត់ការឆ្លងរាលដាលនៃជំងឺកូវី៥-១៩ និងជំងឺឆ្លងកាចសាហាវ និងប្រកបដោយ គ្រោះថ្នាក់ធ្ងន់ធ្ងរផ្សេងទៀត។ តាមសេចក្តីជូនដំណឹងដែលបណ្តាញព័ត៌មាន Fresh News ទទួលបាន រដ្ឋបាលរាជធានីភ្នំពេញ បានបញ្ជាក់ថា ក្នុងគោលបំណងទប់ស្កាត់ការរាតត្បាតនៃជំងឺកូវីដ-១៩ ដែលបាននឹងកំពុងផ្ទុះឡើងជាលើកទី៣ ក្នុង «ព្រឹត្តិការណ៍សហគមន៍ ២០-កុម្ភៈ» រដ្ឋបាលរាជធានីភ្នំពេញ មានកិត្តិយសសូមជម្រាបជូនដំណឹងដល់ម្ចាស់កម្មវិធី ប្រជាពលរដ្ឋ និងសាធារណជនទាំងអស់មេត្តាជ្រាប និងសូមចូលរួមអនុវត្តដោយស្មារតីយោគយល់ អធ្យាស្រ័យខ្ពស់បំផុត នូវវិធានការបិទសកម្មភាពសង្គមមួយចំនួន ដូចខាងក្រោម៖ ១៖ ត្រូវផ្អាកជាបណ្ដោះអាសន្ននូវរាល់ការរៀបចំពិធីអាពាហ៍ពិពាហ៍ ពិធីជប់លៀង ពិធីសាសនា កម្មវិធី ជួបជុំ សិក្ខាសាលា និងវគ្គបណ្ដុះបណ្ដាលផ្សេងៗ ដើម្បីបញ្ចៀស និងកាត់បន្ថយជាអតិបរមានូវការផ្ទួន រីករាលដាលជំងឺកូវីដ-១៩ ក្នុង ព្រឹត្តិការណ៍សហគមន៍ ២០-កុម្ភៈ” នៅរាជធានីភ្នំពេញ។ ២៖ ចំពោះការរៀបចំពិធីអាពាហ៍ពិពាហ៍បែបប្រពៃណីក្នុងរង្វង់ក្រុមគ្រួសារ និងពិធីបុណ្យសព ដែលពុំអាច លើកពេលបាន ម្ចាស់កម្មវិធីត្រូវផ្តល់កិច្ចសហការល្អជាមួយអាជ្ញាធរមូលដ្ឋានតាមរយៈ (១) កាត់បន្ថយ ចំនួនភ្ញៀវចូលរួម និងរយៈពេលប្រារព្ធកម្មវិធី ឱ្យនៅត្រឹមកម្រិតអប្បបរមា ក្នុងរង្វង់សាច់ញាតិចាំបាច់ ជារបៀបសែនព្រេន (២) ចាត់ឱ្យមានអ្នកវាស់កម្ដៅ បាញ់អាល់កុល-ជែល ចែកម៉ាស និងចូលរួមអនុវត្ត ការស្កេន QR Code «ទប់ស្កាត់កូវីដ Stop Covid» (៣) រៀបចំតុអាហារមិនឱ្យលើសពី ៥នាក់/១តុ (៤) រក្សាគម្លាតសុវត្ថិភាពសង្គម និងគម្លាតសុវត្ថិភាពបុគ្គលឱ្យបានត្រឹមត្រូវ និង (៥) ត្រូវអនុវត្តឱ្យបាន ម៉ឺងមាត់បំផុតតាមការណែនាំរបស់ក្រសួងសុខាភិបាល ជាពិសេសវិធានការ «៣ ការពារ និង ៣ការពារ» របស់ សម្ដេចតេជោ ហ៊ុន សែន។ ៣៖ ក្នុងករណីប្រសិនបើម្ចាស់កម្មវិធីណាមួយមិនចូលរួមសហការ អាជ្ញាធរមូលដ្ឋាន និងមន្ទីរ-អង្គភាពជំនាញ ពាក់ព័ន្ធ ត្រូវបានបិទកម្មវិធីនោះជាបន្ទាន់ ដោយមិនទទួលខុសត្រូវរាល់ការខាតបង់ឡើយ។ ជាមួយគ្នានេះ ត្រូវចាត់វិធានការច្បាប់ចំពោះជនទាំងឡាយណាដែលបំពាន និងមិនព្រមផ្ដល់កិច្ចសហការ ក្នុងការទប់ស្កាត់ការរីករាលដាលនៃជំងឺកូវីដ-១៩ តាមខ្លឹមសារនៃសេចក្ដីជូនដំណឹងនេះ។ ៤៖ សេចក្ដីជូនដំណឹងនេះ មានសុពលភាពអនុវត្ត ចាប់ពីថ្ងៃជូនដំណឹងនេះតទៅ រហូតដល់មានសេចក្ដីជូន ដំណឹងថ្មីមកជំនួសវិញ៕ ខាងក្រោមនេះជាសេចក្តីជូនដំណឹងរបស់ រដ្ឋបាលរាជធានីភ្នំពេញ៖