ទំនាក់ទំនងកម្ពុជា-ជប៉ុន មានការរីកចម្រើនរឹងមាំជា លំដាប់ទាំងផ្នែកការទូត សេដ្ឋកិច្ច និងពាណិជ្ជកម្ម

លោកហៃដិហិសា ហូរីនូជិ (Hidehisa HORINOUCHI) អគ្គរដ្ឋទូតជប៉ុនប្រចាំនៅកម្ពុជា ដែលផុតអាណត្តិ បានថ្លែងថា អំឡុងពេលបេសកកម្មរបស់លោកនៅកម្ពុជា ប៉ុន្មានឆ្នាំមកនេះ ទំនាក់ទំនងកម្ពុជា-ជប៉ុន មានការរីកចម្រើនរឹងមាំជាលំដាប់ ទាំងផ្នែកការទូត សេដ្ឋកិច្ច និងពាណិជ្ជកម្ម។ លោកបានលើកឡើងដូច្នេះ ក្នុងឱកាសដែលលោក បានចូលជួបសម្តែងការគួរសម និងជម្រាបលាលោក ហេង សំរិន ប្រធានរដ្ឋសភាកម្ពុជា នៅវិមានរដ្ឋសភា នាព្រឹកថ្ងៃទី១៩ ខែសីហា ឆ្នាំ២០១៩។ លោកអគ្គរដ្ឋទូតជប៉ុន Hidehisa HORINOUCHI បានគូសបញ្ជាក់ថា បេសកកម្មការទូតរបស់លោកនៅកម្ពុជា គឺចំពេលដែលសេដ្ឋកិច្ចកម្ពុជាមានការីកចម្រើន ហើយទំនាក់ទំនងកម្ពុជា-ជប៉ុន ក៏មានការរីកចម្រើនរឹងមាំជាលំដាប់ ទំាងផ្នែកការទូត សេដ្ឋកិច្ច និងពាណិជ្ជ កម្ម។ ជាពិសេសគឺកម្ពុជានិងជប៉ុនបានផ្លាស់ប្តូរដំណើរទស្សនកិច្ចពីគ្នាទៅវិញមក ទំាងស្ថាប័ននីតិប្បញ្ញត្តិ និងនីតិប្រតិបត្តិ។ លោក បានថ្លែងអំណរគុណចំពោះលោក ហេង សំរិន ដែលបានគាំទ្រដល់បេសកកម្មការទូតរបស់លោក។ នៅក្នុងនោះ លោកតែងតែឆ្លៀតពេលមមាញឹកទទួលស្វាគមន៍ គណៈប្រតិភូប្រទេសជប៉ុន ដែលបានមកបំពេញទស្សនកិច្ចនៅកម្ពុជា។ លោកឯកអគ្គរដ្ឋទូតជប៉ុនដែលចប់អាណត្តិ សង្ឃឹមថា ប្រធានរដ្ឋសភានឹងបន្តលើកកម្ពស់ទំនាក់ទំនង និងកិច្ចសហប្រតិបត្តិការរវាងរដ្ឋសភាប្រទេសទាំងពីរបន្ថែមទៀត។ លោកបានលើកឡើងថា បេសកកម្មការទូតរបស់លោកនៅកម្ពុជា រយៈពេលបីឆ្នាំកន្លងមកនេះ ទទួលបានជោគ ជ័យ។ ជោគជ័យដោយសារមានការគាំទ្រ និងជួយសម្រួ លពីសម្តេចប្រធានរដ្ឋសភាមួយចំណែក។ ក្នុងនោះលោក បានជំរុញឲ្យរដ្ឋសភាកម្ពុជានិងជប៉ុន មានការផ្លាស់ប្តូរដំណើរទស្សនកិច្ចគ្នាទៅវិញទៅមក។ លោក ហេង សំរិន បានថ្លែងអំណរគុណប្រទេសជប៉ុនដែលបានជួយគាំទ្រ និងផ្តល់ជំនួយយ៉ាងច្រើនសន្ធឹកសន្ធាប់ដល់កម្ពុជារហូតមក។ លោកបានមានប្រសាសន៍ថា នៅក្នុងរយៈពេលស្នាក់នៅកម្ពុជានេះ លោកឯកអគ្គរាជទូត បានឃើញពីដំណើរការអនុវត្តន៍លទ្ធិប្រជា ធិបតេយ្យរបស់កម្ពុជា។ កម្ពុជាបានអនុវត្តពេញលេញលើប្រព័ន្ធប្រជាធិបតេយ្យសេរីពហុបក្ស ហើយលោកបានអរគុណជប៉ុន ចំពោះការគ្រំាទ្រការកែទម្រង់ការបោះ ឆ្នោត និងការលើកកំពស់សិទ្ធិមនុស្សនៅកម្ពុជា។ លោក ហេង សំរិន ក៏បានស្នើសុំប្រទេសជប៉ុនជួយគាំទ្រដល់ប្រទេសកម្ពុជាបន្ថែមទៀត ជាពិសេសការអភិវឌ្ឍន៍ធនធានមនុស្ស និងការកសាងសមត្ថភាព ដើម្បីឲ្យកម្ពុជាមានលទ្ធភាពអភិវឌ្ឍប្រទេសអោយកាន់តែរីក ចម្រើន។ ចំណងការទូតកម្ពុជានិងជប៉ុន មានរយៈពេលជាង ៦៥ឆ្នាំមកហើយ។ ក្នុងខួប៦៥ឆ្នាំនៃទំនាក់ទំនងការទូតប្រទេសទំាងពីរ ប្រទេសជប៉ុនបានបង្កើតការិ យាល័យកុងស៊ុលជប៉ុន នៅខេត្តសៀមរាប។ លោក ហេង សំរិន បានកត់សម្គាល់ថា ចាប់តាំងពីឆ្នាំ ២០១៣ មក វឌ្ឍនភាព នៃទំនាក់ទំនង និងកិច្ចសហ ប្រតិបត្តិការប្រទេសទំាងពីរ បានក្លាយជា «ភាពជាដៃគូយុទ្ធសាស្រ្ត»។ ថ្នាក់ដឹកនាំប្រទេសទាំងពីរ រួមគ្នាលើក កម្ពស់ចំណងការទូតនេះ យ៉ាងសកម្មផុលផុសនៅគ្រប់កម្រិត គ្រប់វិស័យ ព្រមទាំងបានប្រែក្លាយទៅជាផល ប្រយោជន៍ជាក់ស្តែងយ៉ាងច្រើនដល់ពលរដ្ឋកម្ពុជា៕