ភិបាលក្រុង Fontaine Bleau សាធារណៈរដ្ឋបារាំង​ សន្យាជួយជំរុញភ្ញៀវទេសចរ​ និងអ្នក​វិនិយោគ​មកកាន់ខេត្តសៀមរាបឲ្យកាន់តែច្រើនថែមទៀត

សៀមរាប៖ នៅរសៀលថ្ងៃទី២៧ ខែវិច្ឆិកា ឆ្នាំ២០១៨នេះ លោក ពៅ ពិសិដ្ឋ អភិបាលរងខេត្តសៀមរាប តំណាងលោក ឃឹម ប៊ុនសុង អភិបាល​ខេត្ត​សៀមរាប បានជួប​ពិភាក្សា​ការងារ​ ជាមួយលោក Frederic Valletoux អភិបាលក្រុង Fontaine Bleau នៃសាធារណៈរដ្ឋបារាំង ព្រមទាំងមានការអញ្ជើញចូលរួមពីលោក លោកស្រី មកពីមន្ទីរ អង្គភាព​ ជុំវិញ​ខេត្ត​ សរុបចំនួន ១៤រូបផងដែរ។ ការជួបពិភាក្សាការងាររវាងរដ្ឋបាលខេត្តសៀមរាប និងប្រតិភូក្រុង Fontaine Bleau នៃសាធារណៈរដ្ឋបារាំង គឺដើម្បីចងសម្ព័ន្ធមេត្រីជាមួយគ្នា និងពង្រឹងទំនាក់ទំនង និងសហប្រតិបត្តិការអន្តរជាតិ ជាពិសេសការពង្រីកបន្ថែមនូវភ្ញៀវទេសចរ និងអ្នកវិនិយោគ ដែលបានអញ្ជើញមកខេត្តសៀមរាប។ លោកអភិបាលរងខេត្ត បានសំណូមពរដល់ប្រតិភូក្រុង Fontaine Bleau នៃសាធារណៈរដ្ឋបារាំង ជួយពង្រឹងដល់វិស័យសុខាភិបាល វិស័យអប់រំ យុវជន និងកីឡា វិស័យវប្បធម៌ និងវិចិត្រសិល្បៈ វិស័យទេសចរណ៍ និងចូលរួមជាមួយរាជរដ្ឋាភិបាលកម្ពុជាអភិវឌ្ឍក្រុងសៀមរាប អោយភ្ញៀវទេសចរ​ និងអ្នកវិនិយោគ មកទស្សនៈកិច្ច ប្រទេសកម្ពុជា ជាពិសេសខេត្តសៀមរាបឱ្យកាន់តែច្រើនថែមទៀត។ ក្នុងនោះដែរ លោកអភិបាលក្រុង នៃសាធារណៈរដ្ឋបារាំង ក៏បានសន្យាថា នឹងជំរុញឱ្យមានកិច្ចសហការល្អ និងជួយជំរុញអ្នកវិនិយោគ និងអ្នកទេសចរបារាំង មកប្រទេសកម្ពុជា ជាពិសេសគឺខេត្តសៀមរាប អោយមានកំណើនឡើងជាបន្តបន្ទាប់៕