ទីភ្នាក់ងារប្រឹក្សាយោបល់សង្គមកម្ពុជា ប្រកាសគាំទ្រប្រសាសន៍របស់លោកនាយករដ្ឋមន្រ្តី ហ៊ុន សែន ស្តីពី «កម្ពុជាមិនអនុញ្ញាតឱ្យកងទ័ពបរទេសណា បោះមូលដ្ឋានយោធានៅលើទឹកដីកម្ពុជាឡើយ»

នៅថ្ងៃទី២០ ខែវិច្ឆិកា ឆ្នាំ២០១៨នេះ ទីភ្នាក់ងារប្រឹក្សាយោបល់សង្គមកម្ពុជា និងអង្គការសម្ព័ន្ធភាពជាដៃគូចំនួន៤៩អង្គភាព បានចេញសេចក្តីថ្លែងការណ៍គាំទ្រប្រសាសន៍របស់លោកនាយករដ្ឋមន្រ្តី ហ៊ុន សែន ថ្លែងនៅក្នុងកិច្ចប្រជុំពេញអង្គគណៈរដ្ឋមន្រ្តី នៅថ្ងៃទី១៩ ខែវិច្ឆិកា ឆ្នាំ២០១៨ ស្តីពី «កម្ពុជាមិនអនុញ្ញាតឱ្យកងទ័ពបរទេសណា បោះមូលដ្ឋានយោធានៅលើទឹកដីកម្ពុជាឡើយ»។ នៅក្នុងសេចក្តីថ្លែងការណ៍ដដែលនេះ ក៏បានបញ្ជាក់ថា ការប្រកាសយ៉ាងម៉ឺងម៉ាត់របស់ប្រមុខរាជរដ្ឋាភិបាល ជាការបង្ហាញឱ្យឃើញថា រាជរដ្ឋាភិបាលកម្ពុជា បានគោរពយ៉ាងខ្ជាប់ខ្ជួនរដ្ឋធម្មនុញ្ញ ជាពិសេសមាត្រា៥៣ថ្មីដែលបានចែងថា «ព្រះរាជាណាចក្រកម្ពុជាដែលជារដ្ឋឯករាជ្យ អាព្យាក្រឹតអចិន្ត្រៃយ៍មិនចូលបក្សសម្ព័ន្ធ មិនចងសម្ព័ន្ធយោធា មិនអនុញ្ញាតឱ្យមានមូលដ្ឋានយោធាបរទេសនៅលើទឹកដីរបស់ខ្លួន»៕