សមាជិកថ្មីចំនួន៣៣២រូបមកពីវិទ្យាល័យ៣ក្នុងស្រុករលាប្អៀរធ្វើពិធីបញ្ជូលសមាជិកគណបក្សប្រជាជនកម្ពុជា

កំពង់ឆ្នាំង៖ សមាជិកថ្មីចំនួន៣៣២រូប ស្រី១៤១រូប បានស្ម័គ្រចិត្តចូលរួមជាសមាជិកគណបក្សប្រជាជនកម្ពុជា ក្នុងពិធីប្រកាសបញ្ចូលសមាជិក សមាជិកាថ្មីដែលបានធ្វើឡើង នៅថ្ងៃទី៤ខែសីហា ឆ្នាំ២០១៨ នៅស្នាក់ការគណបក្សប្រជាជនកម្ពុជាស្រុករលាប្អៀរ ខេត្តកំពង់ឆ្នាំង ក្រោមអធិបតីភាពលោក អ៊ុក រ៉ាប៊ុន សមាជិកអចិន្រ្តៃយ៍គណៈកម្មាធិការកណ្តាលគណបក្សប្រជាជនកម្ពុជានិងជាអនុប្រធានទី១ក្រុមការងារថ្នាក់កណ្តាកចុះជួយខេត្តកំពង់ឆ្នាំងដោយមានការចូលរួមពីលោកស្រី កែ ច័ន្ទមុនី ក្រុមការងារថ្នាក់កណ្តាលខេត្តស្រុកផងដែរ។ បន្ទាប់ពី តំណាងអោយសមាជិកថ្មីទាំង៣៣២រូប បានឡើងអានពាក្យសុំចូលសមាជិកគណបក្សប្រជាជនកម្ពុជារួចមក លោក សូ គឹមសាន អនុប្រធានគណៈកម្មាធិការគណបក្សប្រជាជនកម្ពុជាស្រុករលាប្អៀរ បានអានសេចក្តីសម្រេចរបស់គណៈកម្មាធិការគណបក្សប្រជាជនកម្ពុជាសម្រេចបញ្ចូលសមាជិកសមាជិកាថ្មីចំនួន៣៣២រូបស្រី១៤១រូប ជាផ្លូវការចាប់ពីថ្ងៃប្រកាសនេះតទៅ។ តំណាងសមាជិកថ្មីបានឡើងធ្វើការប្តេជ្ញាចិត្តដូចតទៅ៖ ១.ខិតខំអភិវឌ្ឍន៍អប់រំសមត្ថភាពខ្លួនឱ្យក្លាយទៅជាកំលាំងពិតរបស់គណបក្សប្រជាជនកម្ពុជានិងប្រទេសជាតិ, ២.សាមគ្គីភាពផ្ទៃក្នុងបក្សឱ្យបានល្អ និងទំនាក់ទំនងល្អជាមួយមជ្ឈដ្ឋាននានាក្នុងសង្គមដើម្បីពង្រឹងកិត្យានុភាពរបស់គណបក្ស, ៣.គាំទ្របេក្ខភាពលោកនាយករដ្ឋមន្រ្តី ហ៊ុន សែន ជានាយករដ្ឋមន្រ្តី និតិកាលទី៦នៃរដ្ឋសភា និង អាណត្តិក្រោយៗទៀតដើម្បីបន្តដឹកនាំនាវាកម្ពុជាឱ្យមានសុខសន្តិភាពនិងការអភិវឌ្ឍនូវសមិទ្ធផលថ្មីៗបន្ថែមទៀត។ មានប្រសាសន៍សំណេះសំណាលក្នុងឱកាសនោះ លោក អ៊ុក រ៉ាប៊ុន បានថែ្លងថា ក្មួយៗទាំងអស់ពិតជាបានយល់ច្បាស់ពីគោលនយោបាយការដឹកនាំរបស់គណបក្សប្រជាជនកម្ពុជាគឺធ្វើអ្វីៗទាំងអស់ដើម្បីប្រទេសជាតិ និងប្រជាជន ដែលកន្លងមកគ្រប់អាណត្តិគណបក្សប្រជាជនកម្ពុជាត្រូវបានប្រជាជនបោះឆ្នោតគាំទ្រជានិច្ច ហើយក្រោមការដឹកនាំរបស់រាជរដ្ឋាភិបាល ដែលមានថ្នាក់ដឹកនាំជាច្រើនជាមន្ត្រីរបស់គណបក្សប្រជាជនកម្ពុជា បានធ្វើឱ្យប្រទេសជាតិមានការអភិវឌ្ឍរីកចំរើនលើគ្រប់វិស័យ។ លោកបានបន្តទៀតថា គណបក្សប្រជាជនគឺជាគណបក្សតែមួយគត់ដែលបានរំដោះប្រទេសជាតិ ប្រជាជនអោយរួចផុតពីរបបប្រល័យពូជសាសន៍ ប៉ុល ពត។ គណបក្សប្រជាជនបានយកវប្បធម៌សន្ទនាចរចាស្វែងរកសន្តិភាពជាមួយសម្តេច សីហនុ និងជាអ្នកយាង សម្តេច សីហនុ ចូលប្រទេស គ្រងរាជសម្បត្តិឡើងវិញនិងក៏ជាអ្នកបង្រួបបង្រួមជាតិខ្មែរតែមួយឡើងវិញ។ ប្រទេសជាតិមានលទ្ធិប្រជាធិបតេយ្យ មានសុខសន្តិភាព មានគណបក្សជាច្រើនចូលរួមបោះឆ្នោតកសាងប្រទេស ក៏ដោយសារគណបក្សប្រជាជនកម្ពុជាផងដែរ។ លោក អ៊ុក រ៉ាប៊ុន ក៏បានផ្តាំផ្ញើផងដែរដល់សមាជិកបក្សទាំងអស់ ត្រូវរឹតចំណងសាមគ្គីផ្ទៃក្នុងបក្សឱ្យបានរឹងមាំ ត្រូវចូលរួមផ្សព្វផ្សាយគោលនយោបាយរបស់គណបក្សប្រជាកម្ពុជាឱ្យបានទូលំទូលាយដល់ប្រជាពលរដ្ឋនៅក្នុងមូលដ្ឋានដើម្បីឱ្យពួកគាត់បានយល់ច្បាស់ និងចូលរួមគាំទ្រគណបក្សប្រជាជនកម្ពុជាដើម្បីធានាបានសុខសន្តិភាពនិងបន្តដឹកនាំប្រទេសឱ្យកាន់តែរីកចំរើននិងទទួលបានសមិទ្ធផលថ្មីៗថែមទៀត៕