លោកនាយករដ្ឋមន្រ្តី ហ៊ុន សែន ផ្តល់អនុសាសន៍ជាថ្មីក្នុងការគ្រប់គ្រងដឹកនាំការងារឱ្យមានប្រសិទ្ធភាពនៅតាមស្ថាប័ននីមួយៗ

នៅព្រឹកថ្ងៃទី៥ ខែមិថុនា ឆ្នាំ២០១៨ ក្នុងពិធីប្រគល់សញ្ញាបត្រ និងវិញ្ញាបនបត្រជូនសិស្សមន្ត្រី និងកម្មសិក្សាការីនៃសាលាភូមិន្ទរដ្ឋបាល នៅវិទ្យាស្ថានជាតិអប់រំ រាជធានីភ្នំពេញ លោកនាយករដ្ឋមន្ត្រី ហ៊ុន សែន បានផ្តល់នូវគន្លឹះសំខាន់ៗមួយចំនួនដើម្បីឱ្យមន្ត្រីអនុវត្តការងារទទួលបានជោគជ័យគឺ៖ ទី១- ត្រូវរៀបចំផែនការឱ្យបានច្បាស់លាស់ គឺគិតហើយចាំគូរ ការធ្វើបែបនេះយើងអាចវាស់ស្ទង់ទំហំការងារយើងដែលធ្វើឱ្យយើងអាចសម្រេចជោគជ័យបាន៣០% ទី២- ចាត់តាំងការងារអនុវត្ត ដោយត្រូវរៀបចំធនធានមនុស្សគ្រប់គ្រាន់ និងធនធានហិរញ្ញវត្ថុ ដែលអាចនាំមកជោគជ័យប្រមាណ ៣០% ទី៣- ដោះស្រាយបញ្ហាប្រឈមបន្ទាន់ដែលអាចកើតឡើងដោយចៃដន្យឬដោយយថាហេតុណាមួយ ក្នុងពេលដែលយើងកំពុងអនុវត្តគម្រោងសកម្មភាពដែលធ្វើឱ្យយើងអាចសម្រេចជោគជ័យបាន ៤០%។ លោកនាយករដ្ឋមន្រ្តី ហ៊ុន សែន បានរំលឹកសារជាថ្មីថា មន្ត្រីគ្រប់រូបគឺមិនត្រូវធ្វើខ្លួនជាមន្រ្តីគ្រាប់ល្ពៅទេ ហើយក៏មិនត្រូចក្តិចត្រួយគ្នាដែរ ជាពិសេសទៀតនោះគឺមិនត្រូវរាំងស្ទះដល់ឱកាសរីកចម្រើននៃមន្រ្តីក្រោមឱវាទផងដែរ។ មន្រ្តីល្អគឹជាអ្នកដែលចេះដោះស្រាយបញ្ហាដែលកើតមានឡើងភ្លាមៗដោយមានការទទួលទាំងខុស និងទទួលទាំងត្រូវ ហើយក៏មិនត្រូវចេះតែរាយការណ៍ទៅថ្នាក់លើ ហើយស្តីបន្ទោសថ្នាក់ក្រោយដែរ៕