លោកនាយករដ្ឋមន្រ្តី ហ៊ុន សែន អំពាវនាវឱ្យគណបក្សនយោបាយទាំងអស់ផ្សព្វផ្សាយតែគោលនយោបាយរបស់ខ្លួនកុំបន្ទោសបង្អាប់បក្សដទៃ

នៅព្រឹកថ្ងៃសុក្រទី២២ ខែមិថុនា ឆ្នាំ២០១៨នេះ លោកនាយករដ្ឋមន្រ្តី ហ៊ុន សែន បានថ្លែងថា សូមបណ្តាគណបក្សនយោបាយទាំងអស់លើកឡើងតែពីគោលនយោបាយរបស់ខ្លួនបានហើយ កុំបង្អាប់អ្នកដទៃ។ លោកចង់ឱ្យបណ្តាគណបក្សនយោបាយទាំងអស់ ក្លាយទៅជាអ្នកឃោសនាផ្សាយពាណិជ្ជកម្មដែលលើកតែពីទំនិញរបស់ខ្លួនដោយមិនត្រូវបន្ទោសបង្អាប់ទំនិញរបស់អ្នកដទៃទេ។ លោកបានថ្លែងដូចនេះក្នុងឱកាសអញ្ជើញផ្តល់កិត្តិយសប្រគល់សញ្ញាបត្រដល់និស្សិតសាកលវិទ្យាល័យភូមិន្ទភ្នំពេញចំនួនជាង៣ពាន់នាក់ ដែលមានផ្នែកបរិញ្ញាបត្រ និងបរិញ្ញាបត្រជាន់ខ្ពស់ដែលពិធីនេះប្រារព្ធនៅមជ្ឈមណ្ឌលសន្និបាត និងពិព័រណ៍កោះពេជ្រ។ លោកនាយករដ្ឋមន្រ្តី ហ៊ុន សែន បានបញ្ជាក់ថា គណបក្សនយោបាយទាំងអស់គួរលើកតែតួអង្គរបស់ខ្លួនបានហើយមិនត្រូវបន្ទោសបង្អាប់អ្នកដទៃនោះឡើយ។ សូមឱ្យអ្នកនយោបាយនានា តាំងខ្លួនជាអ្នកលក់ទំនិញ ឃោសនាតែពីទំនិញល្អរបស់ខ្លួនបានហើយ កុំបង្អាប់ទំនិញរបស់អ្នកដទៃដែលអាចនឹងបង្កើតបញ្ហាជាមួយអ្នកដទៃ៕