លោកនាយករដ្ឋមន្រ្តី ហ៊ុន សែន ចុះជួបសំណេះសំណាលជាមួយកម្មករជាង ២ម៉ឺននាក់នៅខេត្តកំពង់ឆ្នាំង

នៅព្រឹកថ្ងៃពុធទី២៧ ខែមិថុនា ឆ្នាំ២០១៨នេះ លោកនាយករដ្ឋមន្រ្តី ហ៊ុន សែន បានអញ្ជើញជួបសំណេះសំណាលជាមួយកម្មករ កម្មការិនីសរុបប្រមាណ ២៤,៣៧៥នាក់ មកពីរោងចក្រចំនួន៥ ស្ថិតនៅស្រុកសាមគ្គីមានជ័យ ខេត្តកំពង់ឆ្នាំង។ លោកនាយករដ្ឋមន្រ្តី ហ៊ុន សែន បានបង្ហាញសេចក្តីសប្បាយរីករាយយ៉ាងខ្លាំង ដែលបានអញ្ជើញមកជួបសួរសុខទុក្ខសំណេះសំណាលជាមួយកម្មករនៅទីនេះ។ លោក បានថ្លែងអំណរគុណយ៉ាងជ្រាលជ្រៅផងដែរ ចំពោះកម្មករ កម្មការិនីទាំងអស់ ដែលបានគោរពស្រឡាញ់រូបលោករហូតមក។ ទន្ទឹមនឹងនេះ លោក ក៏បានអរគុណម្ចាស់រោងចក្រទាំងអស់ ដែលបានអនុញ្ញាតឱ្យកម្មករបានឈប់សម្រាកនៅល្ងាចថ្ងៃនេះ ដោយមានប្រាក់ឈ្នួលពេញ ដែលនេះបានបង្ហាញពីក្តីស្រឡាញ់ និងយកចិត្តទុកដាក់ព្រមទាំងសាមគ្គីភាពរវាងកម្មករ និងម្ចាស់រោងចក្រ។ លោកនាយករដ្ឋមន្រ្តី ហ៊ុន សែន បានលើកទឹកចិត្តដល់ក្រុមហ៊ុន វិនិយោគទុនទាំងក្នុង និងក្រៅប្រទេស ឱ្យមកវិនិយោគនៅកម្ពុជា ដើម្បីធ្វើយ៉ាងណាបង្កើតផលិតផលសម្រាប់បម្រើក្នុងប្រទេស និងសម្រាប់នាំចេញទៅទីផ្សារបរទេសស្របពេលដែលប្រទេសកម្ពុជា មានកន្លែងផលិត និងវត្ថុធាតុដើមស្រាប់។ ទន្ទឹមនឹងនេះដែរ គឺដើម្បីជំរុញគោលនយោបាយអភិវឌ្ឍន៍ វិស័យឧស្សាហកម្ម (២០១៥-២០២៥) ឱ្យកាន់តែមានប្រសិទ្ធភាពខ្ពស់ ដើម្បីពង្រឹងសេដ្ឋកិច្ចជាតិ និងលើកកម្ពស់ជីវភាពរស់នៅ របស់ពលរដ្ឋឱ្យកាន់តែល្អប្រសើរឡើង។ លោកនាយករដ្ឋមន្ត្រី ចង់ឱ្យរោងចក្រទាំងអស់ ដែលបានវិនិយោគនៅក្នុងប្រទេស គឺក្លាយទៅជាសហគមន៍ដ៏សុខសាន្តមួយនៅក្នុងប្រទេសកម្ពុជា៕