​លោក​ស៊ុនចាន់ថុល​!​រថភ្លើង​លើ​អាកាស​កំពុង​សិក្សា​គម្រោង​និង​នៅតែ​សាងសង់​

Credited: រស្មីកម្ពុជា ភ្នំពេញៈ​រដ្ឋមន្ត្រីក្រសួង​សាធារណៈការ​និង​ដឹកជញ្ជូន​បាន​អះអាងថា​ការសាងសង់​រថភ្លើង​លើ​អាកាស​ក្រោម​ជំនួយ​របស់​ប្រទេស​ជប៉ុន​នៅតែ​ដំណើរការ​សាងសង់​។​ពេលនេះ​កំពុង​សិក្សា​ដើម្បី​បើក​គម្រោង​សាងសង់​នៅ​ថ្ងៃ​ខាងមុខ​ឥតមាន​ការប្រែប្រួល​ណាមួយ​នោះឡើយ​។​ ​ថ្លែង​បញ្ជាក់ប្រាប់​បណ្តាញសារព័ត៌មាន ក្រោយ​បញ្ចប់ ពិធី​ចុះ​អនុស្សារណៈ​យោគយល់​នៃ មូលនិធិ​រួមគ្នា រវាង​អង្គការ UNDP ជាមួយ​ក្រុមហ៊ុន Grab លើ​គម្រោង​និរន្តរភាព​ចរាចរណ៍ ក្នុង​ទីក្រុង​សម្រាប់​គ្រប់គ្នា “​សម័យ​”​កាលពី​ថ្ងៃទី​៥​ខែមិថុនា​ឆ្នាំ​២០១៨​លោក​ទេសរដ្ឋមន្ត្រី​ស៊ុនចាន់ថុល​រដ្ឋមន្ត្រីក្រសួង​សាធារណៈការ​និង​ដឹកជញ្ជូន​ឱ្យដឹងថា​គម្រោង​សាងសង់​រថភ្លើង​លើ​អាកាស​នេះ​រួមទាំង​អស់​មាន​ប្រវែង​ចំនួន​១៨​គីឡូម៉ែត្រ​ចាប់ពី​តំបន់​ផ្សារ​ថ្មី​ឆ្ពោះ​មក​ព្រលានយន្តហោះ​អន្តរជាតិ​ភ្នំពេញ​។​ ​ដោយ​ក្នុងនេះ​១៦​គីឡូម៉ែត្រ​ជា​ផ្លូវ​រថភ្លើង​លើ​អាកាស​និង​៤​គីឡូម៉ែត្រ​នៅ​ជិត​ដល់​ព្រលានយន្តហោះ​អន្តរជាតិ​ភ្នំពេញ​ជា​រថភ្លើង​ក្រោម​ដី​វិញ​។​ការលើកឡើង​របស់រ​ដ្ឋ​មន្ត្រី​ក្រសួង​សាធារណៈការ​បែបនេះ​ធ្វើឡើង​បន្ទាប់ពី​មាន​ការប្រទាំងប្រទើស​និង​បំបាត់​ពាក្យ​អាចា​មរាម​ជាច្រើន​ជុំវិញ​ការសាងសង់​រថភ្លើង​អាកាស​របស់​ជប៉ុន​នៅ​កម្ពុជា​ដោយសារ​បណ្តាញ​សង្គម​ហ្វេ​ស​ប៊ុ​ក​មួយចំនួន​អះអាងថា​ជប៉ុន​បាន​ផ្តាច់ជំនួយ​វិញ​ដោយសារ​បញ្ហានយោបាយ​ជាមួយ​គណៈបក្សប្រឆាំង​នា​កន្លងមក​ជាដើម​។​ ​ ​ ​ទាក់ទិន​ក្នុង​រឿងនេះ​ដែរ​លោក​រដ្ឋមន្ត្រី​លើកឡើងថា​”​គ្មាន​ពាក់ព័ន្ធ​ទៅនឹង​នយោបាយ​អ្វី​ទាំងអស់​គឺ​ជប៉ុន​គេ​នៅតែ​បន្ត​ជំនួយ​នេះ​ដដែល​។​ជប៉ុន​គេ​បាន​បើ​កិច្ចពិភាក្សា​ជាមួយ​កម្ពុជា​យើង​២​លើក​ហើយ​។​សម្រាប់​លើក​ទី​៣​នេះ​គេ​នឹង​ជួប​ពិភាក្សាគ្នា​នៅ​ខែ​៦​នេះឯង​ដើម្បី​ពន្យល់​ឱ្យ​ពលរដ្ឋ​សាធារណៈជន​បាន​យល់​ពី​ការសាងសង់​ផ្លូវ​រថភ្លើង​លើ​អាកាស​នេះ​”​។​ជុំវិញ​បញ្ហា​នេះដែរ​លោក​បាន​អះអាងថា​នាពេលនេះ​គម្រោង​កំពុង​សិក្សា​អាច​បញ្ចប់​នៅក្នុង​ឆ្នាំនេះ​ឬ​ឆ្នាំក្រោយ ហើយ​បន្ទាប់ពីនោះ​គម្រោង​សាងសង់​នឹង​ចាប់​ផ្តើមឡើង​។​ ​លោក​ទេសរដ្ឋមន្ត្រី​ស៊ុនចាន់ថុល​បានឱ្យដឹង​បន្ថែមថា​ក្រៅពី​គម្រោង​សាងសង់​រថភ្លើង​លើ​អាកាស​ជាមួយ​ប្រទេស​ជប៉ុន​នេះ​ចេញ​នាពេលនេះ​កម្ពុជា​ក៏​កំពុងតែ​សិក្សា​គម្រោង​មួយទៀត​ពី​ការសាងសង់​រថភ្លើង​លើ​អាកាស​ជាមួយ​ប្រទេស​ចិន​ផងដែរ​។​ទោះបី​យ៉ាងណាក្តី​លោក​រដ្ឋមន្ត្រីក្រសួង​សាធារណៈការ​បានបញ្ជាក់​ថា​គម្រោង​ពីនេះ​ខុសគ្នា​មិនជា​ន់​នឹង​គម្រោង​របស់​ប្រទេស​ជប៉ុន​នោះឡើយ​។​ ​គួរបញ្ជាក់​ថាបើ​តាម​មន្ត្រី​ក្រសួង​សាធារណៈការ​បានឱ្យដឹង​នា​កន្លងមក​ថា​គម្រោង​ផ្លូវ​រថភ្លើង​លើ​អាកាស​នេះ​គ្រោង​ចំណាយ​ថវិកា​ប្រមាណ ៨០០​លាន​ដុល្លារ​សហរដ្ឋអាមេរិក​។​វា​ជា​ប្រភេទ​រថភ្លើង​AGT ដែលមាន​ល្បឿន​លឿន​ពិ​សេសមួយ​សម្រាប់​រត់​នៅ​ទីប្រជុំជន​។​គម្រោង​នេះ​អាច​នឹង​ចាប់ផ្តើម​នៅ​អំឡុង​ឆ្នាំ​២០១៩​ខាងមុខ​ហើយ​អាច​បញ្ចប់​ជា​ស្ថាពរ​នៅមុន​ឆ្នាំ​២០២៣​ដែល​កម្ពុជា​ធ្វើជា​ម្ចាស់ផ្ទះ​នៃ​ការប្រកួត​ស៊ី​ហ្គេម​លើក​ទី​២៣​ដើម្បី​កាត់បន្ថយ​ការកកស្ទះ​ចរាចរណ៍​ផងដែរ​៕