លោក ហ៊ុន ម៉ាណែត ចុះជួបសំណេះសំណាលជាមួយលោកគ្រូអ្នកគ្រូក្នុងក្រុងសៀមរាប

សៀមរាប៖ លោក ហ៊ុន ម៉ាណែត នាយរងសេនាធិការចម្រុះ នៃកងយោធពលខេមរភូមិន្ទ និងជាមេបញ្ជាការរងកងទ័ពជើងគោក ចុះជួបសំណេះសំណាលជាមួយលោកគ្រូអ្នកគ្រូក្នុងក្រុងសៀមរាប ដោយមានការចូលរួមពីលោក នូ ផល្លា ប្រធានក្រុមប្រឹក្សាខេត្តសៀមរាប នៅថ្ងៃទី១៧ ខែឧសភា ឆ្នាំ២០១៨។ ក្នុងពិធីសំណេះសំណាលនេះលោក ហ៊ុន ម៉ាណែត បានលើកឡើងថា លោកគ្រូ អ្នកគ្រូគឺជាឪពុកម្តាយទី២ដែលចូលរួមបង្កើតចំណេះដឹង បទពិសោធន៍ កម្លាំងកាយចិត្ត សីលធម៌ គុណធម៌ដើម្បីឲ្យមនុស្សម្នាក់ពេញលក្ខណៈ។ លោកគ្រូអ្នកគ្រូ គឺជាសេដ្ឋីចិត្តបុណ្យនៃកេរ្តិ៍ឈ្មោះដែលមានទ្រព្យសម្បត្តិមហាសាលនោះគឺ ចំណេះដឹង សីលធម៌ គុណធម៌ ដែលទ្រព្យសម្បត្តិដ៏មានតម្លៃនេះលោកគ្រូអ្នកគ្រូចែករំលែកទៅដល់សិស្សរាប់រយ រាប់ពាន់នាក់ឲ្យក្លាយជាមនុស្សដែលមានចំណេះដឹង សីលធម៌ គុណធម៌ដែលទ្រព្យសម្បត្តិ មិនមាននរណាអាចលួចឆក់ប្លន់បានទេ ។ លោកគ្រូ អ្នកគ្រូ កសាងមនុស្សឲ្យ មានចំណេះដឹង សីលធម៌ គុណធម៌ ខុសពីការបង្កើតទូរស័ព្ទមួយគ្រឿង ម៉ូតូមួយគ្រឿង រថយន្តមួយគ្រឿង យន្តហោះមួយគ្រឿង ព្រោះថាទាំងអស់នេះអាចប្រើប្រើប្រាស់តែក្នុងកម្រិតមួយដែលគេបង្កើតទេ មិនអាចបង្កើតមនុស្សឲ្យចេះដឹងបន្ថែមបានទេ ប៉ុន្តែមនុស្សមានខួរក្បាល បទពិសោធន៍ និងទស្សនៈកាន់រីកចម្រើនបន្ថែម នេះហើយដែលទ្រព្យសម្បត្តិលោកគ្រូ អ្នកគ្រូបង្កើតសេដ្ឋីចំណេះដឹង សីលធម៌ គុណធម៌បន្ថែមទៀត ។ លោក ហ៊ុន ម៉ាណែត បានបញ្ជាក់ថា អនាគតកាលគឺផ្អែកលើលំនឹងសុខសន្តិភាព លំនឹងស្ថិរភាព ទិសដៅផែនការ គោលនយោបាយច្បាស់លាស់ និងចក្ខុវិស័យវែងឆ្ងាយ ។ និរន្តរភាពនៃសន្តិភាព ស្ថិរភាព និរន្តរភាពនៃការដឹកនាំនេះសំខាន់ណាស់ព្រោះនិរន្តរភាពទាំងនេះនឹងធានាដល់និរន្តរភាពផ្សេងទៀត។ អ្វីដែលយើងមានសព្វថ្ងៃនេះ គឺជាមោទនភាព ប៉ុន្តែអ្វីដែលសំខាន់ជាងនេះគឺបន្តនិរន្តរភាព រាជរដ្ឋាភិបាលដែលដឹកនាំដោយលោកនាយករដ្ឋមន្ត្រី ហ៊ុន សែន គឺមានធនធានមនុស្សដែលមានបទពិសោធន៍គ្រប់គ្រាន់ ក្នុងការដឹកនាំប្រទេស ការថែរក្សាសុខសន្តិភាព ស្ថិរភាព និងមានគោលនយោបាយច្បាស់លាស់ សូមលោកគ្រូ អ្នកគ្រូ បន្តជឿទុកចិត្តចំពោះការដឹកនាំរបស់រាជរដ្ឋាភិបាលដែលមានលោកនាយករដ្ឋមន្ត្រី ហ៊ុន សែន ជាប្រមុខដឹកនាំ ។ លោក ហ៊ុន ម៉ាណែត បានបញ្ជាក់ទៀតថា អនាគតសំខាន់ទៅលើមេដឹកនាំដែលទទួលខុសត្រូវ មានចក្ខុវែងឆ្ងាយ មានក្រុមដែលមានសមត្ថភាពដែលធ្វើឲ្យមានលំនឹង គោលនយោបាយទៅមុខ ។ ប្រទេសយើងជាប្រទេសប្រជាធិបតេយ្យ ដើម្បីធានានូវនិរន្តភាពនេះគឺយើងត្រូវជ្រើសរើស រាជរដ្ឋាភិបាល និងមេដឹកនាំរាជរដ្ឋាភិបាលឲ្យបានច្បាស់លាស់ ។ ដូច្នេះសូមលោកគ្រូ អ្នកគ្រូ អញ្ជើញទៅបោះឆ្នោតទាំងអស់គ្នា ហើយសម្រេចជ្រើសរើសមេដឹកនាំដែលខ្លួនពេញចិត្ត គឺបោះឆ្នោតជូនគណបក្សប្រជាជនកម្ពុជា ដើម្បីជ្រើសយកលោកនាយករដ្ឋមន្ត្រី ហ៊ុន សែន ដឹកនាំប្រទេសឲ្យមានលំនឹងជាបន្តទៅទៀត ។ សូមបញ្ជាក់ថា វិស័យអប់រំនេះហើយបានធ្វើឲ្យប្រទេសមានការរីកចម្រើនមកដល់សព្វថ្ងៃនេះ រាជរដ្ឋាភិបាល យកចិត្តទុកដាក់ណាស់ទៅលើការងារនេះជាអាទិភាពរបស់រាជរដ្ឋាភិបាល។ ជាក់ស្តែងការចំណាយរបស់រាជរដ្ឋាភិបាលខ្ពស់លើវិស័យអប់រំបើប្រៀបធៀបនឹងវិស័យផ្សេងៗ ដែល៨០%នៃថវិកាជាតិអនុម័តដោយរដ្ឋសភា ផ្តោតសំខាន់លើការយកចិត្តទុកដាក់ទៅលើជីវភាពរបស់លោកគ្រូអ្នកគ្រូ តាមរយៈការដំឡើងប្រាក់បៀវត្សជូនលោកគ្រូអ្នកគ្រូ ការបណ្តុះបណ្តាលសមត្ថភាព និងបង្កើនលទ្ធភាពលោកគ្រូអ្នកគ្រូ ក្នុងការចែករំលែកចំណេះដឹងដល់សិស្សានុសិស្ស ក្នុងការកសាងហេដ្ឋារចនាសម្ព័ន្ធក្នុងវិស័យអប់រំ។ នេះគឺជាការយកចិត្តទុកដាក់របស់រាជរដ្ឋាភិបាល និងជាមោទនភាពរបស់វិស័យអប់រំនៅកម្ពុជា៕