សម្តេច ហ៊ុន សែន បញ្ជា​ឱ្យ​រដ្ឋមន្រ្តី​គ្រប់​ក្រសួង គិតគូរ​រឿង​ដំឡើង​ឋានន្តរស័ក្តិ​ឱ្យបាន​ត្រឹមត្រូវ

សម្តេច​នាយក​រដ្ឋមន្រ្តី ហ៊ុន សែន បាន​បញ្ជា​ឱ្យ​រដ្ឋមន្រ្តី​គ្រប់​ក្រសួង​ទាំងអស់ ត្រូវ​យកចិត្ត​ទុកដាក់​រឿង​ដំឡើង​ឋានន្តរស័ក្តិ​ឱ្យបាន​ត្រឹមត្រូវ​ទៅតាម​ច្បាប់។ នេះ​បើតាម​ការ​ប្រកាស​របស់​សម្តេច​នៅ​លើ​ទំព័រ​ហ្វេសប៊ុក នាព្រឹក​ថ្ងៃទី៦ ខែ​ឧសភា ឆ្នាំ​២០១៨នេះ។ សម្តេច ហ៊ុន សែន ថ្លែងនាពេលកន្លងមក សម្តេច​ ហ៊ុន សែន បាន​​បញ្ជាក់​ថា សម្តេច​នឹង​ពិនិត្យ​ឡើងវិញ​នូវ​ការ​ដំឡើង​ឋានន្តរស័ក្កិ និង​ថ្នាក់​នៅក្នុង​ក្រសួង មន្ទីរ ស្ថាប័ន​ទាំងអស់​កន្លងមក​ ថាតើ​បាន​ដំឡើង​ឱ្យ​មន្ត្រី និង​កង​កម្លាំង​ក្នុង​ក្រសួង​របស់ខ្លួន​បាន​ត្រឹមត្រូវ​ទៅតាម​ការ​កំណត់​ក្នុង​ច្បាប់​ហើយ​ឬ​នៅ។ សម្តេច​នាយក​រដ្ឋមន្រ្តី បាន​ណែនាំ​ឱ្យ​រដ្ឋមន្រ្តី​ទាំងអស់ កុំធ្វើ​តាម​តែ​បទ​បញ្ជា ហើយ​កុំគិត​តែ​ដំឡើង​ឋានន្តរស័ក្កិ និង​តួនាទី​របស់​ខ្លួន ឬ​បក្សពួក​ខ្លួន​ ដោយ​មិនបាន​គិតគូរ​ដល់​មន្ត្រី​នៅ​ក្រោម​ឱវាទ​នោះទេ។ សម្តេច​បន្ត​ថា តាមច្បាប់​នៅក្នុង​ក្របខណ្ឌ​មន្ត្រី​រាជការ​ស៊ីវិល គឺ​ក្រោយ​រយៈពេល ០២ឆ្នាំ ត្រូវ​ស្នើសុំ​ដំឡើង​ឋាន្តរស័ក្កិ​ចំនួន ០១ដង៕