កិច្ចសម្ភាសន៍របស់លោកបណ្ឌិត ហ៊ុន ម៉ាណែត ថ្លែងអំពីលទ្ធផលនៃដំណើរទស្សនកិច្ចទៅកាន់ប្រទេសជប៉ុន រយៈពេល៥ថ្ងៃ (Video inside)

Credit: Fresh News

(ភ្នំពេញ)៖ កិច្ចសម្ភាសន៍របស់លោកបណ្ឌិត ហ៊ុន ម៉ាណែត ថ្លែងរៀបរាប់អំពីលទ្ធផលនៃដំណើរទស្សនកិច្ចទៅកាន់ប្រទេសជប៉ុន រយៈពេល៥ថ្ងៃ។ ការថ្លែងផ្តល់កិច្ចសម្ភាសន៍ដល់ ក្រុមអ្នកសារព័ត៌មាននេះ ធ្វើឡើងខណៈលោកបណ្ឌិត ហ៊ុន ម៉ាណែត បានដឹកនាំគណៈប្រតិភូអញ្ជើញត្រឡប់មកដល់ប្រទេសកម្ពុជា នារសៀលថ្ងៃទី២៩ ខែមេសា ឆ្នាំ២០១៨នេះ ក្រោយបញ្ចប់ទស្សនកិច្ចដ៏ជោគជ័យនៅប្រទេសជប៉ុន រយៈពេល៥ថ្ងៃ។ ដំណើរទស្សនកិច្ចរបស់លោក ហ៊ុន ម៉ាណែត ធ្វើឡើងតបតាមការអញ្ជើញរបស់រដ្ឋាភិបាលជប៉ុន ដើម្បីពង្រឹង និងធ្វើឲ្យកាន់តែស៊ីជម្រៅលើការយល់ដឹងពីទំនាក់ទំនង ទ្វេភាគីកម្ពុជា-ជប៉ុន ក្រោមកម្មវិធីផ្លាស់ប្តូរ យុទ្ធសាស្ត្រកម្រិតអ្នកអនុវត្ត (Program for Strategic Exchanges on Practical Level—STEP)។ ក្នុងអំឡុងពេលទស្សនកិច្ចនៅប្រទេសជប៉ុននេះ លោកបណ្ឌិត ហ៊ុន ម៉ាណែត បានអញ្ជើញចូលជួបសម្តែងការគួរសម ជាមួយនាយករដ្ឋមន្ដ្រីជប៉ុន លោក ស៊ីនហ្សូ អាបេ និងថ្នាក់ដឹកនាំ ជាន់ខ្ពស់នៃរដ្ឋាភិបាល ក្រសួងការបរទេស ក្រសួងការពារជាតិ កងស្វ័យការពារ និងគណបក្សប្រជាធិបតេយ្យសេរី ព្រមទាំងជួបពិភាក្សាការងារ ជាមួយឥស្សរជន និងសមាជិកសភារបស់ជប៉ុនមួយចំនួនទៀតផងដែរ។ ក្នុងជំនួបជាមួយ លោកបណ្ឌិត ហ៊ុន ម៉ាណែត, លោកនាយករដ្ឋមន្ត្រីជប៉ុន ក៏បានបញ្ជាក់ជំហរយ៉ាងច្បាស់លាស់ថា ជប៉ុននៅតែបន្តគាំទ្រដំណើរការបោះឆ្នោតនៅកម្ពុជា ហើយបានលើកនូវយោបល់មួយចំនួនដើម្បីឲ្យកម្ពុជា យកទៅពិចារណាក្នុងគោលបំណងធានាឲ្យការបោះឆ្នោតនាខែកក្កដាខាងមុខនេះ ប្រព្រឹត្តទៅដោយ សេរី យុត្តិធម៌ និងឆ្លុះបញ្ចាំងអំពីឆន្ទះប្រជាពលរដ្ឋ។ ជាមួយគ្នានោះ លោកបណ្ឌិត ហ៊ុន ម៉ាណែត បានថ្លែងអំណរគុណដល់ លោកនាយករដ្ឋមន្ត្រីជប៉ុន ដែលបានរៀបចំឲ្យរូបលោកបានមកបំពេញទស្សនកិច្ចនាពេលនេះ និងផ្តល់កិត្តិយសអនុញ្ញាតិឲ្យរូបលោក បានចូលជួបសំដែងការគួរសមនាពេលនេះ។ លោកសង្ឃឹមថា កិច្ចសហប្រតិបត្តិការជប៉ុន-កម្ពុជា នឹងត្រូវបានពង្រឹងពង្រីកថែមទៀត ហើយលោកបណ្ឌិត បានថ្លែងអំណរគុណដល់ជប៉ុនដែលប្រកាន់ជំហរច្បាស់លាស់ បន្តគាំទ្រដំណើរការបោះឆ្នោតនៅកម្ពុជា នាខែកក្កដាខាងមុខនេះ៕