Credit: រស្មីកម្ពុជា
ភ្នំពេញ: សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជាបានលើកឡើងថាកម្ពុជាអាច ចាប់ផ្តើមបង្កើតបណ្តាញទីក្រុងវ័យឆ្លាត នៅរាជធានីភ្នំពេញ ,សៀមរាប និង បាត់ដំបង។ ប្រមុខរាជរដ្ឋាភិបាលកម្ពុជា បានលើកឡើងបែបនេះ នៅក្នុងផេកហ្វេសបុកផ្ទាល់របស់សម្តេច នៅរសៀលថ្ងៃទី២៨ ខែមេសានេះ ដោយសម្តេចបានសរសេរថា៖ កិច្ចប្រជុំកំពូលអាស៊ានលើកទី៣២ ទទួលបានលទ្ធផលល្អត្រចះត្រចង់ដោយ ប្រទេសទាំងអស់បានប្តេជ្ញាពង្រឹងនិងជំរុញនូវសហប្រតិបត្តិពាណិជ្ជកម្ម វិនិយោគ ពង្រឹង នូវសន្តិសុខក្នុងតំបន់ព្រមទាំងបង្កើត បណ្តាញទីក្រុងវៃឆ្លាតនៅក្នុងប្រទេសអាស៊ាន។ សម្តេចបានលើកឡើងថា កម្ពុជាក៏អាចចាប់ផ្តើមពីទីក្រុងភ្នំពេញ បាត់ដំបង និង សៀមរាប ស្របពេលនៃដំណើការសមាហរណកម្មអាស៊ាន។ បើយោងតាមការពន្យល់របស់លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី នៅឯសន្និសីទសារព័ត៌មានកាលពីល្ងាចថ្ងៃទី២៨ ខែមេសានៅព្រលានយន្តហោះអន្តរជាតិភ្នំពេញ គឺបណ្តាញទីក្រុងវ័យឆ្លាតនេះ ត្រូវបានមេដឹកនាំអាស៊ាន ឯកភាពគ្នាជ្រើរើសយកទីក្រុងចំនួន២៦ នៅក្នុងអាស៊ានធ្វើការសាកល្បង ដោយក្នុងប្រទេសមួយអាចជ្រើសរើសយកក្រុង ចំនួន៣ដើម្បីដំណើរការសាកល្បង។ គម្រោងបង្កើតបណ្ដាញទីក្រុងឆ្លាតអាស៊ាន គឺជាគំនិតផ្ដួចផ្ដើមមួយរបស់សិង្ហបុរី ក្នុងនាមជាប្រធានអាស៊ានឆ្នាំ២០១៨ ក្រោមមូលបទ «ភាពរឹងមាំនិងគំនិតច្នៃប្រឌិតថ្មី»។ ការអភិវឌ្ឍទីក្រុងឆ្លាត នឹងផ្ដោតលើវិស័យជាច្រើន ដូចជាការដឹកជញ្ជូន គុណភាពទឹក សុខភាព ថាមពល ការអប់រំ សេវាសាធារណៈ ព័ត៌មាន ទិន្នន័យ និងបច្ចេកវិទ្យាគមនាគមន៍។ ដោយសារតែអាទិភាពអភិវឌ្ឍទីក្រុងនីមួយៗ មិនដូចគ្នា គម្រោងនេះនឹងអនុញ្ញាតឲ្យទីក្រុងសមាជិកទាំងអស់ ផ្ដោតលើវិស័យចាំបាចរបស់ខ្លួន ឲ្យស្របតាមបរិបទក្នុងស្រុក៕
0 comments