លោកឧត្តមឧត្ដមសេនីយ៍ បានបន្ថែមថា ក្រុមមេខ្យល់ច្រើនធ្វើសកម្មភាពនៅខេត្តក្រចេះ កំពង់ចាម ស្ទឹងត្រែង និងខេត្តរតនៈគិរី បន្ទាប់មកបន្លំធ្វើលិខិតឆ្លងដែន ខ្លះប្រើឯកសារក្លែងក្លាយ និងប្ដូរអាយុ ដែលភាគច្រើនឆ្លងកាត់ប្រទេសវៀតណាមជាទេសចរ និងឆ្លងដែនខុសច្បាប់នៅប្រទេសចិន។ បច្ចុប្បន្ននេះ មេខ្យល់លែងជ្រើសរើសការធ្វើដំណើរតាមយន្តហោះផ្ទាល់ហើយ។
“ចឹង! មានការជ្រើសរើស ហើយមានការឃុបឃិតគ្នាបោកបញ្ឆោតនារីខ្មែរយើងឆ្លងកាត់តាមប្រទេសវៀតណាម ក្នុងរូបភាពទេសចរណ៍ ហើយបានចេញពីប្រទេសវៀតណាមប៉ែកខាងត្បូងទៅ ធ្វើដំណើរដោយគ្មានលិខិតអីទេ ឆ្លងតាមច្រករបៀងទៅប្រទេសចិន ហើយជួនកាលទៀតសោតគេប្រើប្រាស់អ្នកបានរៀបអាពាហ៍ពិពាហ៍ហើយនៅប្រទេសចិន ហើយមានឪពុក ម្តាយនៅប្រទេសខ្មែរ។ ចឹង! គេឱ្យ ឪពុកម្តាយនៅស្រុកខ្មែរនេះអូសទាញបន្ត”។ លោក ឧត្តមសេនីយ៍ មានប្រសាសន៍។
ចំពោះមូលហេតុដែលមន្ត្រីជំនាញហ៊ានអះអាងដូចនេះ ដោយសារកន្លងមកមានជនរងគ្រោះជាបន្តបន្ទាប់រស់នៅតំបន់ខាងលើបានប្ដឹងផ្ដល់មកអាជ្ញាធរមានសមត្ថកិច្ច ឱ្យជួយសង្គ្រោះ។ នេះបើតាមលោកឧត្ដមសេនីយ៍ ប៉ុល ភិធេយ្យ។ លោកបានឱ្យដឹងថា ដើម្បីឈានទៅទប់ស្កាត់ការប្រយុទ្ធប្រឆាំងការជួញដូរមនុស្សមានប្រសិទ្ធិភាពត្រូវទាមទារមានការចូលរួមពីជនរងគ្រោះ និងប្រជាជនទូទៅ។ ឧទាហរណ៍ដូចជាជនរងគ្រោះស្ថិតនៅក្រៅប្រទេសអាចទាក់ទងមកបងប្អូននៅក្នុងស្រុក និងបណ្ដាញផ្សព្វផ្សាយ ដើម្បីឈានទៅប្ដឹងអាជ្ញាធរមានសមត្ថកិច្ច ឬអាចទាក់ទងមកអគ្គស្នងការនគរបាលជាតិតាមទូរសព្ទលេខ ១១៧ ១១៨ ព្រមទាំងប៉ុស្តិ៍ រដ្ឋបាលនៅក្បែរផ្ទះ។
លោកបានអំពាវដល់ឪពុក ម្តាយពេលសម្រេចបញ្ជូនកូនទៅធ្វើការងារនៅក្រៅប្រទេស ឬអាពាហ៍ពិពាហ៍ជាដើមត្រូវស្វែងរកភាពស្របច្បាប់ ត្រូវស្ដាប់ និងវិភាគព័ត៌មានឱ្យបានត្រឹមត្រូវ និងគ្រប់ជ្រុងជ្រោយ ដោយជៀសវាងស្ដាប់នូវពាក្យឃោសនាតែមួយមុខ។ចំពោះអាជ្ញាធរមូលដ្ឋាននៅពេលសង្ស័យករណីជួញដូរមនុស្សសូមផ្ដល់ព័ត៌មានខាងសមត្ថកិច្ចជំនាញដើម្បីធ្វើការទប់ស្កាត់ទាន់ពេលវេលា។
ផ្អែកតាមរបាយការណ៍របស់នាយកដ្ឋានប្រឆាំងការជួញដូរមនុស្ស និងការពារអនីតិជន នៃក្រសួងមហាផ្ទៃក្នុងឆ្នាំ២០១៧ បានបង្ហាញថា ជនរងគ្រោះដោយអំពើជួញដូរមនុស្សថយចុះ ពោលគឺមានចំនួន ៨៥ នាក់ ធៀបនឹងឆ្នាំ១០៨ នាក់ ជនរងគ្រោះអាជីវកម្មផ្លូវភេទ មានចំនួន ២១៣ នាក់ ធៀបនឹងឆ្នាំ២០១៦ មាន ១៨៧ នាក់៕
0 comments