ភ្នំពេញ៖ ក្រោយពីអនុប្រធាន និងសមាជិកគណៈកម្មាធិការជាតិរៀបចំការបោះឆ្នោត ចំនួន ៣រូប បានសុំលាលែងពីតំណែង គណៈអចិន្ត្រៃយ៍នៃរដ្ឋសភា បានប្រកាសជ្រើសរើសបេក្ខភាពឈរឈ្មោះ ជាសមាជិកគណៈកម្មាធិការជាតិរៀបចំការបោះឆ្នោតថ្មី។ នេះបើតាមសេចក្ដីជូនដំណើងរបស់រដ្ឋសភា។
បើតាមសេចក្ដីជូនដំណឹងរបស់រដ្ឋសភា កាលពីថ្ងៃទី ២៤ វិច្ឆិកានេះ ដែលចុះហត្ថលេខាដោយលោក ឡេង ប៉េងឡុង គណៈអចិន្ត្រៃយ៍នៃរដ្ឋសភា នឹងជ្រើសរើសបេក្ខជនឈរឈ្មោះជាសមាជិកគណៈកម្មាធិការជាតិរៀបចំការបោះឆ្នោត (គជប)។
ការជ្រើសរើសនេះ អនុលោមតាមមាត្រា៥ និងមាត្រា៦ នៃច្បាប់ស្ដីពីការរៀបចំ និងការប្រព្រឹត្តិទៅនៃគណៈកម្មាធិការជាតិរៀបចំការបោះឆ្នោត។ការប្រកាសជ្រើសរើសសមាជិក គ.ជ.ប ថ្មីនេះ ធ្វើឡើងក្នុងកិច្ចប្រជុំនៅព្រឹកថ្ងៃទី២៤ វិច្ឆិកា ដែលពិភាក្សាពីការដាក់តំណាងរាស្ត្រថ្មី ជំនួសតំណាងរាស្ត្រ៥៥រូប នៃគណបក្សសង្គ្រោះជាតិ ដែលអស់សុពលភាព រួមទាំងពិភាក្សាពីការជ្រើសរើសសមាជិកថ្មី ដើម្បីជំនួសសមាជិក៣រូបនៃ គ.ជ.ប ផងដែរ។
សេចក្ដីជូនដំណឹងដដែល ក៏បានបញ្ជាក់ជូនឥស្សរជនដែលមានបំណងឈរឈ្មោះជាបេក្ខជនក្នុងការជ្រើសរើសផងដែរ។ ឥស្សរជនដែលមានបំណងឈរឈ្មោះ ត្រូវដាក់ពាក្យឈរឈ្មោះជាបេក្ខជន ជូនគណៈអចិន្ត្រៃយ៍នៃរដ្ឋសភា។ ជាមួយគ្នានេះ អគ្គលេខាធិការដ្ឋានរដ្ឋសភា នឹងទទួលពាក្យសុំឈរឈ្មោះ ជាបេក្ខជនចាប់ពីថ្ងៃទី២៥ ដល់ថ្ងៃទី២៩ខែវិច្ឆិកា ឆ្នាំ២០១៧ រៀងរាល់ថ្ងៃ គិតទាំងថ្ងៃសៅរ៍និងថ្ងៃអាទិត្យ នៅនាយកដ្ឋានគ្រប់គ្រងបុគ្គលិកនៃអគ្គនាយកដ្ឋានរដ្ឋបាលនិងហិរញ្ញវត្ថុ នៃអគ្គលេខាធិការដ្ឋានរដ្ឋសភា។ ចំណែកពាក្យសុំឈរឈ្មោះ នឹងឈប់ទទួលនៅថ្ងៃទី២៩ វិច្ឆិកា។
សូមបញ្ជាក់ថា អនុប្រធាន និងសមាជិកគណៈកម្មាធិការជាតិរៀបចំការបោះឆ្នោត ចំនួន ៣រូប ដែលសុំលាលែង រួមមានលោក គួយ ប៊ុនរឿន អនុប្រធាន គ.ជ.ប លោក រ៉ុង ឈុន សមាជិក គ.ជ.ប និងលោកស្រី តែ ម៉ានីរ៉ុង សមាជិកា គ.ជ.ប៕
0 comments