ក្នុងកិច្ចសំណេះសំណាលជាមួយតំណាងកម្មករ កម្មការិនីជិត ៥ពាន់នាក់នៅព្រឹកថ្ងៃអាទិត្យ ទី២៦ ខែវិច្ឆិកា ឆ្នាំ២០១៧នេះ សម្តេចតេជោ បានថ្លែងបញ្ជាក់ជាមួយសម្តីធ្ងន់យ៉ាងដូច្នេះ “មានអាមួយនោះ មិនដឹងថាស្អីវា…ថ្ងៃមុនវាប្រកាសថា លោក ហ៊ុន សែនប្រកាសធ្វើដូចមូហ្គាបេ…បើ ហ៊ុន សែន ធ្វើដូចមូហ្គាបេ ខ្ញុំត្រូវធ្វើជាង៣០ឆ្នាំទៀត អាហ្នឹងបានវាត្រូវ ព្រោះ មូហ្គាបេអាយុ ៩៥ឆ្នាំ ឥឡូវខ្ញុំទើប៦៥ឆ្នាំ អ៊ីចឹងត្រូវធ្វើ៣០ឆ្នាំទៀត…អានេះភ្លើភ្លើ…”។
ការប្រតិកម្មរបស់សម្តេចតេជោ ហ៊ុន សែន បានធ្វើឡើងបន្ទាប់ពីទណ្ឌិត សម រង្ស៊ី បានធ្វើការប្រៀបធៀបថា សម្តេចតេជោ ហ៊ុន សែន នឹងជួបជោគវាសនាដូចលោកមូហ្គាបេ អតីតប្រធានាធិបតីហ្ស៊ីបបាវេ ដែលទើបនឹងត្រូវយោធាធ្វើរដ្ឋប្រហារទម្លាក់ពីតំណែង។
សម្តេចតេជោ បានបញ្ជាក់ថា ការធ្វើរដ្ឋប្រហារទម្លាក់លោកមូហ្គាបេដោយសារតែរូបលោកបានរៀបចំផែនការឲ្យភរិយាចុងឡើងស្នងតំណែងរបស់លោក។
សម្តេចតេជោ ហ៊ុន សែន ធ្លាប់បានបញ្ជាក់ថា ការដឹកនាំរបស់សម្តេចរយៈពេលប្រមាណជា ៣០ឆ្នាំមកនេះមិនមែនដឹកនាំដោយចុងអាវុធនោះទេ តែជាការដឹកនាំក្រោមការគាំទ្ររបស់ប្រជាពលរដ្ឋ។ សម្តេចនាយករដ្ឋមន្ត្រីថែមទាំងបញ្ជាក់ទៀតថាការដឹកនាំដោយចុងអាវុធមិនអាចមានជីវិតយូរអង្វែងនោះឡើយ ដូចជាការរបបខ្មែរក្រហមរបស់ ប៉ុល ពត។
សម្តេចតេជោ ក៏ធ្លាប់បានប្រកាសដែរថា សម្តេចនឹងបន្តដឹកនាំប្រទេសនេះយ៉ាងតិចពីរអាណត្តិស្មើនឹង ១០ឆ្នាំបន្តទៀតដើម្បីរក្សាស្ថេរភាព សន្តិភាព និងការអភិវឌ្ឍរបស់ជាតិកម្ពុជា។
សម្តេចតេជោ ហ៊ុន សែន ក៏បានថ្លែងខឹងសម្បាផងដែរ ចំពោះទណ្ឌិត សម រង្ស៊ី ដែលតែងតែយកសម្តេចទៅប្រៀបធៀបជោគវាសនាមេដឹកនាំប្រទេសដទៃ ដូចជាការប្រៀបធៀបទៅលោក ហ្គាដាហ្វី និងការឌឺដងឲ្យសម្តេចពេលលោកស្រី អង់សាន ស៊ូជី ឈ្នះឆ្នោតនៅប្រទេសមីយ៉ាន់ម៉ាជាដើម។
សម្ដេចក៏បានលើកឡើងបន្ថែមថា “…មួយជីវិតរបស់គណបក្សប្រជាជនកម្ពុជាខ្លាំងជាងគេគឺអី?… គឺសាមគ្គីភាព…បើពួកលោកឯងមិនទាន់ច្បាស់ទេ ប្រឹងរៀនសូត្របទពិសោធន៍គណបក្សប្រជាជនកម្ពុជាទៅ គេនៅជាមួយគ្នា គេរស់ជាមួយគ្នា… កុំតែធ្វើកំហុសព្រហ្មទណ្ឌអាហ្នឹងជួយអត់បានទេ ឧទាហរណ៍ជួញដូរគ្រឿងញៀន ឬទៅកាប់សម្លាប់គេ ប្រព្រឹត្តបទល្មើសពុករលួយ រំលោភលើគេ អាហ្នឹងជួយអត់បានទេ…”៕
0 comments